Bheni-Hadhadhi, pfhumu ya Siriya, yi di gu khaleya gu wugeya Vaisrayeli. Ganiolu, muprofeti Elizewu a di gu embeya pfhumu ya Israyeli gu khuye yi sihala gasi yi si songwi. Khu kharato, Bheni-Hadhadhi a di hunga gu mola Elizewu a hongola naye. Bheni-Hadhadhi a dipwa gu pwani Elizewu womo dhoropani ga Dhotani. Khavbovbo, a di rumeya masotshwa ma hongola Siriya gasi ma ya mola Elizewu.

Vaasiriya va di hongola Dhotani ni wutshigu. Ni dzimindru dzakona, githumi gya Elizewu gi di duga vbavbandze, khavbovbo gi wona gu khigyo lidhoropa li di tade khu masotshwa. Gi di thava ngudzu, khabvovbo hi gi khigyo: ‘Elizewu ginani hi yedego gu gira? Elizewu khuye: ‘Ava va gu na ni ethu vangi ngudzu guvbindra ava va gu navo.’ Khu tepo yoyo, Jehovha a di tula maho ya githumi gya Elizewu gi wona gu khigyo sigomo esi si nga ba si romo mudzibambe nya lidhoropa, si di tade khu dzikareta nya nyimbi dzi nga ba dzi dzura nilo.

Tepo masotshwa nya Vaasiriya ma nga zama gu mola Elizewu, a di gombeya ga Jehovha, khuye: ‘Jehovha, va sege maho va si woni.’ Ambari olu masotshwa yoyo ma nga ba ma wona, ma di dzimeya nya mba si tugula,  ma si guti gambe omu ma nga ba ma romo. Elizewu a di embeya masotshwa yoyo, khuye: ‘Mu dzimede. Khandrilo lidhoropa mu li vbwetago. Hongoleni nyi mi vbwegedzani ga mwama mu mu vbwetago.’ Va di hongola Samariya ni Elizewu, umo yi nga ba yi khala umo pfhumu ya Israyeli.

Khu hwane nya tepo, Vaasiriya va di tugula omu va nga ba va romo. Pfhumu ya Israyeli yi di wudzisa Elizewu, khiyo: ‘Nyi va songa gani?’ Ina Elizewu a li wonide nga lithomo nya gu va ningeye va songwa, kha nga olu va nga ba va vbweta gu mu tshanisa? Ahihi. Elizewu a di khuye: ‘U nga va songi. Va ninge guhodza, u vbedza u va diga va hongola.’ Khu kharato, pfhumu yi di va gireya festa nya yikhongolo, yi vbedza yi va diga va bweleya gaya.