Josafati, pfhumu ya Judha, a di khungumuleya dzialtari dza Bhahali ni sifananiso tigoni gwatshavbo. A di gu vbweta gu khuye vathu vati milayo ya Jehovha. Khu kharato, a di ruma vathangeyi ni Valevhi gasi va hevbudza milayo ya Jehovha tigoni gwatshavbo ga Judha.

Mayigo ma nga ba ma dinganide ni litigo la Judha, ma di gu thava gu va wugeya kholu ma di gu dziti gu khayo Jehovha a ngu dwaneya vathu vaye. Vathu nya mayigo yoyo va di gu hongola ni silo nya sadi va ya ninga Josafati. Ganiolu, Vamowabhi, Vaamoni ni vambe vathu va tigoni ga Seyire va di gu hongola gasi va ya dwana ni litigo la Judha. Josafati a di gu dziti gu khuye gu di gu vbwetega gu Jehovha a va phasa. Khu kharato, a di ranisa vathu vatshavbo — vama, vanyamayi ni sanana — gasi va hongola Jerusalema. A di ema mbeli gwawe a gombeya, khuye: ‘O Jehovha, hi ngu dziti gu khethu wo mba hi phasa, hi mwalo ndziya nyo va pale. Khu kharato, ho lomba gu khethu u hi embeya esi hi yedego gu gira.’

Jehovha a di hlamula nombelo waye, khuye: ‘U nga thavi. Nyi na mi phasa. Enu emani mu khedziseya, mu wona edzi nyi na mi vbulugisago khidzo.’ Ginani a nga gira Jehovha gasi gu va vbulugisa?

Ni dzimindru dzakona, Josafati a di hatha vaembeleyi a va ruma gu thanga khu mbeli nya masotshwa, va hongola. Va di khuga Jerusalema va hongola wulangani owu va nga hadzi dwaneya avbo, wu ranwago pwani Tekowa.

Tepo vaembeleyi va nga ba va dhumisa Jehovha khu gu embeleya dzindzimo khu malito nyo khugege ni gutsaka, Jehovha a di gu dwaneya Vajudha. A di gira gu Vamowabhi ni Vaamoni va si pwanani, khavbovbo va pheya gu songana. Va di songana vatshavbo, nyo bwe ne ni moyo a si vbulugi. Ganiolu, Jehovha a di vhikeya Vajudha vatshavbo, masotshwa ni vapristi. Vathu nya mambe mayigo aya ma nga ba ma dinganide ni Judha va dipwa esi Jehovha a nga ba a giride. Va di gu dziti gambe gu khavo Jehovha a di hadzi vhikeya vathu vaye. Jehovha a gu vhikeya kharini vathu vaye? Khu dzindziya nya dzingi. Kha vbweti gu phaswa khu muthu gasi gu gira isoso.