Lina la Nungungulu khu Jehovha. Go pimiswa gu pwani lina leli lari khilo “A gu gira silo si kodzega.” Jehovha khuye Nungungulu nya tshivba yatshavbo, a gu uye a vangidego silo satshavbo. Na ni tshivba nya gu gire ni gevbi a gi vbwetago.

Khu lidimi nya giHebheru, lina la Nungungulu li di gu lowa khu dziletra dzina. Khu Gitonga, dziletra dzodzo dzo lowa YHWH mwendro JHVH. Lina la Nungungulu li ngu manega omu nya milowo nyo pheye nya Bhibhiliya khu giHebheru gipimo nya 7.000 malanga. Mafuni gwatshavbo, vathu va ngu rana lina Jehovha khu maranelo nyo hambanehambane, kha nga edzi va nga li oloveya khidzo.

▸ Gip. 1, ndri. 15

Nungungulu khuye Mutumbunusi nya Bhibhiliya, na siri vama vale va nga yi lova. Isoso khidzo saye ni mune nya koponi a leleteyago mabhalane waye gu mu loveya lidangaliya. Khu ndziya nyo fane, Nungungulu thumiside liphuvbo laye nya guage gasi gu leleteya valovi nya Bhibhiliya gu lova mapimo yaye. Liphuvbo la Nungungulu li va phaside khu dzindziya nyo hambanehambane, yimbe tepo li di gu va tuleya mapimo gasi va wona siwoniso mwendro gu va lorisa silo si nga ba si vbwetega gu lowa.

▸ Gip. 2, ndri. 5

Matshina nya milayo sihevbudzo si gomogo omu nya Bhibhiliya si tshamuseyago lisine nya litshina. Khu giyeyedzo, litshina li gu khilo “gidinga nya vathu nya guvivbedwe khu monyo gi ngu vivbisa mavbanyelo nya yadi” lo hi hevbudza gu khilo ava hi oloveyanago navo va ngu hi kutsedzeya gu gira silo nya sadi mwendro nyo vivbe. (1 Vakorinto 15:33) Nigu litshina li gu khilo “muthu ni muthu a na vbwera esi a  nga yalago” lo hi hevbudza gu khilo ethu kha hi kodzi gu vhika mihandro nya mithumo yathu. — Vagalatiya 6:7.

▸ Gip. 2, ndri. 12

Siprofeto mahungu ma tago khu ga Nungungulu. Mahungu yoyo ma nga thuga mata kha nga tshamuselo nya gugola ga Nungungulu, sihevbudzo nya mavbanyelo, sileletelo, mwendro malito nyo lamule. Ma ngata gambe kha nga malito ma ganeyago khu silo si na dugeleyago mindru wa tshigu. Omu nya Bhibhiliya gu na ni siprofeto nya singi si tadzisegidego.

▸ Gip. 2, ndri. 13

Jesu khuye enga a tadzisidego siprofeto nya singi sa omu nya Bhibhiliya si ganeyago khu Mesiya. Wona kwadru “ Siprofeto maningano ni Mesiya.”

▸ Gip. 2, ndri. 17, tsh. vbatshi.

Jehovha vangide mafu gasi ma khala ndranga nya paradhesi gasi gu tsakisa vathu va mu golago. Makungo yaya kha ma vbindrugedza. Nugunugu, Nungungulu a na fuvisa guvivba a bwe a ninga vathu vaye guvbanya kala gupindruga.

▸ Gip. 3, ndri. 1

Sathane khiyo ngilozi nyo pheye gu wugeya Nungungulu. O ranwa gu pwani Sathane, li gu lina li tshamuseyago gu khilo “Muganedzi,” kholu a dwanago ni Jehovha. O ranwa gambe pwani khu Dhiyabhulosi, esi si thulago gu khiso “Mulembi.” Thudwe lina leli kholu a ganeyago malipha khu Nungungulu ni olu a sengago vathu.

▸ Gip. 3, ndri. 4

Jehovha giride dzingilozi gale ngudzu na a si gu giri mafu. Dzi giredwe gu vbanya ndzadzini. Idzo dzomo khu tengo nyo vbindre lizana dzimiliyoni. (Dhaniyeli 7:10) Dzi na ni malina ni myonyo nyo hambanehambane, nigu dzingilozi nyo tumbege dzi ngu bomba gu khozedwa khu vathu kholu dzi ngu dzi nogisa. Dzi na ni siemo nyo hambanehambane nigu dzi ngu ningwa mithumo nyo hambanehambane gambe. Dzimwedzo dzakona dzi ningidwe gu thumeya mbeli nya gikhalo nya wufumu gya Jehovha, dzimbe dzo resa mahungu yaye ga vathu, dzimbe dzi vhikeya ni gu ninga sileletelo sithumi saye sa mafuni, dzi gira thumo waye nya gu kone ava va si girigu gugola gwaye, ni gu phasedzeya thumo nya gu tshumayele. (Dzindzimo 34:7; Gutuledwa 14:6; 22:8) Matshigu ma tago, dzi na patana ni Jesu dzi dwana nyimbi nya Harimagedhoni. — Gutuledwa 16:14, 16; 19:14, 15.

▸ Gip. 3, ndri. 5; Gip. 10, ndri. 1

Gighoho gyo thudwa ni gevbi hi gi pwago, hi gi dundrugeyago, mwendro gu gi gira, gi gorosago Jehovha ambari gu hambana ni gugola gwaye. Kha nga olu gighoho gi ghohago gupwanana gwathu ni Nungungulu, uye hi ningide milayo ni matshina nya milayo yi hi phasago gu mba ghoha khu nyagigwenye. Gupheyatunu nya silo, Jehovha giride satshavbo na si vbelede, ganiolu tepo Adhamu ni Evha va nga hatha gu diga gu engisa Jehovha, va di ghoha va bwe va luza guvbeleya. Va di gumba va bwe vafa, nigu anethu hi ngu gumba hi bwe hifa kholu hi nga thapedwa khu gighoho gya Adhamu.

▸ Gip. 3, ndri. 7; Gip. 5, ndri. 3

Go thudwa nyimbi ya Nungungulu yi na fuvisago litigo la Sathane ni guvivba gwatshavbo.

▸ Gip. 3, ndri. 13; Gip. 8, ndri. 18

Mufumo wa Nungungulu wufumu wu emisidwego khu Jehovha ndzadzini. Jesu Kristo khuye Pfhumu yakona. Matshigu ma tago, Jehovha a na thumisa Mufumo wowo gasi gu fuvisa guvbivba gwatshavbo. Mufumo wa Nungungulu wu na fumeya mafu.

▸ Gip. 3, ndri. 14

Nungungulu vangide Jesu na a si gu vangi gimbe gilo. Jehovha rumede Jesu mafuni gasi a ta feya vathu vatshavbo. Hwane nya gu ba Jesu a songidwe, Jehovha mu wuside khu gufani. Jesu olu khuye a fumago ndzadzini kha nga Pfhumu nya Mufumo wa Nungungulu.

▸ Gip. 4, ndri. 2

Bhibhiliya yi profetide matshigu nya gudugeleye ga Mesiya. Isoso si di hadzi girega mahegiso nya tepo yi ranwago pwani 69 dzisemana, yi gu eyi yi phedego khu mwaga nya 455 na ma si gu vbohi matshigu yathu (A.E.C.) yi bwe yi hegisa khu mwaga nya 29 matshiguni yathu (E.C.).

Ho dziti kharini gu khethu iyo yi hegiside khu mwaga nya 29 matshiguni yathu? Dzisemana dzodzo nya 69 dzi phede khu mwaga nya 455 A.E.C. tepo Nehemiya a nga vboha Jerusalema a bwe a pheya gu vbahedza lidhoropa lolo. (Dhaniyeli 9:25; Nehemiya 2:1, 5-8) Kha nga olu lito “dhuzya” li hi girago hi dundrugeya numeri 12, khu gufana lito “semana” lo hi dundrugisa numeri 7. Dzisemana nya giprofeto gegi khandri dzisemana nya 7 nya matshigu ganiolu dzisemana nya 7 myaga, khu guyelana ni nayo nya siprofeto nyo ninganise ‘litshigu limwedo ni mwaga rumba.’ (Mitengo 14:34; Ezekiyeli 4:6) Isoso so thula gu khiso semana mweyo ni mweyo yi na ni 7 myaga nigu 69 dzisemana dzo khala 483 myaga (69 x 7). Ho valeya 483 myaga gukhugeya 455 A.E.C., ho vboha mwagani nya 29 E.C. Jesu bhapatisidwe  mwagani wowo kamo a bwe a khala Mesiya! — Luka 3:1, 2, 21, 22.

Giprofeto gyogyo gya gimwegyo gi ganede khu yimbe semana, yi gu yimbe myaga nya 7. Ndrani nya tepo yoyo, Mesiya a di hadzi songwa khu mwaga nya 33 E.C., nigu gukhugeya mwagani nya 36 E.C., mahungu nya yadi nya Mufumo wa Nungungulu ma di hadzi tshumayedwa mayigoni gwatshavbo na siri ga vaJudha basi. — Dhaniyeli 9:24-27.

▸ Gip. 4, ndri. 7

Bhibhiliya yo hevbudza gu khiyo Jehovha Nungungulu khuye Muvangi nigu khuye a nga vanga Jesu na gu si girwi ni gilo gimwegyo. (Vakolosi 1:15, 16) Jesu khandruye Nungungulu nya Tshivba Yatshavbo. Kha thuga a dzi embeya gu khuye a ngu fana ni Nungungulu. Egi a nga ganeya khu lisine, khegi: “Babe khongolo gu nyi vbindra.” (Johane 14:28; 1 Vakorinto 15:28) Ganiolu dzitshetshe nyo khaguri dzo hevbudza gu khidzo Nungungulu o wumbwa khu vathu vararu avba nya moyo: Babe, Gyanana, ni liphuvbo nya guage. Lito “Vararu-moyo” li mwalo omu nya Bhibhiliya. Gihevbudzo gyogyo malipha.

Liphuvbo nya guage tshivba yi thumiswago khu Nungungulu, yi gu tshivba yi si wonegigo a yi thumiseyago gu gira khiyo gugola gwaye. Khandri muthu. Khu giyeyedzo, maKristo nyo pheye ma “di tala khu Liphuvbo nya Guage,” nigu Jehovha ganede gu khuye: “Nyi na tshisa liphuvbo langu vbatshani nya vathu vatshavbo.” — Mithumo 2:1-4, 17.

▸ Gip. 4, ndri. 12; Gip. 15, ndri. 17

Tepo maKristo nya lisine ma khozeyago Nungungulu, kha ma thumisi gihambano. Khu ginani?

1. Gihambano gi ngu thumiswa omu nya wukhozeli nya malipha gukhugeya gale. Matshiguni ya gale gi thumisidwe gasi gu khozeya tumbunuko ni omu nya sihena nya wuhedheni si yelanago ni sivbango nya wuvelegi. Ndrani nya 300 myaga nyo pheye hwane nya gufe ga Jesu, maKristo kha ma nga ba ma thumisa gihambano vbagukhozeyatunu gwawe. Hwane nya matshigu nyo laphe, Constantino, Pfhumu ya Roma, a di emisa gihambano kha nga gifungo nya wuKristo. Gifungo gyogyo gi thumisedwe gu zama gu gira vathu nya vangi va gola wuKristo. Ganiolu gihambano kha gya nga ba gi yelana ni Jesu Kristo ne vbadugwana. New Catholic Encyclopedia yo tshamuseya gu khiyo: “Gihambano gi  ngu manwa omu nya matimo nya tepo ya gale na wu si gu vbohi wuKristo gumogo ni omu nya matimo nya vathu va si rigu maKristo.”

2. Jesu khafa vbagihambanotunu. Malito nya giGreki ma vbindrugedzedwego “gihambano” mo thula ngudzungudzu “simbo nyo lulame,” “lidhera,” mwendro “simbo nyo vbanye.” The Companion Bible yari khiyo: “Omu nya giGreki nya [Testamenta nya Yiphya] gu mwalo gilo gi yeyedzago gu khigyo lito lolo li ngu tsanga li thula madhera mavili nyo hingakanywe.” Jesu fude vbasimbotunu nyo lulame.

3. Jehovha kha vbweti gu khuye hi thumisa sithombe gukhozeyani gwathu. — Ekisodha 20:4, 5; 1 Vakorinto 10:14.

▸ Gip. 5, ndri. 12

Jesu rumide vapizane vaye gu gira Gidundrugiso nya gufe gwaye. Vo gira isoso mwaga ni mwaga khu 14 nya Nisani, a gu litshigu leli vaIsrayeli va nga ba va dundruga khilo Phasika. Gibaba ni vhinyu, si emeyago mili ni novba wa Jesu, so vbindrisedwa vathu vatshavbo va gomogo Gidundrugisotunu. Avo va na fumago ni Jesu ndzadzini va ngu hodza gibaba va bwe va seya vhinyu yoyo. Ava va gu na ni gutumba nya gu vbanye kala gupindruga mafuni va ngu yeyedza githawo khu gu manega Gidundrugisotunu ganiolu kha va hodzi gibaba mwendro gu seya vhinyu.

▸ Gip. 5, ndri. 21

Omu nya Tradudução do Novo Mundo khu giNgiza, lito “hefemulo” lo tshamuseya 1) muthu, 2) girengo, mwendo 3) womi nya muthu mwendro nya girengo. Wona siyeyedzo si landreyago:

• Muthu. “Mihefemulo yatshavbo ya gu lumba eni; hefemulo wa babe gumogo ni wa gyanana ya gu lumba eni. Wule a na ghohago khuye a nafago.” (Ezekiyeli 18:4) Avba, lito “mihefemulo” lo thula vathu, kholu muthu khuye basi a ghohago mwendro gu gira guvivba.

•  Girengo. Omu ga Genesi 1:20, 24, Tradução do Novo Mundo yi na ni mitshamuselo ya vbavbatshi avba nya malito “sirengo nya guvbanye” eyi yi ninganisago hefemulo ni girengo: “Nungungulu a di khuye: ‘Matini gu na tale khu sirengo nya guvbanye [mihefemulo]: Sinyoni si na vbuvbe damboni.’ Nungungulu a di khuye: ‘Gu na manege sirengo nya guvbanye [mihefemulo], nya mafumbo ni mafumbo: Sifuyo, sirengo nya gukhwirire khu lididi, ni sirengo nya likhabi, khu mafumbo yawe.’ Gu di girega kharato.”

• Womi nya muthu mwendro nya girengo. Jehovha embede Mosi khuye: “Va fude vatshavbo va nga bani va bweta gu gu songa [mwendro “va nga bani va sota hefemulo wago,” tsh. vbatshi nya NM]” (Ekisodha 4:19) Tepo Jesu a nga ba a romo mafuni, ganede khuye: “Eni nyi muhavisi nya wadi. Muhavisi nya wadi a ngu ningela womi [“hefemulo,” tsh. vbatshi nya NM] khu gufela dzinvuta dzaye.” — Johane 10:11.

  Gu engedzeya avbovbo, tepo muthu a girago gilogyo khu ‘hefemulo waye watshavbo,’ so tshamuseya gu khiso o gira khu gugola gwaye ni makodzelo yaye yatshavbo. —  Matewu 22:37; Dhewuteronome 6:5.

▸ Gip. 6, ndri. 5; Gip. 15, ndri. 17

Malito nya giHebheru ni giGreki ma vbindrugedzedwego pwani “liphuvbo” omu nya Tradução do Novo Mundo khu giNgiza ma nga tshamuseya silo nyo hambanehambane. Ambari ulolo, tepo yatshavbo mo thula gilo gi si wonegigo ga vathu, nya nga phuvbo mwendro liphuvbo li hefemudwago khu vathu ni sirengo. Malito yoyo ma nga thula gambe vathu nya liphuvbo nya nga dzingilozi ni Nungungulu mwendro liphuvbo nya guage, li gu tshivba yi thumiswago khu Nungungulu. Bhibhiliya kha yi hevbudzi gu khiyo gyomo gipandre nya muthu gi simamago gi vbanya hwane nya gu ba a fude. — Dzindzimo 104:29; Matewu 12:43; Luka 11:13.

▸ Gip. 6, ndri. 5; Gip. 15, ndri. 17

Liphala nya nilo [Ghehena, NM] lina nya kova wu nga ba wu romo vbafuvbi ni Jerusalema omu gu nga ba gu vbisedwa umo ndzilo. Gu mwalo gilo gi yeyedzago gu khigyo dziteponi dza Jesu gu di gu tshaniswa mwendro gu vbiswa sirengo ambari vathu na va ngo vbanya kovani momo. Khu kharato Ghehena kha emeyi wulanga wu si wonegigo omu gu tshaniswago gu bwe gu vbiswa vathu nya gufe kala gupindruga. Tepo Jesu a nga ganeya khava va hongolago Ghehena, a di gu thula gufuviswa nyo vbeleye. — Matewu 5:22; 10:28.

▸ Gip. 7, ndri. 20

Nombelo wu giridwego khu Jesu tepo a nga ba a hevbudza vapizane vaye gu gombeya. Wo ranwa gambe pwani nombelo wa Babe Wathu mwendro nombelo nya giyeyedzo. Jesu hi hevbudzide gu gombeya kharati:

• “Lina lago li na rungudzwe [agiswe, NM]”

  Ho gombeya ga Jehovha gasi uye a agisa lina laye, mwendro wuzundzo waye, ga malipha yatshavbo. So vbwetega kharato gasi gu vatshavbo va gomogo ndzadzini ni mafuni va zundza ni gu ninga githawo lina la Nungungulu.

• “Mufumo wago wu nate”

  Ho gombeleya gu mufumo wa Nungungulu wu ta fuvisa litigo nyo vivbe la Sathane, wu fuma mafuni gwatshavbo, wu bwe wu vbindrugedza mafu ma khala Paradhesi.

• “Gudzina gwago gu na girege mafuni”

  Ho gombeleya gu makungo ya Nungungulu khu mafu ma tadzisega gasi gu ma tala khu vathu nyo engise, na va vbelede, ava va kodzago gu vbanya Paradhesini kala gupindruga, kha nga edzi Jehovha a nga ba a si vbwetide khidzo tepo a nga gira vathu.

▸ Gip. 8, ndri. 2

Gasi gu vbanyisa vathu gighohoni ni gufani, Jehovha hi ningide gudzegiswa. Gudzegiswa i tengo wu nga ba wu vbwetega gasi hi bweledzedwa womi nyo vbeleye wu nga luzwa khu muthu nyo pheye, Adhamu, ni gu wusedza wupari wa vathu ni Jehovha. Nungungulu rumede Jesu mafuni gasi a ta feya sighohi satshavbo. Khu kotani nya gufa ga Jesu, vathu vatshavbo va na ni lithomo nyo vbanye kala gupindruga va bwe va khala vathu nyo vbeleye.

▸ Gip. 8, ndri. 21; Gip. 9, ndri. 13

Giprofeto gi gu romo omu ga Dhaniyeli gipimo 4 gyo hi hevbudza gu khigyo Nungungulu a di hadzi emisa Mufumo waye khu 1914.

Giprofeto: Jehovha ningide Pfhumu Nabhukodhonosori ndroro nya giprofeto nya simbo nya wukhongolo wu nga ba wu kokidwe wu thega. Omu nya ndroro yoyo, gu diri ni likhetshe nya simbi ni sugu li nga ba li hungidwe avba nya tshina nya simbo gasi wu si thungi khu gitepwana gi ninganago “livbandre na sivili sikhati.” Hwane nya tepo yoyo simbo wu di hadzi thunga. — Dhaniyeli 4:1, 10-16.

Tshamuselo nya giprofeto: Simbo wo emeya wufumu wa Nungungulu. Khu myaga nya yingi, Jehovha thumiside dzipfhumu dzi nga ba dzi khala khu Jerusalema gasi gu fumeya litigo la Israyeli. (1 Dzikoronika 29:23) Ganiolu dzipfhumu dzodzo dzi digide gu tumbega, khavbovbo wufumu wadzo wu di hegisa. Jerusalema khungumudwe khu mwaga nya 607 A.E.C. Ugogo gu diri gupheya nya “livbandre na sivili sikhati.” (2 Dzipfhumu 25:1, 8-10; Ezekiyeli 21:25-27) Tepo Jesu a nga khuye, “Jerusalema gu na gandredzedwa khu va nya mayigo kala gi vbela gikhati gyawe,” a di gu ganeya khu “livbandre na sivili sikhati.” (Luka 21:24) Khu kharato “livbandre na sivili sikhati” kha sa vbeya tepo Jesu a nga ba a romo mafuni. Jehovha tumbiside gu  emisa Pfhumu guvbeyani nya “livbandre na sivili sikhati.” Wufumu wa Pfhumu yeyi nya yiphya, Jesu, wu di hadzi gu resa makategwa nya makhongolo ga vathu va Nungungulu mafuni gwatshavbo, kala gupindruga. — Luka 1:30-33.

Gulapha nya “livbandre na sivili sikhati”: “Livbandre na sivili sikhati” si dzegide 2.520 myaga. Ho valeya 2.520 myaga gukhugeya mwaga nya 607 A.E.C., so hi yisa mwagani nya 1914. Iyoyo khiyo tepo Jehovha a nga emisa Jesu, Mesiya, kha nga Pfhumu nya Mufumo wa Nungungulu ndzadzini.

Hi yi tugude kharini numeri yeyi nya 2.520? Bhibhiliya yari khiyo dzitepo dzitharu ni metado dzo ningana 1.260 matshigu. (Gutuledwa 12:6, 14) Khu kharato “livbandre na sivili sikhati” so bhanya guvili numeri yeyi, mwendro 2.520 matshigu. Matshigu yaya nya 2.520 khayo saye ni 2.520 myaga khu guya khu nayo nya siprofeto nya “litshigu limwedo kha nga mwaga.” — Mitengo 14:34; Ezekiyeli 4:6.

▸ Gip. 8, ndri. 23

Lito “ngilozi nya yikhongolo” lo thula “pfhumu nya dzingilozi.” Bhibhiliya yo ganeya khu ngilozi mweyo basi nya yikhongolo, nigu lina layo khu Migeli. — Dhaniyeli 12:1; Judha 9.

Migeli khuye Muthangeyi nya masotshwa ya Nungungulu nya dzingilozi nyo tumbege. Gutuledwa 12:7 wari khuye: “Migeli ni dzingilozi dzaye a di dwana ni mwamilambo, . . . gumogo ni dzingilozi dzaye.” Livru nya Gutuledwa yari khiyo Muthangeyi nya libutho la Nungungulu khu Jesu, khu kharato Migeli limbe lina la Jesu. — Gutuledwa 19:14-16.

▸ Gip. 9, ndri. 4

Lito leli lo thula tepo gu na dugeleyago sigiro nya sikhongolo mafuni na gu keneleya gitepwana gasi gu Mufumo wa Nungungulu wu fuvisa litigo la sathane. Malito nyo fane ni eli, nya nga “guhegisa nya litigo” ni tepo “a na tago [manegago,  NM] Mwamana wa muthu,” ma ngu thumiswa omu nya siprofeto nya Bhibhiliya gasi gu ganeya khu tepo yamweyo. (Matewu 24:3, 27, 37) “Matshigu nya guhegise” ma phede tepo Mufumo wa Nungungulu wu nga pheya gu fuma ndzadzini khu 1914 nigu ma na hegisa tepo li na fuviswago litigo la Sathane avba nya Harimagedhoni. — 2 Thimoti 3:1; 2 Pedro 3:3.

▸ Gip. 9, ndri. 5

Tepo Nungungulu a wusago vathu va nga ba va fude, isoso so ranwa pwani guwuga ga ava va fudego. Bhibhiliya yi ngu ganeya khu livbandre na guna guwuswa nya vathu khu gufani. Eliya, Elizewu, Jesu, ni Pawulo, vatshavbo vovo va wuside vathu va nga ba va fude. Siliwugiso soso si kodzegide basi khu tshivba ya Nungungulu. Jehovha tumbiside gu wusa “va nya gululama ni va nya sighoho” gasi va vbanya mafuni. (Mithumo 24:15) Bhibhiliya yi ngu ganeya gambe khu guwuswa gasi gu hongola ndzadzini. Ugo go girega tepo vale va hathidwego, mwendro gu todzwa, khu Nungungulu va wuswago khu gufani gasi gu ya vbanya ndzadzini gumogo ni Jesu. — Johane 5:28, 29; 11:25; Vafilipi 3:11; Gutuledwa 20:5, 6.

▸ Gip. 9, ndri. 13

Wudhemoni mwendro gu thumisa dzinyanga ni wuloyi gi-olovedzo nya mba gyadi nya gu zame gu ganeya ni maphuvbo, khu gukongoma mwendro khu gu thumisa mumbe muthu, nya nga nyanga, ndroyi, mwendro mufembi. Vathu va thumisago dzinyanga ni wuloyi vo gira isoso kholu va khodwago sihevbudzo nya malipha si gu khiso maphuvbo nya vathu ma ngu vbuluga gufa ma bwe ma khala sikono nya tshivba ngudzu. Madhemoni gambe ma ngu zama gu kutsedzeya vathu gu va si engisi Nungungulu. Gu sasuva khu gu thumisa dzinyeledzi, wutumbe, wungoma, wuloyi,  gufemba, ni gu thumisa dzitshivba nya madhemoni, aniso so gira gipandre nya wudhemoni. Silo nya singi nya nga dzilivru, dzirevhista, gu sasuva khu gu thumisa matshigu nyo velegwe khayo, dzifilimi, sithombe, ambari dzindzimo si ngu gira gu wudhemoni, wutumbe ni dzitshivba nya madhemoni si wonega nari silo nya mba vivba mwendro si tsakisago. Sihena nya singi nya madzingelo, nya nga dzimhamba, dzimisa, gu dundruga matshigu nya gufe, gu hambeya va nya gufa, ni simbe siolovedzo nya nga gu pileka ni girumbi, aniso si ngu gimbileyana ni gu thumisana ni madhemoni. Vathu va ngu oloveya gu thumisa dzimbangi tepo va zamago gu thumisa tshivba nya madhemoni. — Vagalatiya 5:20; Gutuledwa 21:8.

▸ Gip. 10, ndri. 10; Gip. 16, ndri. 4

Jehovha khuye Nungungulu nya Tshivba Yatshavbo, nigu khuye a nga gira mafu ni ndzadzi. (Gutuledwa 15:3) Khigyo gi girago gu a khala Mune nya silo satshavbo nigu na ni wufumu, mwendro tshivba, nyo fumeye sivangwa saye satshavbo. (Dzindzimo 24:1; Isaya 40:21-23; Gutuledwa 4:11) Uye girede milayo satshavbo a si vangidego. Jehovha na ni tshivba nyo emise vambe gasi gu khala dzipfhumu. Tepo hi mu haladzago hi bwe hi mu engisa, ho seketeya wufumu waye. — 1 Dzikoronika 29:11.

▸ Gip. 11, ndri. 10

Gupola mimba so thula gu songa gyanana gi si gu velegwigo khu nyagigwenye, na siri khu kotani nya gu dugedwe khu mhango mwendro khu gu giriswa khu givili nya muthu gyabune. Gukhugeya tepo gi manegago ndrani, gyanana khandri gipandre basi nya givili gya mamayi wakona. Gyanana mumbe muthu.

▸ Gip. 13, ndri. 5

Guthedwa novba mathumelo nya madwali avba gu duswago novba mwendro gimwegyo nya sipandre sawo nya sina khavba nya muthu mwendro khu ga gyombo egi wu nga ba wu sayisidwe umo wu thedwa givilini nya mumbe muthu. Sipandre nya sina nya novba khesi: plajima, dziglobhulu nyo fuviye, dziglobhulu nyo age, ni dziplaketa.

▸ Gip. 13, ndri. 13

Omu nya Bhibhiliya, lito “gulaya” kha li thuli gu tsayisa basi. Tepo hi laywago, ho leletedwa, hi hevbudzwa, hi bwe hi kawukwa. Jehovha gima kha tshanisi mwendro gu gireya xapi ava a va layago. (Mavingu 4:1, 2, NM) Jehovha a ngu ninga giyeyedzo nya gyadi ngudzu vavelegi. Gulaya a hi ningago gu ngu phasa ngudzu avba nya gu muthu a kala a gola gu laywa. (Mavingu 12:1) Jehovha a ngu gola vathu vaye, nigu a ngu va hevbudza. A ngu va ninga sileletelo si kawukago mawonelo nya mba yadi ni gu va hevbudza gu pimisa ni gu vbanya khu ndziya yi mu tsakisago. Ga vavelegi, gulaya go pata gu phasa sanana sawe gu pwisisa gu khiso khu ginani si yelago gu engisa. So thula gambe gu si hevbudza gu haladza Jehovha, gumogo ni gu gola Lito laye, li gu Bhibhiliya, ni gu pwisisa matshina yayo nya milayo.

▸ Gip. 14, ndri. 13

Madhemoni sivangwa nya liphuvbo si si wonegigo, nyo vivbe myonyo na siri ni tshivba nya yikhongolo ngudzu guvbindra vathu nya nyama. Madhemoni dzingilozi nyo vivbe. Dzi phede gu vivba myonyo tepo dzi nga dzi gira valala va Nungungulu khu gu mba mu engisa. (Genesi 6:2; Judha 6) Dzi di patana ni Sathane dzi wugeya Jehovha. — Dhewuteronome 32:17; Luka 8:30; Mithumo 16:16; Jakobe 2:19.

▸ Gip. 16, ndri. 4