Vandriyathu nyo golege:

Kha nga vakhozeyi va Jehovha, hi ngu gola lito laye, a gu Bhibhiliya. Hi ngu tiyisega gu khethu matimo hi ma manago umo nya lito la Nungungulu lisine, nigu sileletelo sakone niso si ngu tumbega nigu li ngu yeyedza lihaladzo nya likhongolo la Jehovha a gu nalo khethu. (Dzindzimo 119:105; Luka 1:3; 1 Johane 4:19) Hi ngu tsakeya ngudzu gu phasa vathu vatshavbo guti lisine nya Bhibhiliya. Khu kharato, hi tsakide khu gu dusa libhuku leli, “Hevbula khu matimo nya Bhibhiliya.” Hi na mi tshamuseya silo nyo khaguri khilo.

Libhuku leli li lovidwe na hi gu dundrugeya ngudzu khu sanana. Ganiolu li nga thumiswa gambe gasi gu phasa vathu nya vakhongolo. Nigu ambari ethu hi tigo lisine gu khugeya gale li na hi phasa gu dundruga matimo yaya. Khugu Bhibhiliya libhuku li phasago vathu vatshavbo nigu sihevbudzo sakona si na hi phasa gu mana litsako.

Likhuku leli li ngu ganeya khu matimo nya vathu gukhugeya guvangwatunu nya silo satshavbo khu gu thumiswa Bhibhiliya. Li ngu yeyedza matimo nya Bhibhiliya khu ndziya nyo pwale ni gu vbevbuga gu ma pwisisa nigu khu sasamedzo wakona.

Libhuku leli li na ni silo nya singi ngudzu guvbindra gu ganeya khu matimo nya Bhibhiliya basi. Mavhesi nya Bhibhiliya ni dzifotu, si dongisedwe gasi gu phasa oyu a lerigo, guvbanya matimo nya Bhibhiliya ni gu dzipwa nga edzi va dzipwidego khidzo ava va ganedwago umo nya matimo yaya.

Libhuku leli lo yeyedza gu khilo Bhibhiliya libhuku li ganeya khu vathu — vathu va nga engisa Nungungulu ni vathu va nga ne gu mu engisa. Ilo li na phasa gu wona esi hi nga si hevbulago khu vathu vovo. (Varoma 15:4; 1 Vakorinto 10:6) Libhuku leli li na ni 14 sipandre. Gupheyani nya gipandre  ni gipandre gu ngu ganedwa vbadugwana khesi si na ganedwago avbo nya gipandre gyogyo.

Wa gu ba uri muvelegi, leri matimo yaya ni gyanana gyago u bwe u bhula nagyo khu dzifotu. Khu gulandreya leri mavhesi nya Bhibhiliya ma gu romo khu vbavbandzi nya gihevbulo ni gihevbulo. Phasa gyanana gyago gu pwisisa gupwanana gu guromo avbo nya mavhesi nya Bhibhiliya ni matimo mu leridego. U nga gira sasimweso wa gu ba u phasa muthu nya khongolo gu pwisisa Bhibhiliya.

Ho vireya gu khethu libhuku leli li phasa vatshavbo — sanana ni vakhongolo — gu hevbula lito la Nungungulu. Uye a vbanyago khesi Bhibhiliya yi hevbudzago a na khozeya Jehovha ni gu a na gira gipandre nya ndranga yaye a yi haladzago ngudzu.