GIHEVBULO 55
Ezekhiya a vhikedwa khu ngilozi ya Jehovha
Ga tepo yoyo, Mufumo wa Asiriya wu di pade mufumo wa Israyeli nya 10 mahundzu. Olu Senakeribhi, pfhumu ya Asiriya, a di vbweta gu dzega mufumo wa Judha nya mahundzu mavili. A di pheya gu dzega madhoropa ya Judha limwedo khu limwedo. Ganiolu, lidhoropa a nga ba a li vbweta ngudzu kheli la Jerusalema. Senakeribhi kha nga ba a dziti gu khuye Jerusalema a di gu vhikedwa khu Jehovha.
Ezekhiya, pfhumu ya Judha, a di mu ninga dzitsapawu nya dzingi Senakeribhi gasi a si wugeyi Jerusalema. Ambari olu Senakeribhi a nga dzega dzitsapawu dzodzo, a di simama gu rumeya masotshwa yaye nya tshivba gasi ma ya wugeya Jerusalema. Vathu va dhoropani va di pheya gu thava kholu Vaasiriya va diri vbafuvbi ni gu beya. Ezekhiya a di va embeya khuye: ‘Mu nga thavi. Lisine gu Vaasiriya va na ni tshivba, ganiolu Jehovha a na hi ninga tshivba nyo vbindre yawe.’
Senakeribhi a di ruma Rabhisaki a ya poyileya vathu va Jerusalema. Rabhisaki a di ema khu vbavbandze nya lidhoropa a ganeya khu lito nyo khugege, khuye: ‘Jehovha kha na nga si kodza gu mi phasa. Mu nga dzumeyi gu kalavedwa khu Ezekhiya. Mwalo nungungulu a gu na ni tshivba nyo vhikeye vathu vaye.’
Ezekhiya a di wudzisa Jehovha esi a nga ba a yede gu gira. Jehovha a di mu hlamula, khuye: ‘U nga thavi esi si nga ganedwa khu Rabhisaki. Senakeribhi kha na nga dzega Jerusalema.’ Khu gulandreya, Senakeribhi a di rumeya malangaliya nyo khaguri ga Ezekhiya. Malangaliya yoyo ma di gu khayo: ‘Dzegeya gu nyi ninga lidhoropa. Jehovha kha na nga si kodza gu mi vbulugisa.’ Ezekhiya a di gombeya, khuye: ‘Jehovha, ho lomba gu khethu u hi vbulugisa, gasi vathu vatshavbo va si wona gu khavo khuwe wenga u gu Nungungulu nya lisine.’ Jehovha khuye: ‘Pfhumu ya Asiriya kha yi na nga beya omu Jerusalema. Nyi na vhikeya lidhoropa langu.’
Senakeribhi a di gu dzi embeya khuye gu tshade vbadugwana basi gasi a dzega Jerusalema. A di si kanakani ne vbadugwana. Ganiolu, ga wutshigu wowo
kamo, Jehovha a di rumeya ngilozi yi hongola vbavbandze nya lidhoropa, avbo masotshwa ya Senakeribhi ma nga ba ma ghwimbide avbo matendra yawe, yi ya songa 185 000 masotshwa! Masotshwa yatshavbo nya tshivba ya Senakeribhi ma di songwa hayo bhi, a tshala khu mandza. A diri mwalo gimbe gilo nyo gire. Khavbovbo, a di bweleya gaya. Jehovha a di vhikeya Ezekhiya ni Jerusalema, kha nga edzi a nga ba a tumbiside khidzo. Nari khatshi u diri Jerusalema, ina na wu tumbide Jehovha?“Ngilozi ya . . . Nungungulu ya gu vhikela vale va mu ningago githawo yi va vbanyisa.” — Ndzimo 34:7