1. Ginani u kodzago gu gi pimisa hwane nyo ba u hevbude gwadi livru yeyi?

U HEVBUDE lisine nya lingi nya Bhibhiliya gihevbuloni gyago nya livru yeyi, nya nga gitumbiso gya Nungungulu nya womi nyo pindruge, giemo gya ava va fudego, ni gutumba nya guwuswe ga ava va fudego. (Muhevbudzi 9:5; Luka 23:43, NM; Johane 5:28, 29; Gutuledwa 21:3, 4) Adzina u phede gu manega mitshanganoni nya Dzifakazi dza Jehovha nigu u ngu khodwa gu khuwe idzo dzi ngu khozeya khu ndziya nya lisine. (Johane 13:35) Si nga  girega nu phede gu gira wupari nya wukhongolo ni Jehovha, nigu adzina u dzi emisede gu mu thumeya. Ganiolu u nga pimisa kharati, ‘Ginani gi vbwetegago gu nyi gi gira olu gasi gu thumeya Nungungulu?’

2. Khu ginani mwama moyo nya muEtiyopi a nga vbweta gu bhapatiswa?

² Isoso khiso a nga ba a si pimisa mwama moyo nya muEtiyopi a vbanyidego dziteponi dza Jesu. Gitepwana hwane nyo ba Jesu a wusidwe, mupizane wa Jesu nyo pwani khu Filipi tshumayede mwama yoyo. Filipi mu yeyedzide gu khuye Jesu khuye Mesiya. Mwama wule nya muEtiyopi a di khuhwa ngudzu monyo khesi a hevbudego avba nya gu a dzegeya gu ganeya gu khuye: “Mati aya. Ginani gi nyi himbedzago gubhapatiswa?” — Mithumo 8:26-36.

3. a) Gileletelo muni egi Jesu a ningidego valandreli vaye? b) Gu vbwetega gu muthu a bhapatiswa kharini?

³ Bhibhiliya yo hevbudza gwadi khiyo wo ba u vbweta gu thumeya Jehovha, gu vbwetega gu u bhapatiswa. Jesu embede valandreli vaye gu khuye gu vbwetega gu mu “hevbudza mayigo yatshavbo, mu bhapatisa vathu.” (Matewu 28:19) Jesu nuye ningide giyeyedzo khu gu bhapatiswa. A di negwa givili gyatshavbo matini, na siri gu mitegedzedwa mati hungoni. (Matewu 3:16) Muhuno, tepo muKristo a bhapatiswago, gu vbwetega gu anuye a negwa givili gyatshavbo, mwendro gu bhobhomedzwa, matini.

4. Gubhapatiswa gwago go yeyedza ginani vambe?

⁴ Tepo u bhapatiswago, wo yeyedza vambe gu khuwe khu lisine u ngu dzina gu khala pari ya Nungungulu nigu u ngu dzina gu mu thumeya. (Dzindzimo 40:7, 8) Ganiolu si nga gira nu dzi wudzisa, ‘Ginani gi vbwetegago gu nyi gira gasi nyi bhapatiswa?’

5. a) Ginani gi vbwetegago gu u gi gira gupheya na u si gu bhapatiswi? b) Khu ginani mitshangano nya wuKristo yi gu ya lisima?

⁵ Na u si gu bhapatiswi, gu vbwetega gu uti Jehovha ni Jesu. U phede gu gira isoso khu gu hevbula Bhibhiliya. (Leri Johane 17:3.) Ganiolu isoso basi kha si eneyi. Bhibhiliya yari khiyo gu vbwetega gu u “guti guhaladza” ga Jehovha. (Vakolosi 1:9) Mitshangano nya Dzifakazi dza Jehovha yi na gu phasa gu khala pari nya yikhongolo ya Jehovha. Igyogyo gighelo nya lisima ngudzu nya gu u manega mitshanganoni yoyo tepo yatshavbo. — Vahebheru 10:24, 25.

6. Gu vbwetega guti Bhibhiliya kala hayi nu si bhapatiswi?

⁶ Khu lisine, Jehovha kha vireyi gu khuye uti satshavbo si gomogo omu nya Bhibhiliya na u si bhapatiswi. Kha vireya gu khuye mwama wule nya muEtiyopi ati satshavbo na si bhapatiswi. (Mithumo 8:30, 31) Nigu hi na simama gu hevbula khu Nungungulu kala gupindruga. (Muhevbudzi 3:11) Ganiolu gasi u bhapatiswa, gu vbwetega guti u bwe u dzumeya khu vbadugwana gakona sihevbudzo nya litshina nya Bhibhiliya. — Vahebheru 5:12.

7. Gihevbulo gyago nya Bhibhiliya gi gu phaside kharini?

⁷ Bhibhiliya yari khiyo: “Muthu nyamba khodwa kha dzi kodzi gutsakisa Nungungulu.” (Vahebheru 11:6) Khu kharato gu vbwetega gu u khodwa na u si gu bhapatiswi. Bhibhiliya yari khiyo vathu nyo khaguri va lidhoropani la Korinto va pwide esi valandreyi va Jesu va nga ba va hevbudza nigu, khavbovbo “va di khodwa, va gu bhapatiswa.” (Mithumo 18:8) Khu gufana, gihevbulo gyago nya Bhibhiliya gi ngu gu phasa gu khodwa situmbiso sa Nungungulu ni tshivba nya muphaso wa Kristo, wu kodzago gu hi vbulugisa gighohoni ni gufani. — Josuwa 23:14; Mithumo 4:12; 2 Thimoti 3:16, 17.

8. Ginani gi na gu kutsago gu bhuleya vambe esi u hevbulago?

⁸ Tepo u yago u hevbula nya singi omu nya Bhibhiliya u bwe u wona edzi yi gu phasago khidzo guvbanyani gwago, gukhodwa gwago gu na tiya ngudzu. U na dogoreya gu bhuleya vambe esi u hevbulago. (Jeremiya 20:9; 2 Vakorinto 4:13) Ganiolu, khu mani u yelago gu mu bhuleya?

9, 10. a) Khu vamani u kodzago gu pheya khavo gu va bhuleya esi u hevbulago? b) Ginani gi vbwetegago gu u gira wo ba u vbweta gu pheya gu tshumayela gumogo ni libandla?

⁹ Adzina u na vbweta gu bhula ni va ndrangani gwago, dzipari, vavhizinyu, ni sithumi-kwanu khesi u hevbulago. Isoso khyadi, ganiolu gira isoso khu ndziya nya yadi ni lihaladzo. Khu guhegisa, u na kodza gu tshumayela gumogo ni libandla. Tepo u dzipwago nu dongide gu gira isoso, u nga embeya Fakazi yeyi yi gu hevbudzago Bhibhiliya u bwe u yi embeya gu khuwe u ngu tsakeya gu hengeya thumoni nya gutshumayele gumogo ni libandla. Muthu yoyo o wona gu khuye u dongide nigu mavbanyelo yago ma ngu pwanana ni milayo nya Bhibhiliya, mwavavili mu na tshangana ni madhota mavili ya libandlani.

¹⁰ Ginani gi na dugeleyago tshanganoni wowo? Madhota ma na bhula nago gasi gu wona gu u ngu si pwisisa nigu u ngu khodwa sihevbudzo nya litshina nya Bhibhiliya, gu khayo u ngu si landrisa womini wago wa tshigu ni tshigu esi Bhibhiliya yi si ganeyago, nigu khu lisine u ngu dzina gu khala moyo nya Dzifakazi dza Jehovha gani. Dundruga gu khuwe madhota ma ngu khathala khu sivbango satshavbo nya libandla, gupata ni uwe nuwe, khu kharato u nga thavi gu ganeya nawo. (Mithumo 20:28; 1 Pedro 5:2, 3) Hwane nya tshangano wowo, madhota ma na gu embeya wo ba u ninganedwa khu gu pheya gu tshumayela gumogo ni libandla.

11. Khu ginani si gu sa lisima gu vbindrugedza mavbanyelo na u si gu pheyi gu tshumayela gumogo ni libandla?

 ¹¹ Madhota ma ngu kodza gu gu tshamuseya gu khayo gu vbwetega gu u vbindrugedza simbe womini wago na u si gu pheyi gu tshumayela gumogo ni libandla. Khu ginani si gu sa lisima gu vbindrugedza silo soso? Si ngu vbwetega kholu tepo hi bhuleyago vambe khu Nungungulu, ho emeya Jehovha nigu ho gurumedzega gu vbanya khu ndziya yi mu zundzago. — 1 Vakorinto 6:9, 10; Vagalatiya 5:19-21.

12. Khu ginani gu vbwetegago gu vathu vatshavbo va dzi laya?

¹² Somo simbe gambe si vbwetegago gu u gira na u si bhapatiswi. Mupostoli Pedro a di khuye: “Dzi layeni mu vbindrugedza mavbanyelo, gasi mufela gu tsetseledwa sighoho sanu.” (Mithumo 3:19) So thula ginani gu dzi laya? So thula gu dzi sola khu guvivba gu kodzegago gu ba hi gu giride. Khu giyeyedzo, a bari gu u di gu vbanya khu gu hengeya malawu nyo vivbe, gu na vbwetega gu u dzi laya. Nigu ambari wo ba u zamide womini wago watshavbo gu gira silo nya sadi, gu ngo vbwetega gu u dzi laya, kholu hatshavbo hi sighohi nigu gu vbwetega gu hi lomba gu divaledwa khu Nungungulu. — Varoma 3:23; 5:12.

13. So thula ginani gu “vbindrugedza mavbanyelo”?

¹³ Ina si ngu eneya basi gu dzi sola khesi u nga ba u gira? Ahihi. Pedro ganede gu khuye gu vbwetega gambe gu “vbindrugedza mavbanyelo.” Isoso so thula gu khiso gu vbwetega gu u diga yatshavbo mavbanyelo nyo vivbe u bwe u pheya gu gira silo nya sadi. Kha nga giyeyedzo, dzi dundrugeye nu gu endreya wulanga u pheyago gu hongola. Hwane nya tepo, u tugula gu khuwe wo thumisa ndziya yi si rigo iyo. Ginani u na girago? Kha si kanakanisi gu u na vbungula mazambo, u ema, u dzuwuluga, u  dzega ndziya yi gu iyo. Khu gufana, olu u hevbulago Bhibhiliya, u nga tugula gu khuwe gu na ni mavbanyelo nyo vivbe ma vbwetago gu u ma vbindrugedza womini wago. Dzi emiseye gu “vbindrugedza mavbanyelo” yoyo u bwe u pheya gu gira esi si lulamidego.

14. Wo dzi hendzeledza kharini ga Nungungulu?

¹⁴ Limbe lizambo nya likhongolo li vbwetegago na u si bhapatiswi gu dzi hendzeledza ga Jehovha. Tepo u dzi hendzeledzago ga Jehovha, wo gira nombelo, u tumbisa gu khozeya uye enga u bwe u thangisa gugola gwaye guvbanyani gwago. — Dhewuteronome 6:15, NM.

15, 16. Ginani gi kutsago muthu gu dzi hendzeledza ga Nungungulu?

¹⁵ Gu tumbisa gu thumeya Jehovha enga so fana ni gu tumbisa gu vbanya womi wago watshavbo ni muthu u mu haladzago. Nga dundrugeya mwama ni nyamayi va wudzanago. Tepo mwama a yago a muti gwadi nyamayi yoyo, o mu haladza a bwe a vbweta gu tshadha naye. Ambari olu isoso si gu silo si vbwetago gu pimiswa gwadi, mwama a ngu dzi emiseya gu dzumeya rwalo wowo kholu a ngu mu haladza.

¹⁶ Tepo u hevbulago khu Jehovha, wo mu haladza u bwe u vbweta gu gira satshavbo u si kodzago gasi gu mu thumeya. Isoso si na gu kutsa gu gira nombelo u tumbisa gu mu thumeya. Bhibhiliya yari khiyo ni wevbini a vbwetago gu landreya Jesu gu vbwetega gu a dzi “dige wurumba waye.” (Marko 8:34) So thula ginani isoso? So thula khiso gu vbwetega gu u thangisa gu engisa Jehovha guvbanyani gwago. Esi Jehovha a si vbwetago si na ni lisima ngudzu guvbindra gugola gwago ni makungo yago. — Leri 1 Pedro 4:2.

17. Ginani gi girago vambe vathu va si dzi hendzeledzi ga Jehovha?

¹⁷ Vambe vathu kha va dzi hendzeledzi ga Jehovha kholu vo thava gu khavo kha va na nga tadzisa gitumbiso gyawe nyo mu thumeye. Kha va vbweti gu khunguvanyisa Jehovha, nigu adzina vo pimisa gu khavo vo mba dzi hendzeledza gwaye, Jehovha kha na nga va rwega nandru khesi va girago.

18. Ginani gi na gu pahasago gu pala gu thava gu khunguvanyisa Jehovha?

¹⁸ Lihaladzo lago khu Jehovha li na gu phasa gu pala gwatshavbo guthava u gu nago nya gu mu khunguvanyise. Khu kotani nya olu u mu haladzago, u na gira ni gevbini gasi gu sayisa gitumbiso gyago. (Muhevbudzi 5:4; Vakolosi 1:10) Khu na nga si wona na si gu garadza ngudzu gu gira gugola ga Jehovha. Mupostoli Johane lovide gu khuye: “Kholu guhaladza Nungungulu khu gu sayisa milayo yaye; milayo yaye kha yi garadzi gu yi landrisa.” — 1 Johane 5:3.

19. Khu ginani si si vbwetegigo gu u thava gu dzi hendzeledza ga Jehovha?

¹⁹ Khu gurumedzegi gu khala muthu nyo vbeleye gasi gu dzi hendzeledza ga Jehovha. Gima kha vireyi gu khuye hi gira silo nyo vbindre esi hi si kodzago. (Dzindzimo 103:14) A na gu phasa gu gira gululama. (Isaya 41:10) Tumba Jehovha khu monyo wago watshavbo, “uye a na lulamisa dzindzila dzago.” — Mavingu 3:5, 6.

20. Hwane nyo ba u dzi hendzeledzide ga Nungungulu, khu gevbi gighava gi landreyago?

²⁰ Ina u dongide gu dzi hendzeledza ga Jehovha? Hwane nya gu dzi hendzeledze ga Jehovha, u dongide gu beleya gighava gi landreyago. Gu vbwetega gu u bhapatiswa.

21, 22. U nga “fakaza khu likana” gukhodwa gwago khu ndziya muni?

 ²¹ Embeya mutshanganisi nya huwo nya madhota ya libandlani lanu gu khuwe u dzi hendzeledzide ga Jehovha nigu wo vbweta gu bhapatiswa. Khavbovbo uye a na embeya madhota nyo khaguri gasi ma wusedza nago sihevbudzo nya litshina nya Bhibhiliya. Mo tiyisega gu khayo u dongide, ma na gu embeya gu khayo u nga bhapatiswa ga tshangano nya gipandre mwendro ga tshangano  nya mughanga wu landreyago nya Dzifakazi dza Jehovha. Tshanganoni wowo, gu na vegwa ganelo yi na ganeyago khu tshamuselo nya gubhapatiswe. Muganeli a vegago ganelo yoyo a na gira siwudziso sivili nyo vbevbuge ga vale va dongidego gu bhapatiswa. Khu gu phindrula siwudziso soso, u na “fakaza khu likana” gukhodwa gwago. — Varoma 10:10.

²² Khu hwane u na bhapatiswa. U na negwa givili gyatshavbo matini. Gubhapatiswa khugo gu na yeyedzago  vatshavbo gu khugo u dzi hendzeledzide ga Jehovha nigu olu u khade moyo nya Dzifakazi dza Jehovha.

23. So thula ginani gu bhapatiswa “khu lina la Babe, ni la Mwamana, ni la Liphuvbo nya Guage”?

²³ Jesu a di khuye vapizane vaye va di hadzi bhapatiswa “khu lina la Babe, ni la Mwamana, ni la Liphuvbo nya Guage.” (Leri Matewu 28:19.) So thula ginani isoso? So tshamuseya gu khiso u ngu dzumeya wuthangeli wa Jehovha ni thumo wa Jesu omu nya makungo ya Nungungulu gumogo ni edzi Nungungulu a thumisago khidzo liphuvbo laye nya guage gasi gu gira gugola gwaye. — Dzindzimo 83:18, NM; Matewu 28:18; Vagalatiya 5:22, 23; 2 Pedro 1:21.

24, 25. a) Gubhapatiswa go emeya ginani? b) Ginani hi na ganeyago khigyo omu nya gipimo gi landreyago?

²⁴ Gubhapatiswa go emeya gilo nya lisima ngudzu. Tepo u negwago matini, so tshamuseya gu khiso u fude ga mavbanyelo yago ya gale mwendro u ma tsukude. Tepo u dugago khu matini, u na pheya womi nya wuphya nya gu gire gugola ga Nungungulu. Isoso so yeyedza gu khiso u na thumeya Jehovha gukhugeya olu kala gupindruga. Dundruga gu khuwe khwa dzi hendzeledza ga muthu, ga hengeledzano, mwendro ga thumo nyo khaguri. U di hendzeledza womi wago ga Jehovha.

²⁵ Gudzihendzeledza gwago gu na gu phasa gu gira wupari nya wukhongolo ni Nungungulu. (Dzindzimo 25:14) Isoso kha si thuli gu khiso muthu a na vbanyiswa khu gu ba a bhapatisidwe basi. Mupostoli Pawulo lovide khuye: “Thumelani guvbanyiswa gwanu khu githawo ni gu dzi nogisa.” (Vafilipi 2:12) Gubhapatiswa maphelo basi. Ganiolu u nga khala kharini vbafuvbi ni Jehovha? Gipimo gi landreyago nya livru yeyi gi na phindrula giwudziso gyogyo.