Jonatane, a diri gyanana nya koma gya pfhumu Sawule, a diri mwama nyo tiye ngudzu. Dhavhidhe a di ganeya khuye Jonatane a di gu tutuma ngudzu guvbindra lighama nigu na ni tshivba nyo vbindre nghala. Litshigu limwedo, Jonatane a di wona 20 masotshwa nya Vafilistiya gigomoni. A di embeya muphari nya matshari yaye khuye: ‘Hi na lita hi ya dwana navo ho ningwa lito khu Jehovha. Vafilistiya vo khavo gweyani, hi na va gweleya.’ Vafilistiya va di ganeya khu lito nyo khugege khavo: ‘Deluni hi ta dwana!’ Khavbovbo, vama vava nya vavili va di lita gigomoni va ya dwana va pala 20 masotshwa nya Vafilistiya.

Khu kotani nya olu Jonatane a nga ba ari gyanana nya koma gya Sawule, khuye a nga ba a yede gu tshikedza Sawule kha nga pfhumu. Ganiolu, Jonatane a di gu dziti gu khuye Jehovha hathide Dhavhidhe gasi a tshikedza Sawule kha nga pfhumu ya Israyeli. Ambari ulolo, kha mu pweya wuvi Dhavhidhe. Jonatane ni Dhavhidhe va di khala dzipari nya dzikhongolo  ngudzu. Va di tumbisana gu khavo va na sayisana va bwe va vhikeyana. Jonatane a di ningeya libhadzi laye, xpadha, wulahu, ni libhandri laye ga Dhavhidhe a yeyedza gu khuye va diri dzipari.

Tepo Dhavhidhe a nga ba a tutuma Sawule, Jonatane a di hongola a ya mu tiyisa khuye: ‘Tiya hwambo u manega ni tshivba. Jehovha hathide uwe gasi gu khala pfhumu. Ambari papayi wangu a ngu siti isoso.’ U ngu dzina gu manega ni pari nya nga Jonatane?

Khu dzitepo nya dzingi, Jonatane a di vega mhangoni womi waye gasi gu ya phasa pari yaye. Jonatane a di gu dziti gu khuye Pfhumu Sawule o vbweta gu songa Dhavhidhe. Khu kharato, a di embeya papayi waye khuye: ‘U na ba u ghohide wo songa Dhavhidhe; kha gu ghoheya gilo.’ Sawule a di zangareya Jonatane. Hwane nya myaga nyo khaguri, Sawule ni Jonatane va difa nyimbitunu khu litshigu la limwedo.

Hwane nyo ba Jonatane a fude, Dhavhidhe a di vbwetedzeya Mefibhoseti, gyanana gya Jonatane. Tepo Dhavhidhe a nga mu mana, a di mu embeya khuye: ‘Khu kotani nya olu papayi wago a nga ba ari pari yangu nya yikhongolo, nyi na gu sayisa womini wago watshavbo. U na ya khala ndrangani gwangu nya wufumu, u bwe u hodza ni eni mezani gwangu.’ Dhavhidhe gima kha divala pari yaye Jonatane.