Hwane nya gu ba Solomoni a khade pfhumu ya Israyeli, Jehovha a di mu wudzisa khuye: ‘Ginani u vbwetago gu khuwe nyi gu ninga?’ Solomoni a di hlamula khuye: ‘Nyi gari gyanana, kha nyi giti ni gilo nyo gire. Nyi ninge wugengeyi gasi nyi kodza gu thangeya vathu vago.’ Jehovha khuye: ‘Khu kotani nya olu u nga lomba wugengeyi, nyi na gu ninga wugengeyi nyo vbindre vatshavbo mafuni. Nyi na gu ninga gambe dzithomba nya dzingi. Nigu wo nyi engisa, u na vbanya matshigu nya mangi.’

Solomoni a di pheya gu vbaha tempele. Thumiside prata nya yadi ngudzu, ouro, madhera ni siwindri nya sadi niso. Tempele yi vbahidwe khu vama ni vanyamayi nya vangi ngudzu va gu na ni wugengeyi. Hwane nya 7 myaga, tempele yi di vbedzidwe gu vbahwa gasi yi hendzeledzwa ga Jehovha. Litshigu yi nga hendzeledzwa khilo, gu diri ni miningelo nyo vbiswe avba nya altari. Solomoni a di khidzima mbeli nya altari a gombeya, khuye: ‘Jehovha, hi ngu dziti gu khethu kha wu eneyi omu nya tempele yeyi kholu yidugwana, ganiolu ho lomba gu khethu u hakha wukhozeyi wathu ni gupwa milombelo yathu.’ Dzi pwide kharini Jehovha khu tempele ni nombelo wa Solomoni? Tepo Solomoni a nga vbedza gu gombeya, gu dita nilo khu ndzadzini wu ta vbisa miningelo yi nga ba yiri vbatshani nya altari. Isoso si di gu yeyedza gu khiso Jehovha yi tsakede tempele. Tepo Vaisrayeli va nga si wona isoso, va di tsaka ngudzu.

Pfhumu Solomoni a di gu tidwa ngudzu Israyeli khu wugengeyi waye. Nigu a du gu tidwa malanga ya hwindzo ngudzu. Vathu va di guta ga Solomoni va ta lomba gu khavo a va phasa gu lulamisa sigaradzo sawe. Ambari pfhumugadzi Xebha, a di gu ya mu linga khu gu mu gira siwudziso nyo garadze. Tepo a ngapwa mihlamulo ya Solomoni, a di khuye: ‘Kha nya nga ba nyi khodwa esi vathu va nga ba va ganeya khuwe ganiolu, olu nyi ngu si wona gu kheni u na ni wugengeyi nyo vbindre owu va nga ba va wu thula. Jehovha Nungungulu wago gu kategiside.’ Khu tepo yoyo, vathu tigoni ga Israyeli va di gu vbanya womi nya wadi va bwe va tsaka. Ganiolu, silo si di bhi si vbindrugedza.