Tigoni ga Siriya, gu diri ni gyagadzyana nya Muisrayeli gi nga ba giri hwindzo ni gaya. Gi nga ya wandrwa khu mu masotsha nya Vaasiriya ga valongo vagyo. Tigoni ga Siriya gi di ya khala githumi gya ngadza pfhumu nya masotshwa, yi nga ba yi ranwa pwani khu Nahamani. Gyagadzyana gyogyo gi di gu khozeya Jehovha ambari olu gi nga ba gi vbanya ni vathu va nga ba va si khozeyi Jehovha.

Nahamani a diri ni madwali nyo thise ngudzu, nya gu duge silondra givilini gyatshavbo. Tepo yatshavbo givili gyaye gi di gu khala khu guvbisa. Gyagadzyana gegi gi di gu dzina ngudzu gu phasa Nahamani. Gi di embeya ngadza Nahamani, khigyo: ‘Gu na ni muthu nyi mu tigo nya gu a nga vbanyisa mwama wago. Khu Elizewu, muprofeti wa Jehovha a gomogo Israyeli. A nga si kodza gu vbanyisa mwama wago.’

Ngadza Nahamani a di embeya mwama waye esi a nga embedwa khu gyagadzyana gile. Nahamani a di dzi emisede gu gira ni gevbini gi nga ba gi vbwetega gasi a vbanya. Khu kharato, a di hongola ga Elizewu, eyi Israyeli. Nahamani a di gu vireya gu khuye Elizewu a mu hakha edzi va hakhwago  khidzo vathu nya lisima ngudzu. Ganiolu, Elizewu kha ganeya naye. A di ruma githumi gyaye gi hongola ga Nahamani gi ya mu embeya, khigyo: ‘ Gimbiya Tsongoni wa Joridhani u ya hamba 7 dzitepo. U na vbanya.’

Nahamani a di goroga ngudzu, khuye: ‘Nyi di gu pimisa gu kheni muprofeti yoyu a na nyi vbanyisa khu gu gombeya ga Nungungulu waye ni gu khusedza mandza yaye a ma yisa eno ni eno. Ganiolu, wari khuye nyi na hongole nyi ya hamba omu nya tsongo wowu wa Israyeli. Phe hi na ni mitsongo nya yadi ngudzu Siriya guvbindra owu. Khu ginani a gu mba nyi ruma gu hongola nyi ya hamba iyo?’ Nahamani a di goroga ngudzu, a khuga khu gaya ga Elizewu a hongola.

Nahamani phasidwe khu sithumi saye gu manega ni mawonelo nya yadi khu mahungu yaya. Si di mu embeya khiso: ‘Gasi uwe kha wa dzi emiseya gu gira ni gevbini gi vbwetegago gasi gu vbanya? Esi a nga gu embeyago muprofeti yoyo kha si garadzi. Khandri tshukwana u dzumeya?’ Nahamani a di va engisa, a ya beya tsongoni 7 dzitepo. Tepo a nga beya nya wu 7, Nahamani a di duga na hawulugide madwali yale. A di tsaka ngudzu, khavbovbo a bweleya ga Elizewu a ya mu bonga. Nahamani a di khuye: ‘Olu nyi ngu dziti gu kheni Jehovha khuye Nungungulu nya lisine.’ Wo si wona kharini, gyagadzyana gile nya Muisrayeli gi dzi pwide kharini tepo gi nga wona Nahamani na hawulugide madwali yaye?