Vathu va dhoropani ga Asiriya tigoni ga Ninivha va diri ni mavbanyelo nyo vivbe ngudzu. Khu kharato, Jehovha a di ruma muprofeti waye Jona a hongola Ninivha a ya embeya vathu gu khuye gu vbwetega va vbindrugedza mavbanyelo. Ganiolu, Jona a di tutuma a hongola wumbe wulanga. A di beya omu nya ngalava yi nga ba yi hongola Tarisisi.

Tepo ngalava yi nga ba yiri omu nya yiphwa, gu di veta phuvbo nya yikhongolo, ava va nga ba va gimbidzisa ngalava va pheya gu thava. Va di gombeya ga vanungungulu vawe, va wudzisa khavo: ‘Gasi khu ginani si hi dugeleyago esi?’ Jona a di vbedza a va embeya khuye: ‘Nandru wangu. Nyo tutuma gu gira esi Jehovha a nga nyi ruma. Nyi rinyeni matini, phuvbo yi na ema.’ Ava va nga ba va gimbidzisa ngalava kha va nga ba va dzina gu rinya Jona matini. Ganiolu, Jona a di simama gu va gurumedza. Tepo va nga mu rinya matini, phuvbo yi di ema.

Jona a di gu pimisa gu khuye a nafa. Tepo a nga ba a dzama matini, a di gombeya ga Jehovha. Jehovha a di rumeya ndzandzi nya yikhongolo ngudzu yi ya midza Jona. Ganiolu, Jona khafa. Jona a di gombeya nari ndrani nya ndzandzi, khuye: ‘Jehovha, nyi na gu engisa tepo yatshavbo.’ Jehovha a di vhikeya Jona tepo a nga ba ari ndrani nya ndzandzi khu matshigu mararu, kala yi nga ya mu gamba avbo nya mafu nyo bange.

Kha nga olu Jehovha a nga vbulugisa Jona, ina isoso si di gu thula gu khiso si di vbindride, kha na nga hongola gambe Ninivha? Ahihi. Jehovha a di embeya gambe Jona gu khuye a hongola Ninivha. Ga tepo  yeyi, Jona a di engisa. A di hongola a ya embeya vathu vovo nyo vivbe, khuye: ‘Ndrani nya 40 matshigu, Ninivha a na tshungunudwa.’ Gu di dugeleya silo nyo hlamadzise ngudzu — Vaninivha va di engisa, va vbindrugedza mavbanyelo yawe. Pfhumu ya Ninivha yi di embeya vathu vayo, khiyo: ‘Lileyani Nungungulu, mu dzi laya. Adzina kha na nga hi fuvisa.’ Tepo Jehovha a nga wona gu khuye vathu va Ninivha va dzi layide, kha fuvisa gambe lidhoropa lile.

Jona a di goroga ngudzu kholu lidhoropa li nga ne fuviswa. Nga dundrugeya khesi: Jehovha a di laphiseya monyo Jona a bwe a mu pweya-wusiwana. Ganiolu, Jona kha pweya-wusiwana vathu va Ninivha! Wulangani nya isoso, a di hongola a ya khala vbavbandze nya lidhoropa avba nya mutsa nya tshafura. Simbo wowo wu difa, khavbovbo Jona a goroga ngudzu. Jehovha a di embeya Jona, khuye: ‘Khu ginani u garadzegago khu kotani nya simbo wowu wu ngafa, ganiolu u si khathali khu Vaninivha? Khu woni gu khuwe nyi va pwede wusiwana gasi va sifi!’ Gasi a di gu vbweta gu khuye ginani Jehovha? A di gu yeyedza gu khuye vathu va Ninivha va diri va lisima ngudzu guvbindra misimbo yatshavbo.