1, 2. Ginani egi vathu nya vangi va wudzisago?

TSUNAMI yi ghohetede gidhoropana. Vaterorista va di vbisa tshetshe, va bayisa va bwe va songa vathu nya vangi. Cancro yi songide mamayi, a tshiya livbandre sanana.

² Tepo gu dugeleyago dzimhango nya nga idzodzo, vathu nya vangi va ngu wudzisa gu khavo, “Khu ginani?” Nya vangi va ngu wudzisa gu khavo khu ginani litigo li tadego ngudzu khu guvengana ni gutshaniseka. U ngu thuga u dzi wudzisa isoso?

3, 4. a) Khu sevbini siwudziso si giridwego khu Habhakuka? b) Jehovha mu phindrude kharini?

³ Omu nya Bhibhiliya, hi ngu hevbula gu khethu vathu va nga ba vari ni gukhodwa nya gukhongolo ga Nungungulu anavo va giride siwudziso soso. Khu giyeyedzo, muprofeti Habhakuka wudziside Jehovha khuye: “Khu ginani u nyi yeyedza guvivba, ni gu nyi wonisa tshanisa? Kholu gumbembiswa ni gusasedwa somo mbeli gwangu; vomo vambe va wusago mayunga ni guganedzisana” — Habhakuka 1:3.

⁴ Omu ga Habhakuka 2:2, 3, ho leri miphindrulo ya Nungungulu nya siwudziso sa Habhakuka ni gitumbiso Gyaye nyo lulamise makhalelo yoyo. Jehovha a ngu va haladza ngudzu vathu. Bhibhiliya yari khiyo: “Uye a ngu mi khathalela.” (1 Pedro 5:7) Ku lisine, Nungungulu a ngu swireka ngudzu khu gu wona gutshaniseka guvbindra edzi hi dzi pwago khidzo. (Isaya 55:8, 9) Khu kharato, hongoleni hi bhula khu giwudziso gi gu khigyo, Khu ginani gu gu na ni gutshaniseka nya gungi ngudzu tigoni?

5. Ginani gi ganedwago khu vahevbudzi nya vangi nya dzitshetshe maningano ni gutshaniseka? Ahati Bhibhiliya, ginani yi hevbudzago?

⁵ Vafundrisa, vapaderi, ni vahevbudzi nya dzitshetshe va ngu tala gu khavo vathu vo tshaniseka khu gugola ga Nungungulu. Vambe va nga khavo satshavbo si dugeleyago muthu, gupata dzimhango, sa guta na si hungidwe khu Nungungulu nigu ethu gima kha hi na nga si pwisisa gu khethu khu ginani. Vambe gambe va nga khavo vathu, gumogo ni sanana nya sidugwana, va gufa gasi va kodza gu ya khala ni Nungungulu ndzadzini. Ganiolu isoso khandri lisine. Jehovha gima kha kutsi gudugeleya nya silo nyo vivbe. Bhibhiliya yari khiyo: “Nungungulu kha tshuki a gira ugo guvivbidego, mwendro Nyadzitshivbe gu gira sighoho.” — Joba 34:10.

6. Khu ginani vathu nya vangi va solago Nungungulu khu kotani nya gutshaniseka gwatshavbo gu gomogo tigoni?

⁶ Vathu nya vangi va ngu sola Nungungulu khu kotani nya gutshaniseka gwatshavbo gu gomogo tigoni kholu vo pimisa gu khavo khu Nungungulu a fumeyago litigo. Ganiolu kha nga hi hevbudego omu nya Gipimo 3, mufumeli nya lisine nya litigo khu Sathane Dhiyabhulosi.

7, 8. Khu ginani gu gu na ni gutshaniseka nya gungi tigoni?

⁷ Bhibhiliya yari khiyo “litigo latshavbo lomo vbavbatshi nya tshivba ya Sathane.” (1 Johane 5:19) Mufumeli nya litigo leli, Sathane, muwugeli nigu gighevenga. Uye “mupembi nya litigo latshavbo.” (Gutuledwa 12:9) Vathu nya vangi vo pimedzeya uye. Nigu igyogyo gimwegyo nya sighelo si girago gu litigo li tala ngudzu khu malipha, guvengana ni wughevenga.

⁸ Somo simbe sighelo si girago gu gu manega ngudzu gutshaniseka tigoni. Hwane nyo ba Adhamu ni Evha va pandrugide, va thapedziside gighoho sanana sawe. Nigu khu kotani nya gighoho, vathu vo tshanisa vakwawe. Dzitepo  nya dzingi avo vo vbweta gu khala vathu nya lisima guvbindra vakwawe. Vo dwana, va wusa dzinyimbi, va bwe va thaviseya vambe. (Muhevbudzi 4:1; 8:9) Dzimbe dzitepo vathu vo tshaniseka khu kotani nya tepo ni silo nya mba si vireya. (Muhevbudzi 9:11, NM) Vathu vo tala gu dugeledwa khu dzimhango ni simbe silo nyo vivbe khu gu ba vari wulangani nya mba wadi khu tepo nya mba yadi gambe.

9. Khu ginani hi nga tiyisegago gu khethu Jehovha na ni gighelo nyo pwale nyo dzumeleye gutshaniseka gu simama?

⁹ Jehovha gima kha vangi gutshaniseka. Uye mwalo nandru nya nyimbi, wughevenga, ni gutshanisana. Nungungulu kha vangi dzimhango, nya nga sirevareva, singulu, ni dzindrambi. Ganiolu u nga dzi wudzisa gu khuwe, ‘A bari gu Jehovha na ni tshivba nya yikhongolo guvbindra vatshavbo mafuni ni ndzadzini, khu ginani a si emisigo silo soso nyo thise si giregago?’ Hi ngu dziti gu khethu Nungungulu a ngu hi khathaleya ngudzu, khu kharato si nga gira nari ni gighelo nyo pwale nyo dzumeleye gutshaniseka gu simama. — 1 Johane 4:8.

10. Sathane ganedzide kharini Jehovha?

¹⁰ Thembweni ga Edheni, Dhiyabhulosi kanganyiside Adhamu ni Evha. Sathane singedzide Nungungulu gu khuye khandri Mufumeli nya wadi. Uye a di khuye Nungungulu a di gu siheya gilo nya gyadi Adhamu ni Evha. Sathane a di gu vbweta gu khuye va khodwa gu khavo uye a di hadzi khala mufumeli nya tshukwana guvbindra Jehovha nigu kha va nga ba va yela gu engisa Nungungulu. — Genesi 3:2-5; wona Tshamuselo 27.

11. Giwudziso muni gi vbwetegago gu hi gi phindrula?

¹¹ Adhamu ni Evha va di diga gu engisa Jehovha va bwe va mu wugeya. Va di pimisa gu khavo va di gu ninganedwa khu gu dzi hatheya esi si lulamidego ni esi nya mba lulama. Jehovha yeyedzide kharini gu khuye vapandrugi  va di hosiside nigu uye a ngu siti esi si gu tshukwana gwathu?

12, 13. a) Khu ginani Jehovha a nga ne dzegeya gu fuvisa vapandrugi? b) Khu ginani Jehovha a nga dzumeleya Sathane gu khala mufumeli nya litigo leli? c) Khu ginani a nga diga vathu va dzi fuma?

¹² Jehovha kha dzegeya gu songa Adhamu ni Evha. Wulangani nya isoso, a di va dzumeleya gu velega sanana. Khavbovbo Jehovha a di gira malulamiselo nya gu sanana sa Adhamu ni Evha si kodza gu hatha oyu si nga ba si mu vbweta kha nga mufumeli waso. Makungo ya Jehovha ma diri nya gu litigo li tala khu vathu nyo vbeleye, nigu isoso khiso si na giregago ambari olu Dhiyabhulosi a zamidego gu gira saye. — Genesi 1:28; Isaya 55:10, 11.

¹³ Sathane ganedzide Jehovha mbeli nya dzimiliyoni nya dzingilozi. (Joba 38:7; Dhaniyeli 7:10) Khu kharato Jehovha ningide tepo Sathane gasi gu yeyedza gu khuye gusingedza gwaye gu diri lisine gani. Ningide gambe tepo vathu gasi gu va emisa mifumo yawe na va gu thangedwa khu Sathane gasi gu wona gu va na dugeleya gani nya mba na giphaso gya Nungungulu.

14. Ginani gi yago gi tugulega khu gugimbiya nya tepo?

¹⁴ Guningana magumi mazana myaga, vathu va guta na va zama gu dzi fuma khu vabune, ganiolu va ngu tandrega. Si ngu wonega gu Sathane muliphi. Vathu va ngu vbweta gu phaswa khu Nungungulu. Muprofeti Jeremiya ganede lisine tepo a nga khuye: “Uwe PFHUMU Nungungulu, eni nyi ngu dziti gukheni ndzila nya muthu yi mwalo tshivbani gwaye, gambe mwalo a kodzago gu lulamedza ndziya yaye.” — Jeremiya 10:23.

15, 16. a) Khu ginani Jehovha a dzumeleyago gutshaniseka khu tepo nyo laphe? b) Khu ginani Jehovha a si lulamisigo sigaradzo si vangwago khu Sathane?

¹⁵ Khu ginani Jehovha a dzumeleyago gutshaniseka gu  simama khu tepo nyo laphe? Khu ginani a si himbedzeyigo gudugeleya nya silo nyo vibhe? Si dzegide tepo gasi gu wonega gu Sathane tandregide gu khala mufumeli nya wadi. Vathu va ngu zama mafumelo nyo hambanehambane, ganiolu kha va dugeleyi. Ambari olu va yago va dandra khu siyensya ni tekinolojiya, gu na ni guvivba nya gungi, wusiwana, wughevenga, ni dzinyimbi guvbindra gale. Kha hi kodzi gu dzi fuma habune nya mba na Nungungulu.

¹⁶ Ambari ulolo, Jehovha kha lulamisi sigaradzo si vangwago khu Sathane. Nari khatshi a di gu si lulamisa, si di hadzi gira khatshi Nungungulu a ngu seketeya wufumu wa Sathane, ganiolu Uye kha na nga thuga a gira isoso. Nigu vathu va di hadzi khodwa gu khavo va nga dugeleya vo dzi fuma vabune. Ganiolu ayoyo malipha, nigu Jehovha na sa si seketeya isoso. Uye gima kha liphi. — Vahebheru 6:18.

17, 18. Ginani egi Jehovha a na girago khu guvivba gwatshavbo gogu gu vangwago khu Sathane?

¹⁷ Ina Jehovha a na kodza gu lulamisa satshavbo si ghohekidego khu kotani nya wupandrugi wa Sathane ni vathu? Ina. Ga Nungungulu, satshavbo si ngu kodzega. Jehovha a ngu liti litshigu gu na phindrudwago gusingedza gwatshavbo ga Sathane. Khu hwane a na gira mafu ma khala paradhesi, kha nga idzo si nga ba si vbwetegide khidzo gupheyani. Vatshavbo “va gomo marowoni” va na wuswa. (Johane 5:28, 29) Vathu gima kha va na nga dwala mwendro gufa. Jesu a na fuvisa guvivba gwatshavbo gu vangwago khu Sathane. Jehovha a na thumisa Jesu gasi gu “pfhungumula mithumo ya Sathane.” (1 Johane 3:8) Hi ngu bonga ngudzu kholu Jehovha a hi timiseyago ga tepo yeyi gasi hi kodza gu muti hi bwe hi hatha uye kha nga Mufumeli wathu. (Leri 2 Pedro 3:9, 10.) Ambari tepo hi tshanisekago, uye a ngu hi phasa gu timiseya. — Johane 4:23; leri Isaya 40:29.

 ¹⁸ Jehovha kha hi gurumedzi gu mu hatha kha nga Mufumeli wathu. Ningide vathu giningwa nya gudzihatheye. Hongoleni hi wone edzi giningwa gegi nya lisima gi hi thumeyago khidzo.

19. Giningwa muni nyo tsakise hi ningidwego khu Jehovha? Khu ginani gu vbwetegago gu hi bonga khu giningwa gyogyo?

¹⁹ Giningwa nyo tsakise gya Jehovha nya gudzihatheye gyo hi gira hi hambana ni sirengo. Iso so gimbidziswa khu tumbunuko waso, ganiolu ethu hi nga hatha edzi hi vbwetago gu vbanya khidzo hi bwe hi hunga gu khethu hi na thumeya Jehovha gani. (Mavingu 30:24-28) Nigu, kha hi fani ni mitshini yi girago basi esi yi rumidwego gu gira. Hi tshulegide gu dzi hatheya makhalelo yathu, ava hi va vbwetago nga dzipari dzathu, ni esi hi vbwetago gu gira khu womi wathu. Jehovha o vbweta gu khuye hi dzi buza khu guvbanya.

20, 21. Gilo muni nya gyadi u kodzago gu gi hatha olu?

²⁰ Jehovha o vbweta gu khuye hi mu haladza. (Matewu 22:37, 38) O fana ni babe a tsakago khu gupwa gyanana gyaye na gi gu ganeya na si khugeya monyoni khigyo “Nyi ngu gu haladza” na siri khu gu gi gurumedza. Jehovha hi ningide gutshulega nyo hathe gu hi na mu thumeya mwendro ne. Sathane, Adhamu, ni Evha va hathide gu bomba Jehovha. U na gi thumisa kharini giningwa gyago nya gudzihatheye?

²¹ Thumisa lithomo lago nya gudzihatheye gasi gu thumeya Jehovha. Gu na ni dzimbe dzimiliyoni nya vathu va hathidego gu tsakisa Nungungulu va bwe va bomba Sathane. (Mavingu 27:11) Ginani u na girago olu gasi u ta manega omu nya litigo nya liphya la Nungungulu tepo a na ta fuvisago gutshaniseka gwatshavbo? Gipimo gi landreyago gi na phindrula giwudziso gyogyo.