1-3. Siwudziso muni esi vathu va girago mayelano ni gufa nigu ina dzitshetshe dzo va phindrula kharini?

BHIBHILIYA yo hi tumbisa gu khiyo litshigu nyo khaguri “gima kha gu na manega gambe gufa.” (Gutuledwa 21:4) Omu nya Gipimo 5, hi hevbude gu khethu gudzegiswa go hi gira hi kodza gu mana guvbanya nyo pindruge. Ganiolu vathu va ngo simama gufa. (Muhevbudzi 9:5) Khu kharato, gimwegyo nya siwudziso nya lisima hi dzi girago khegi, Ginani gi hi dugeleyago tepo hi fago?

² Phindrulo nya giwudziso gyogyo wu na ni lisima ngudzungudzu tepo hi fedwago khu muthu hi mu golago. Yimbe tepo hi nga dzi wudzisa gu khethu: ‘Hongode hayi? Ina a ngu hi wona? A nga kodza gu hi phasa? Hi na thuga hi mu wona gambe?’

³ Dzitshetshe dzi ngu phindrula siwudziso soso khu dzindziya nyo hambanehambane. Dzitshetshe nyo khaguri dzo hevbudza gu khidzo wo ba uri muthu nya wadi, u na hongola ndzadzini nigu wo ba uri muthu nya mba wadi, wo hongoleya gu ya vbiswa. Dzimbe dzo ganeya gu khidzo muthu a gufa o khala nguluve a bwe a ya vbanya gumogo ni valongo vaye va fudego gale. Dzimbe gambe dzo ganeya gu khidzo hwane nyo ba u fude ni gu lamudwa, u na velegwa nya luphya, mwendro gu wuga u vbanya khu gimbe givili, yimbe tepo kha nga mumbe muthu ambari kha nga girengo.

4. Gilo muni gya gimwegyo egi dzitshetshe dzi gi hevbudzago khu gufa?

⁴ So gira khatshi dzitshetshe dzo hevhudza silo nyo hambane ngudzu. Ganiolu dzatshavbo dzo hevbudza gilo gya gimwegyo. Dzo hevbudza gu khidzo tepo muthu a fago, gu na ni gipandre gyaye gi simamago gu vbanya. Ina isoso lisine?

5, 6. Ginani gi hi dugeleyago tepo hi fago?

⁵ Jehovha a ngu giti egi gi hi dugeleyago tepo hi fago, nigu a ngu hi embeya gu khuye tepo muthu a fago, womi waye wo vbeya. Gufa so thula gu mba vbanya. Khu kharato, tepo muthu a fago, gudzipwa gwaye ni mapimo yaye kha si simami gu vbanya gambe wumbe wulanga. * Tepo hi fago kha hi kodzi gu wona, kha hi kodzi gupwa nigu kha hi kodzi gu pimisa gambe.

⁶ Pfhumu Solomoni lovide gu khuye “vale va fudego kha va pimi gambe gilo.” Ava va fudego kha va kodzi gu haladza mwendro gu venga nigu “phalani nya vafi . . . gu mwalo thumo, makungo, mapimo, ambari wugengeli nya gukari.” (Leri Muhevbudzi 9:5, 6, 10.) Nigu omu nya Dzindzimo 146:4, Bhibhiliya yo hi embeya gu khiyo tepo muthu a fago, ‘makungo yaye’ ma gufa.

7. Ginani egi Jesu a ganedego mayelano ni gufa?

⁷ Tepo pari yaye nya yadi, Lazaro, a fudego, Jesu a di embeya vapizane vaye khuye: “Pari yathu Lazaro a ngu lala.” Ganiolu Jesu kha nga ba a ganeya gu khuye Lazaro a di gu hefemula. Jesu engedzede khuye: “Lazaro fude.” (Johane 11:11-14) Khu ndziya yoyo Jesu a di fananisa gufa ni ligovbe. Uye kha ganeya gu khuye Lazaro hongode ndzadzini mwendro a diri gumogo ni valongo vaye va nga ba va fude gale. Kha ganeya gambe gu khuye Lazaro a di gu tshaniseka niloni ndzadzini mwendro a gu velegwa nya luphya kha nga muthu mwendro girengo. Khu lisine, si di gu fana ni gu ba Lazaro a lade ligovbe nya likhongolo ngudzu. Yimbe milowo yo fananisa gufa ni ligovbe nya likhongolo ngudzu. Bhibhiliya yari khiyo tepo Sitefane a nga songwa, “a di lala.” (Mithumo 7:60)

8. Ho dziti kharini gu khethu Nungungulu kha vanga vathu gasi va hegisa khu gufa?

 ⁸ Ina Nungungulu a di vanga Adhamu ni Evha gasi va hegisa khu gufa? Ahihi! Jehovha va vangide gasi va dzi buza khu guvbanya nyo pindruge ni womi nyo vbeleye. Tepo Jehovha a nga vanga vathu, va ningide gu dogoreya gu vbanya kala gupindruga. (Muhevbudzi 3:11) Vavelegi kha va vbweti gu wona sanana sawe na si gumba si bwe sifa, anuye Jehovha o dzipwa kharato khethu. Ganiolu, a bari gu Nungungulu hi vangide gasi hi vbanya kala gupindruga, khu ginani hi fago?

9. Khu ginani nayo wowu Jehovha a nga ba a ningide Adhamu ni Evha wu nga ba wu vbevbuga gu wu engisa?

⁹ Jehovha embede Adhamu thembweni ga Edheni khuye: “U na hodza mihandro nya misimbo yatshavbo nu tshulegide, aholu handro nya simbo nya guti guhambanisa silo nya sadi niso nyamba sadi, u nga wu hodzi. Kholu litshigu u na gu wu hodzago u nafa.” (Genesi 2:9, 16, 17) Nayo wowo nyo pwale gwadi kha wa nga ba wu garadza gu wu engisa, nigu Jehovha a di yede gu embeya Adhamu ni Evha esi si gu sadi ni esi nya mba sadi. Khu gu engisa Jehovha, na va yeyedzide gu khavo va ngu ninga githawo wufumu waye. Na va yeyedzide gambe edzi va nga ba va bonga khidzo silo sile a nga ba a va ningide.

10, 11. a) Sathane kanganyiside kharini Adhamu ni Evha? b) Khu ginani esi Adhamu ni Evha va giridego si gu mwalo gudivaledwa?

¹⁰ Egi gi si tsakisigo khu gu Adhamu ni Evha va di hatha gu mba engisa Jehovha. Sathane a di embeya Evha khuye: “Ina lisine nya gupwani Nungungulu a mi layide gukhuye, mu nga hodzini mihandro nya misimbo yatshavo ya thembweni, gani?” Evha a di hakha khuye: “‘Ahihi. Ethu hi ngu dzumedziswa gu hodza mihandro nya misimbo yatshavbo ya thembweni. Aholu, khu mahungu nya simbo wu gomogo vbakari ni vbakari nya lithembwe, Nungungulu a hi layide gukhuye: Mu nga wu hodzi, ambari gu wu kuha basi, mu ngafa.’” — Genesi 3:1-3.

¹¹ Khavbovbo Sathane a di khuye: “Kha mu na ngafa gilo! Aholu Uye Nungungulu a ngu dziti nya gukhuye, litshigu mu na gu wu hodzago, mu na tulega maho, mu khala kha nga Nungungulu; muti esi nya sadi ni esi nya guvbivbe.” (Genesi 3:4, 5) Sathane a di gu vbweta gu Evha a khodwa gu khuye a di hadzi gu kodza gu hunga abune esi si gu sadi ni esi nya mba sadi. Khu tepo yamweyo, liphide khesi si nga hadzi gu dugeleya o mba engisa. Sathane ganede gu khuye Evha kha na ngafa, khu kharato Evha a di hodza  handro, khu hwane a ninga mwama waye anuye a hodza. Adhamu ni Evha va di gu dziti gu khavo Jehovha a di va embede khuye va nga hodzi handro. Tepo va nga hodza, va di hatha gu mba engisa nayo nyo vbevbuge. Khu gu ba va hodzide, va yeyedzide gu khavo kha va nga ba va ninga githawo Babe wawe nya lihaladzo wa ndzadzini. Gu mwalo gudivaledwa khesi va giridego!

12. Khu ginani si gu gikhunguvanyiso olu Adhamu ni Evha va nga ne gu engisa Jehovha?

¹² Gu ba vavelegi vathu nyo pheye va sa engisa Muvangi wawe, si ngu khunguvanyisa! U di hadzi gu dzipwa kharini wo thuma khu gudzigaradza gasi gu dandrisa gyanana nya gikhwatana ni gimbe nya gyadzyana, khavbovbo iso si gu wugeya si bwe si si thumi esi u si rumago gu gira? Ina isoso na si si gu vbisisi monyo?

13. Jehovha a di vbweta gu khuye ginani tepo a nga khuye “u na bwelela gambe u gu khala kudzudzwane”?

¹³ Tepo Adhamu ni Evha va nga ne gu engisa, va di luza lithomo nyo vbanye kala gupindruga. Jehovha a di embede Adhamu khuye: “Uwe u kudzudzwane, u na bwelela gambe u gu khala kudzudzwane.” (Leri Genesi 3:19.) Si di gu thula gu khiso Adhamu a di hadzi gu khala kudzudzwane gambe, nga khatshi gima kha vangwa. (Genesi 2:7) Hwane nyo ba Adhamu a ghohide, a difa nigu a diri mwalo gambe.

14. Khu ginani hi fago?

¹⁴ Nari khatshi Adhamu ni Evha va di engiside Nungungulu, na va ngo vbanya kala muhuno. Ganiolu tepo va nga ne gu mu engisa, va di ghoha, va hegisa  khu gufa. Gighoho gyo fana ni madwali nyo thise hi ma manidego ga vavelegi vathu nyo pheye. Hatshavbo hi velegedwe gighohoni nigu khigyo gi hi girago hifa. (Varoma 5:12) Ganiolu ayoyo khandrayo makungo ya Nungungulu khu vathu. Nungungulu gima kha vbweta gu khuye vathu vafa nigu Bhibhiliya yari khiyo gufa “nala.” — 1 Vakorinto 15:26.

15. Lisine mayelano ni gufa lo hi tshula kharini?

¹⁵ Lisine mayelano ni gufa li ngu hi tshula ga sihena nya singi nyo vivbe. Bhibhiliya yo hi hevbudza gu khiyo ava va fudego kha vapwi guvbisa ambari wuvi. Kha hi kodzi gu ganeya navo, nigu anavo kha va khodzi gu ganeya ni ethu. Ethu kha hi kodzi gu phasa ava va fudego, nigu anavo kha va kodzi gu hi phasa. Kha va kodzi gu hi gireya guvivba, nigu khu kharato ethu hi mwalo gighelo nyo va thave. Ambari ulolo, dzitshetshe nya dzingi dzo hi embeya gu khidzo ava va fudego va ngu vbanya wulangawo nigu si nga kodzega gu hi va phasa ho livba dzitsapawu ga vapaderi mwendro ga vale va wonwago kha nga vathu nya guage. Ganiolu tepo hi tigo lisine mayelano ni gufa, kha hi kanganyiswi khu malipha yoyo.

16. Malipha muni wukhongeli nya wungi wu ma hevbudzago mayelano ni gufa?

¹⁶ Sathane o thumisa wukhongeli nya malipha gasi wu hi gira hi khodwa gu khethu ava va fudego va ngo vbanya. Khu giyeyedzo, wukhongeli nyo khaguri wo hevbudza gu khuwo tepo muthu a fago gyomo gipandre gi tshalago gi vbanya wumbe wulanga. Ina tshetshe yago yo gu hevbudza isoso, mwendro yo gu hevbudza esi Bhibhiliya yi si ganeyago khu vafudego? Sathane o thumisa malipha gasi gu hambanisa vathu ni Jehovha.

17. Khu ginani gihevbudzo nyo vbiswe vathu ndzadzini gi valago Jehovha?

¹⁷ Esi wukhongeli nya wungi wu si hevbudzago si ngu  thisa. Khu giyeyedzo, dzitshetshe nyo khaguri dzo hevbudza khidzo vathu nyo vivbe va na vbiswa ndzadzini kala gupindruga. Malipha yoyo ma ngu vala Jehovha. Uye gima na sa dzumeleya gu khuye vathu va tshaniswa khu ndziya yoyo! (Leri 1 Johane 4:8.) U di hadzi gu dzipwa kharini khu muthu a tsayisago gyanana khu gu gi vbisa mandza niloni? U di hadzi gu mu wona nga muthu nyo vivbedwe khu monyo. Nu si dzini ni gu muti. Isoso khiso furi esi Sathane a si vbwetago gu khuye hi sipwa khu Jehovha!

18. Khu ginani gu si vbwetegigo gu hi thava ava va fudego?

¹⁸ Dzimbe dzitshetshe dzo hi embeya gu khidzo tepo vathu va fago vo khala dzinguluve. Wukhongeli wowo wo hevbudza gu khuwo gu vbwetega gu hi yeyedza githawo hi bwe hi thava dzinguluve dzodzo kholu dzi ngu kodza gu khala dzipari dzathu nya dzikhongolo ngudzu mwendro valala nya xapi. Vathu nya vangi va ngu khodwa malipha yoyo. Olu va thavago va nya gufe, vo va khozeya vbavbandze nyo khozeye Jehovha. Dundruga gu khuwe ava va fudego kha va kodzi gupwa mwendro gu pimisa gilo, khu kharato kha hi yeli gu va thava. Jehovha khuye Muvangi wathu. Khuye Nungungulu nya lisine, nigu khu gighelo gyogyo hi yede gu khozeya uye enga. — Gutuledwa 4:11.

19. Ho phasega kharini khu guti lisine mayelano ni gufa?

¹⁹ Tepo hi tigo lisine mayelano ni gufa, ho tshudwa maliphani nya wukhongeli. Nigu lisine leli lo hi phasa gu pwisisa situmbiso nyo tsakise esi Jehovha a tumbisidego mayelano ni guvbanya gwathu ni wumindru wathu.

20. Ginani hi na hevbulago omu nya gipimo gi landreyago?

²⁰ Myaga nya yingi hwane, githumi gya Nungungulu nyo pwani khu Joba gi ganede khigyo: “Naripwani muthu a gufa, a ngu dzi kodza guwuga a vbanya gambe . . .” (Joba 14:14) Ina si ngu kodzega kamo gu muthu a fudego a wuga a vbanya gambe? Phindrulo hi ningwago khu Nungungulu omu nya Bhibhiliya wu ngu tsakisa ngudzu. Hi na wona gighelo gyakona omu nya gipimo gi landreyago.