GIHEVBULO 48
Gyanana nya noni gi wusidwego khu ga vafudego
Tepo gu nga ba guri ni ndzala na yi siwi ndzadzi, Jehovha a di embeya Eliya khuye: ‘Gimbiya Sarepita. U na ya ningwa guhodza khu nyamayi nya noni.’ Tepo Eliya a nga vboha vbamwanya nya lidhoropa, a di wona nyamayi nya noni nya gisiwana na roleya dzikhuni. A di mu lomba mati nyo seye. Tepo a nga ba a hongola a ya rega mati, Eliya a di mu rana, khuye: ‘Nyo lomba gu kheni u nyi wuyela ni pawu.’ Ganiolu, nyamayi wule a di khuye: ‘Nyi mwalo pawu nya gu gu ninge. Nyo wa ni wuguvbi nya wudugwana ni sifurana gasi gu gira gilo nyo dambuledze eni ni gyanana gyangu basi.’ Eliya khuye: ‘Jehovha tumbiside khuye wo nyi gireya gipawana nyi hodza, wuguvbi wago ni mafura yago kha si na nga vbeya kala yiwa ndzadzi.’
Nyamayi yoyo a di hongola gaya gwaye a ya gireya pawu muprofeti wa Jehovha. Nyamayi yoyo gumogo ni gyanana gyaye, va di manega ni guhodza matshigu yatshavbo kala yi ngawa ndzadzi. Jehovha giride esi a nga tumbisa. Wuguvbi ni mafura kha sa nga vbeya omu nya dzikhali dza nyamayi yoyo, si di gu khala na si tade.
Khu hwane nya tepo, gu di dugeleya silo nyo vbise ngudzu. Gikhwathana gya nyamayi yoyu gi di dwala gi hegisa khu gufa. A di lomba Eliya gasi a mu phasa. Eliya a di dzega gyanana a hongola nagyo kwartunu ya vbatshani nya nyumba ya nyamayi wule. A di gi ladzisa vbakamatunu, a gombeya ga Jehovha, khuye: ‘Jehovha, nyi ngu gu lomba gu kheni u wusa gyanana gegi gi vbanya.’ U ngu dziti gu khuwe khu ginani si nga ba si hlamadzisa gu ba Jehovha a wuside gyanana gyogyo? Khu gu ga tepo yoyo, mwalo a nga ba a tshukide apwa gu pwani gu wusidwe muthu a nga ba a fude. Nigu nyamayi yoyu ni gyanana gyaye kha va nga ba vari Vaisrayeli.
Ganiolu, gikhwathana gile gi nga ba gi fude gi di wuga, gi pheya gu hefemula. Eliya a di embeya noni yile khuye: ‘U ngu gi wona! Gyanana gyago gi wugide, gi ngu vbanya.’ A di tsaka ngudzu, a embeya Eliya khuye: ‘Khu lisine uwe u muthu wa Nungungulu. Nyo ganeya isoso kholu uwe wo ganeya esi Jehovha a gu rumago gu ganeya, nigu si ngu girega.’
“Nga wonani vamahigunganye, avo kha va yali, ne kha va vbweri, ne va mwalo sisangala, ganiolu Nungungulu a ngu va khurisa. Ina enu mu mwalo lisima guvbindra sinyoni?” — Luka 12:24