Ga tepo nyo khaguri, Jehovha a di embeya Samuweli khuye: ‘Gimbiya ndrangani ga Jese. Gimwegyo nya sikhwathana saye gi na khala pfhumu ya Israyeli, gi tshikedza eyi yi fumago olu.’ Khu kharato, Samuweli a di hongola ndrangani ga Jese. Tepo a nga wona gyanana nya koma gya Jese, a di dzi embeya khuye: ‘Egi khigyo gikhwathana gi nga thudwa.’ Ganiolu, Jehovha a di embeya Samuweli khuye khandrigyo. A hegisa khuye: ‘Eni nyo khedza esi si gomogo monyoni nya muthu. Kha nyi khedzi edzi a khadego khidzo khu vbavbandze.’

Jese a di ranisa gambe 6 sanana saye ga Samuweli. Ganiolu, Samuweli khuye: ‘Jehovha kha hatha ne gimwegyo nya esi. U na ni simbe sanana?’ Jese khuye: ‘Nyi na ni gimbe. Khigyo Dhavhidhe, khuye nandra ga vatshavbo. Womo guhavisani nya dzinvuta.’ Tepo Dhavhidhe a nga wuya, Jehovha a di embeya Samuweli khuye: ‘Khuye oyu kamo!’ Samuweli a di theya mafura hungoni ga Dhavhidhe, a mu todza kha nga pfhumu yi landreyago ya Israyeli.

Hwane nya tepo nyo khaguri, Vaisrayeli va di hongola gasi gu ya dwana ni Vafilistiya. Vafilistiya va diri ni lisotshwa nya gidandrangulu nyo pwani khu Gholiya, oyu a nga ba a va dwaneya. Gholiya a di gu poyila Vaisrayeli. A ganeya khu lito nyo khugege, khuye: ‘Nyi rumeleyeni mwama nyi ta dwana naye. O nyi pala, hi na khala sithumi sanu. Ganiolu, ha gu mi pala, mu na khala sithumi sathu.’

Dhavhide a di hongola avba masotshwa ya Vaisrayeli ma nga ba ma romo na gu vbwegedza guhodza ga vandriyaye, va nga ba vari masotshwa. Dhavhidhe a dipwa Gholiya na gu ganeya. Khavbovbo, Dhavhidhe khuye: ‘Eni  nyi na ya dwana naye!’ Pfhumu Sawule khuye: ‘U ngari gyanana uwe.’ Dhavhidhe a hlamula khuye: ‘Jehovha a na nyi phasa.’

Sawule a di zama gu ninga Dhavhidhe esi uye a nga ba a si thumisa gasi gu dwana khiso. Ganiolu, Dhavhidhe a di khuye: ‘Kha nyi na nga si kodza gu dwana na nyi ambade esi.’ Dhavhidhe a di dzega bhuraxo yaye nyo sote khiyo a hongola gitsongwanatunu. A di hatha 5 siwindri, a si theya omu nya pasta yaye a vbedza a tutuma a hongola ga Gholiya. Gidandrangulu gi di ganeya khu lito nyo khugege khigyo: ‘Delu, gyananawe. Nyi na gu ningeya u hodzwa khu sinyoni sa ndzadzini ni sirengo nya likhabi.’ Dhavhidhe kha nga ba a thava. Anuye a di mu embeya khuye: ‘Uwe wa guta ni xipadha ni litshari, ganiolu eni nya guta khu lina la Jehovha. Khu dwani ni ethu; wo dwana ni Nungungulu. Vatshavbo avba va na si wona gu khavo Jehovha na ni tshivba guvbindra xipadha ni litshari. Hi na mi pala mwatshavbo khu gu phaswa khuye.’

Dhavhidhe a di theya ginwindri avbo nya bhuraxu, a vbedza a gi rinya khu tshivba yaye yatshavbo. Khu gu phaswa khu Jehovha, giwindri gi di veta Gholiya vba giwombotunu gi pola gi beya. Gholiya, gidandrangulu gyogyo, a di thega vbavbatshi a feya avbovbo. Vambe Vafilistiya va di tutuma gasi va si songwi. Uwe ke, u ngu mu tumba Jehovha kha nga Dhavhidhe?