LISINE nya ginani? Nya siwudziso nya lisima esi vathu va dzi wudzisago. Gudzina saye u di nga dzi gira siwudziso nya nga esi:

• Ina Nungungulu a ngu hi khathaleya kamwe?

• Dzinyimbi ni gutshaniseka si na tsanga si vbe ya kamwe?

• Ginani gi giregago ga muthu a gufa?

• Gitumbiso muni gi gomogo khu vale va fudego?

• Nyi nga gombeya kharini gasi nyi pwidwa khu Nungungulu?

• Nyi nga gu mana kharini gutsaka guvbanyani?

Hi nga yi mana hayi mihlamulo nya siwudziso sesi? Wa gu hongowa omu nya dzibhibliyoteka mwendro dzilivrariya, u na ya mana mazanazana nya mabhuku ma gu khayo ma ngu hlamula siwudziso sesi. Ambari ulolo, sikhati nya singi mabhuku yoyo ma ngu ganedzana. Khu yimbe tepo mambe ma gu gira khatshi ma gu ganeya lisine, ganiolu kha ma hweyi gu vbindredwa, gu tshukwadziswa mwendro gu tshikedzwa.

Ganiolu lomo libhuku li gu na ni mihlamulo nya gutumbege. Ilo libhuku li ganeyago lisine. Jesu Kristo gombede ga Nungungulu khuye: “Magana yago khayo ma gu lisine.” (Johane 17:17) Muhuno, Magana mwendro Lito lolo la gu tidwa kha nga Bhibliya nya Guage. Avba nya dzipajina dzi landreyago, u na mana siyeyedzo nya sidugwana nya mihlamulo nya lisine nya Bhibliya, yi pwisisegago, nya siwudziso sesi vbatshani vbavba.

GIGHELO NYA GIWUDZISO GEGI: Ha gu vbanya mafuni ma tadego khu wuvivbi ni gumbalulama. Wukhongeli nya wungi wa gu hevbudza gu khuwo gutshaniseka hi mananago nago gu gola ga Nungungulu.

NGA WONA ESI BHIBLIYA YI SI HEVBUDZAGO: Nungungulu gima kha giri silo nya guvivbe. Libhuku la Joba 34:10 lari khilo: “Guvivba gomo hwindzo ga Nungungulu, ambari gighoho gimwalo ga wule nya Tshivba Yatshavbo.” Nungungulu na ni makungu nya lihaladzo khu vathu. Khu kharato Jesu hi hevbudzide gu gombeya: “Baba wathu u guromo ndzadzini . . . Mufumu wago wu nate gwathu; Gudzina gwago gu na girege mafuni kha nga ndzadzini.” (Matewu 6:9, 10) Nungungulu a ngu hi khathaleya ngudzu avba nya gu kala a gira ni gevbi gasi gu makungu yaye ma tadzisega. — Johane 3:16.

Wona gambe Tumbunuko 1:26 - 28; Jakobe 1:13; ni 1 Pedro 5:6, 7.

GIGHELO NYA GIWUDZISO GEGI: Dzinyimbi dzi ngu gu simama gu songa vathu nya vangi ngudzu. Hatshavbo hi ngu khumbwa khu gutshaniseka nya vathu.

NGA WONA ESI BHIBLIYA YI SI HEVBUDZAGO: Nungungulu a ngu ganeya khu gikhati a na resago gurula mafuni gwatshavbo. Vbavbatshi nya Mufumu waye, a gu mufumu wa ndzadzini, vathu kha va na nga “hevbula nyimbi.” Gu diga isoso, “va na vbindrugedza dzisupada dzawe dzi khala mavbadza.” (Isaya 2:4) Nungungulu a na vbedza gumbalulama ni gutshaniseka gwatshavbo. Bhibliya yi ngu tumbisa: ‘[Nungungulu] a na bavbula marongo mahoni gwawe, kholu gima kha gu na manega gambe gufa, guliya gu na vbeya, ni gu dileya ni wuvi, kholu dzitshanisa dza gale [gu pata ni gumbalulama ni gutshaniseka ga muhuno] dzi vbindride.’ — Gutuledwa 21:3, 4.

Wona gambe Ndzimo 37:10, 11; 46:10; ni Mikeya 4:1 - 4.

GIGHELO NYA GIWUDZISO GEGI: Wukhongeli nya wungi mafuni wa gu hevbudza gu khuwo ndrani nya muthu gyomo gilo gi simamago gu vbanya hwane nya gu ba na fude. Vambe vathu va gu khodwa gu khavo ava va fudego va ngu kodza gu gireya guvivba vale va vbanyago mwendro khavo Nungungulu a gu tsayisa vathu nya guvivbe khu gu va vbisa ndzadzini kala gupindruga.

NGA WONA ESI BHIBLIYA YI SI HEVBUDZAGO: Muthu a gufa, a mwalo gambe. Libhuku la Mutshumayeli 9:5 lari khilo “ava va fudego kha vati gilo.” Kha nga olu ava va fudego va si tigu, ambari gupwa gilo, kha va kodzi gu gireya silo nya guvivbe —mwendro gu phasa —ava va vbanyago. — Ndzimo 146:3, 4.

Wona gambe Tumbunuko 3:19 ni Mutshumayeli 9:6, 10.

GIGHELO NYA GIWUDZISO GEGI: Ethu ha gu vbweta gu vbanya, hi vbanya ni vale hi va golago. Khu kharato hi ngu dogoreya gu wona gambe ava hi va golago va fudego.

NGA WONA ESI BHIBLIYA YI SI HEVBUDZAGO: Vathu nya vangi va fudego va na wuswa. Jesu tumbiside gu khuye “vatshavbo va fudego va gomo marowoni . . . va na wuga.” (Johane 5:28) Mayelano ni makungu nya gupheye ya Nungungulu, ava va na wuswago kha nga vathu nya mili va na vbanya paradhesini mafuni. (Luka 23:43, A Biblia Go Basa) Gitumbiso gegi gya gu pata womi nya guvbeleye ni guvbanya nya gupindruge si na hakhwago khu vathu nya guengise. Bhibliya yari khiyo: ‘Va nya gululama va na fumeya litigo va vbanya umo kala gupindruga.’ — Ndzimo 37:29.

Wona gambe Joba 14:14, 15; Luka 7:11 - 17; ni Mithumo 24:15.

GIGHELO NYA GIWUDZISO GEGI: Vathu nya wukhongeli watshavbo va ngu gira migombelo. Ambari ulolo, nyavangi va gu pimisa gu khavo milombelo yawe kha yi hlamudwi.

NGA WONA ESI BHIBLIYA YI SI HEVBUDZAGO: Jesu hi hevbudzide gu khuye hi fanede gu potsa gu bweleleya malito yamamowo ha gu gombeya. Uye ganede khuye: “Milombeloni yanu mu nga tadzi mahungu nya mangi [“mu nga bweleleyi malito yamamowo,” Tradução do Novo Mundo]” (Matewu 6:7) Ha gu vbweta gu khethu Nungungulu a engisa milombelo yathu, hi fanede gu gombeya khu ndziya a yi dzumeyago. Gasi gu gira isoso, hi fanede guti gugola ga Nungungulu hi bwe hi gombeya mayelano nago. Libhuku la Johane nya gupheye 5:14 li ngu tshamuseya: ‘Ha gu lomba gilo maningano ni gudzina [ga Nungungulu], hi na ni lisine nya gu khethu a ngu hipwa.’

Wona gambe Ndzimo 65:2; Johane 14:6, 14; ni 1 Johane 3:22.

GIGHELO NYA GIWUDZISO GEGI: Vathu nya vangi va gu pimisa gu khavo dzitsapawu, ndruma, mwendro gumbura khiso si ningago litsako. Khu kharato, va ngu dzi garadza gasi gu mana silo sesi — ganiolu iso kha si va ningi litsako.

NGA WONA ESI BHIBLIYA YI SI HEVBUDZAGO: Jesu yeyedzide ndziya nya gu mane gutsaka tepo a nga ganeya khuye: “Va kategide avo va pwago magana ya Nungungulu, va ma landrisa.” (Luka 11:28) Litsako nya lisine hi nga li mana basi ha gu khathaleya gu enedza gilo nya gikhongolo gi vbwetegago — a gu guti Nungungulu ni makungu yaye. Lisine leli la gu manega omu nya Bhibliya. Guti lisine lolo gu na gu phasa gu hambanisa silo nya lisima nesi si gu mwalo lisima. Gu dzumeya lisine nya Bhibliya gu li thangeya makungu ni sigiro sathu gu na hi ninga litsako guvbanyani.

Wona gambe Mavingo 3:5, 6, 13 - 18 ni 1 Thimoti 6:9, 10.

 Olu hi di wona basi mihlamulo nya Bhibliya nya livbandre na gimwegyo siwudziso. U ngu dzina guti simbe? Wa gu ba na u ri moyo nya vale va dogoreyago gupwa “magana ya Nungungulu, va ma landrisa,” khu lisine u ngu dzina. Gudzina saye u ngari ni simbe siwudziso nya nga esi: ‘A ba a ri gu Nungungulu a ngu hi khathaleya, khu ginani a dzumeleyago guvivba ni gutshaniseka si simama guvbanyani nya vathu vatshavbo? Nyi nga tshukwadzisa kharini womi nya ndranga yangu?’ Bhibliya yi ngu ninga mihlamulo nya gupwisisege ni gutsakisa nya siwudziso sesi ni simbe.

Ambari ulolo, muhuno vathu nya vangi va ngu kanakana gu hevbula Bhibliya. Va gu yi wona kha nga libhuku nya likhongolo ngudzu simbe sikhati li garadzago gu li pwisisa. U ngu dzina gu phaswa gasi gu mana mihlamulo omu nya Bhibliya? Dzimboni dza Jehovha dzi na gu ninga giphaso khu dzindziya dzimbili.

Nya gupheye, libhuku Ginani hi hevbudzwago khu Bhibhiliya? li giredwe gu phasa vathu va pharegidego gasi va mana mihlamulo nya yadi nya siwudziso nya lisima omu nya Bhibliya. Nya wuvili, longoloko nya gihevbulo nya Bhibliya ndrangani, nya mba livba gilo. Semana ni semana moyo nya Dzimboni dza Jehovha a vbanyago vbafuvbi nago a tigo gu hevbudza Bhibliya a na gu endreya ndrangani gwago mwendro wumbe wulanga wu gu tshukwana gwago gasi khu tepo nya yi dugwana muta hevbula Bhibliya. Mazanazana nya vathu mafuni gwatshavbo va ngu phasega khu longoloko wowu. Vangi nya avo va ngu ganeya na va tsakide khavo: “Nyi li mane lisine!”

Yi mwalo yimbe thomba nya yi khongolo gu vbindra iyoyo. Lisine nya Bhibliya li ngu hi tshudzisa gukhodwani nya silo nya mba yela, pfilupfiluni ni gu thava nya guvbindre pimo. Li ngu ninga gutumba, gighelo nya guvbanye ni litsako. Jesu a di khuye: “Mu natini lisine, gambe ilo lisine li na mi gira vathu nya gutshulege.” — Johane 8:32.