Pfhumu Akabi na gu holeya khavba nya janela nya nyumba yaye, a di wona lithembwe nya miuvha la mwama moyo nyo pwani khu Nabhoti. Akabi a di gu li dogoreya lithembwe lolo. A di bhula ni Nabhoti gu khuye a mu rengiseya. Ganiolu, Nabhoti a di bomba gu mu rengiseya kholu Nayo wa Jehovha wu di gu himbedzeya gu rengisa thomba nya nga iyoyo. Ina Akabi tsakide kholu Nabhoti a nga ba a gira silo nya sadi? Ahihi. Akabi a di goroga ngudzu nyo bwe a si dugi ni gu duga khu nyumbani, a bomba ni guhodza.

Mwangadzi waye, Jezabheli, a diri muthu nyo vivbe. A di embeya Akabi khuye: ‘Uwe u pfhumu ya Israyeli phe. U na ni fanelo nyo mane ni gevbini u gi vbwetago. U nga garadzegi, nyi na gu phasa gu li mana lithembwe lile.’ Jezabheli a di lova malangaliya ma hongola ga madhota nya lidhoropa, a ma embeya khuye ma na singedze Nabhoti khayo valetede Nungungulu, ma vbedza ma mu khinyeya khu siwindri kala afa. Madhota ma di gira esi ma nga embedwa khu Jezabheli, khavbovbo a embeya Akabi khuye: ‘Nabhoti fude. Lithembwe nya miuvha li ngu gu lumba olu.’

Nabhoti khandruye enga a nga songwa khu Jezabheli nya mba na nandru. Songide vambe vathu nya vangi va nga ba va haladza Jehovha. Jezabheli a di gu khozeya sifananiso a bwe a gira simbe silo nyo vivbe. Satshavbo silo nyo vivbe a nga ba a gira Jezabheli, Jehovha a di gu si wona. Ina ka, ginani egi Jehovha a nga hadzi gira?

Tepo Akabi a ngafa, gyanana gyaye Joramo gi di khala pfhumu. Jehovha a di rumeya mwama nyo pwani khu Jewu gasi a ya tsayisa Jezabheli ni valongo vaye.

Jewu a di khileya kareta yaye a hongola Jezreyeli omu a nga ba a khala umo Jezabheli. Joramo a dita khu kareta a khinga Jewu, a ta mu wudzisa khuye: ‘Gomo gurula vbakari gwathu? Jewu a di hlamula khuye: ‘Na ngo giredzeya silo nyo vivbe mamayi wago, eni nago kha hi na nga manega ni gurula.’ Joramo a vhirarisa kareta yaye a zama gu tutuma. Ganiolu, Jewu a di mu songa khu giholoma.

 Khavbovbo, Jewu a di hongola nyumbani nya wufumu wa Jezabheli. Tepo Jezabheli a ngapwa khuye a nguta Jewu, a di dzi pitareya khovbe, a dongiseya ndzudzu waye a ema khu janelani a mu vireya. Tepo Jewu a nga vboha, Jezabheli a di mu losa khu maloselo nyo vivbe. Jewu a di ganeya khu lito nyo khugege a embeya sithumi sa Jezabheli si nga ba siri vbafuvbi gwaye khuye: ‘Mu rinyeni vbavbatshi!’ Va di mu rindrividza khu vbajanelatunu a ya thega vbavbandze afa.

Hwane nya isoso, Jewu a di songa sanana sa Akabi a bwe a fuvisa wukhozeyi wa Bhahali, a agisa litigo. U ngu si wona gu khuwe Jehovha a ngu siti satshavbo, nigu a ngu tsayisa ava va girago guvivba khu tepo yakona?