1. Khu hayini hi kodzago guti gilogyo khu wumindru?

U DI nga tsanga u engiseya mahungu u wona nga khatshi ‘Silo sa guya mbeli si vivba?’ Gu na ni dzimhango nya dzingi ni xapi nya yingi avba nya gu vambe vathu va guya na va gu khodwa gu khavo hi womo vbafuvbi ngudzu ni guhegisa nya litigo. Ina lisine isoso? Ina yomo ndziya nya guti esi si na dugeleyago mindru wa tshigu? Yomo. Ambari olu vathu va si kodzigo guti esi si na dugeleyago mbeli, Jehovha Nungungulu a ngu siti. O thumisa Bhibhiliya gasi gu hi tivisa wumindru wathu ni wumindru nya litigo. — Isaya 46:10; Jakobe 4:14.

2, 3. Ginani egi vapizane va Jesu va vbwetidego gu giti, nigu Jesu va hakhide kharini?

² Guhegisa nya litigo hi gu manago ho leri Bhibhiliya, kha gu thudwi guhegisa nya dzundrugiso nya Mafu, ganiolu go tshamuseya guhegisa nya guvivba. Jesu hevbudzide vathu gu khuye Mufumo wa Nungungulu wu di hadzi gu fuma mafuni gwatshavbo. (Luka 4:43) Vapizane vaye va vbwetide guti gu khavo lini wu nga hadzi guta Mufumo wa Nungungulu, va bwe va mu wudzisa khavo: “Lini si na gu dugelelago satshavbo soso? Giwonegiso muni gi na gu tivisago guta [gumanega, NM] gwago ni guhegisa nya litigo?” (Matewu 24:3) Jesu kha va embeya litshigu la kona, ganiolu va embede esi si nga hadzi dugeleya na gu keneleya gitepwana gasi gu vboha guhegisa nya litigo leli. Esi Jesu a ganedego gu khuye si na dugeleya si ngu dugeleya olu.

³ Omu nya gipimo gegi hi na bhula khu sigiro si yeyedzago gu khiso hi womo vbafuvbi ngudzu ni guhegisa nya litigo. Gupheya, gu vbwetega gu hiti gu khethu gu  dugelede nyimbi ndzadzini gasi gu hi kodza gu pwisisa gighelo nya gu silo si vivba ngudzu mafuni momu.

4, 5. a) Ginani gi dugeledego ndzadzini hwane nyo ba Jesu a khade Pfhumu? b) Guya khu Gutuledwa 12:12, ginani gi nga hadzi dugeleya mafuni hwane nyo ba Sathane a rinyidwe vbavbatshi?

⁴ Omu nya Gipimo 8 hi hevbude gu khethu Jesu khade Pfhumu ndzadzini khu 1914. (Dhaniyeli 7:13, 14) Livru nya Gutuledwa yo hi embeya esi si dugeledego: “Khavbo li nga wuga litunga ndzadzini Migeli [si tshamuseyago, Jesu] ni dzingilozi dzaye a di dwana ni mwamilambo [Sathane], a nuye mwamilambo a di tsarama a dwana gumogo ni dzingilozi dzaye.” * Na va padwe avba nya nyimbi yoyo, Sathane ni madhemoni yaye va di rinywa vbavbatshi mafuni. Nga dundrugeya edzi dzingilozi dzi nga tsaka khidzo! Ganiolu, ahati vathu avba mafuni? Bhibhiliya yari khiyo gu di hadzi khala tepo nya gutshaniseke nya vathu. Khu ginani? Kholu Dhiyabhulosi gorogide ngudzu, “kholu a dzitigo nya gukhuye gikhati gyaye gidugwana ngudzu.” — Gutuledwa 12:7, 9, 12.

⁵ Dhiyabhulosi o gira ni gevbini a gi kodzago gasi gu vanga sigaradzo mafuni. Uye gorogide ngudzu kholu tshaledwe khu tepo nya yidugwana ngudzu na si gu fuviswi khu Nungungulu. Hongoleni hi wona esi Jesu a ganedego gu khuye si na dugeleya ndrani nya matshigu nyo hegise. — Wona Tshamuselo 24.

6, 7. Hi nga khethu ginani khu nyimbi ni ndzala muhuno?

⁶ Nyimbi. Jesu a di khuye: “Mayigo ma na wugelana; ni mifumo yakone yi na wugelana niyo.” (Matewu 24:7)  Muhuno gu ngu songwa vathu nya vangi ngudzu khu dzinyimbi guvbindra dzitepo dzi vbindridego. Moyo nya mibiko ya Instituto Worldwatch wo yeyedza gu khuwo gukhugeya 1914, dzinyimbi dzi songide vathu nyo vbindre 100 dzimiliyoni. Tengo nya vathu va songidwego khu dzinyimbi ndrani nya 100 myaga gukhugeya mwaga nya 1900 kala 2000 wu ngu vbindra guraru owu wa ava va songidwego ndrani nya 1.900 myaga hwane. Nga dundrugeya basi tshanisa ni wuvi wu pwidwago khu dzimiliyoni nya vathu khu kotani nya dzinyimbi!

⁷ Ndzala. Jesu a di khuye: “Dzi na manega dzindzala.” (Matewu 24:7) Ambari olu gu fumwago guhodza nya gungi guvbindra dzitepo dzi vbindridego, vathu nya vangi gima kha va hodzi va eneledwa. Khu ginani? Kholu va gu mwalo dzitsapawu nyo eneye gu renga guhodza mwendro kholu va gu mwalo sipeto nyo lime umo. Vathu nyo vbindre bhiliyoni mweyo muhuno vo vbanya khu dzitsapawu nya dzidugwana ngudzu tshigu ni tshigu. Organização Mundial da Saúde yari khiyo gu ngufa dzimiliyoni nya sanana mwaga ni mwaga, ngudzungudzu khu kotani nyo hamuge guhodza nya gwadi nyo eneye.

8, 9. Ginani gi yeyedzago gu khigyo esi Jesu a nga profeta maningano ni sirevareva ni madwali si ngu tadzisega?

 ⁸ Sirevareva. Jesu profetide khuye: “Si na manega sirevareva nya sikhongolo.” (Luka 21:11) Mwaga ni mwaga gu ngu viredwa sirevareva nya singi nya sikhongolo ngudzu. Gukhugeya mwaga nya 1900, gu fude vathu va vbindrago dzimiliyoni dzimbili khu kotani nya sirevareva. Ambari olu tekinolojiya yi phasago gu tugula sirevareva na si si gu giregi, vathu nya vangi va ngo simama gufa.

⁹ Madwali. Jesu profetide khuye gu na manega “mitungu.” Madwali nya mhango ma di hadzi phalalega khu guvbiredza ngudzu bwe khavbo ma songa vathu nya vangi. (Luka 21:11) Ambari olu vadhogodheya va hevbulago dzindziya nyo thume madwali nya mangi, gu ngo simama gu manega madwali nya mangi nya mba na rendre. Khu kharato, mubiko nyo khaguri wo tshamuseya gu khuwo mwaga ni mwaga dzimiliyoni nya vathu dzi ngufa khu madwali nya nga ndrere, malarya, ni kolera. Vbavbandze nya isoso, vadhogodheya va tugude 30 madwali nya maphya, nigu mambe yakona ma mwalo rendre.

10. O tadzisega kharini 2 Thimoti 3:1-5 muhuno?

¹⁰ Omu ga 2 Thimoti 3:1-5, Bhibhiliya yari khiyo: “Matshigu[ni] nya guhegise, gi na manega gikhati nya sigaradzo.” Mupostoli Pawulo tshamusede makhalelo nya vathu nya vangi va matshiguni nyo hegise. A di khuye vathu va na khala

• vamagundrele

• va nyo gole dzitsapawu

• va nya mba engisa vavelegi

• va nya mba tumbega

• va nya mba haladza va na gyawe

• va nya mba dzi phara

• va nya mayunga ni gudwanisa

• va nyo gole gudzitsakisa guvbindra Nungungulu

• va nyo pfhadze gu khavo va ngu mu haladza Nungungulu ganiolu na va bomba gu mu engisa

11. Guya khu Dzindzimo 92:7, ginani gi na dugeleyago vathu nyo vivbe?

¹¹ Ina vathu nya vangi va ngu yeyedza makhalelo yaya omu u vbanyago umo? Mafuni gwatshavbo, nya vangi va khade kharato. Ganiolu nugunugu Nungungulu a na gira gilogyo gasi gu fuvisa makhalelo yoyo. A ngu tumbisa gu khuye: “Vathu nya guvivbe ambari va dandra kha nga mwasi, vatshavbo  va thumago guvivba va andra, mahegiso yawe va na mbembiswa kala gupindruga.” — Dzindzimo 92:7.

12, 13. Ginani egi Jehovha a hi hevbudzago matshiguni yaya nyo hegise?

¹² Bhibhiliya yi profetide gu khiyo ndrani nya matshigu yaya nyo hegise, mafu ma na tala khu wuvi ni gutshaniseka. Ganiolu Bhibhiliya yi ngu ganeya gambe gu khiyo gu na girega silo nya sadi.

¹³ Bhibhiliya yi na pwisisega. Muprofeti Dhaniyeli lovide mayelano ni matshigu nyo hegise. A di khuye: ‘Guti nya lisine gu na tala ngudzu.’ (Dhaniyeli 12:4, NM). Nungungulu a ngu ninga vathu vaye wugengeli gasi va kodza gu pwisisa gwadi Bhibhiliya guvbindra gale. Jehovha phede gu gira isoso ngudzungudzu gukhugeya 1914. Khu giyeyedzo, hi hevbudzide lisima nya lina laye ni makungo yaye khu mafu gumogo ni lisine maningano ni gudzegiswa, esi si dugeleyago ha gufa, ni guwuswa ga va nya gufa. Hi ngu hevbula gu khethu Mufumo wa Nungungulu khuwo basi wu na kodzago gu vbedza sigaradzo sathu satshavbo. Hi ngu hevbula gambe gu khethu hi nga mana kharini gutsaka nigu hi nga vbanya kharini khu ndziya yi tsakisago Nungungulu. Ganiolu sithumi sa Nungungulu so si thumisa kharini esi va si hevbulago? Gimbe giprofeto gi na hi ninga phindrulo wakona. — Wona Mitshamuselo 21 ni 25.

14. Mo tshumayedwa hayini mahungu nya yadi nya Mufumo nigu khu vamani va ma tshumayelago?

¹⁴ Thumo nyo tshumayele mafuni gwatshavbo. Na gu ganeya khu matshigu nyo hegise, Jesu a di khuye: “Mahungu nya Yadi yaya nya Mufumo wa Nungungulu ma na huweledwa tigoni gwatshavbo.” (Matewu 24:3, 14) Mahungu nya yadi nya Mufumo ma ngu tshumayedwa mayigoni ma vbindrago 230 mafuni, khu malimi ma vbindrago 700. Dzifakazi dza Jehovha dzomo tigoni gwatshavbo, dza guta  khu ga “mayigo, mahundzu, . . . yatshavbo” dzi ngu phasa vathu vatshavbo gu pwisisa gu khavo ginani Mufumo wowu nigu ginani wu na gireyago vathu. (Gutuledwa 7:9) Vo gira thumo wowo nya mba hakha dzitsapawu. Ambari olu va vengwago ni gu tshaniswa khu vathu nya vangi kha nga olu Jesu a profetidego, gimwalo gi kodzago gu va digisa thumo wowu nyo tshumayele. — Luka 21:17.

15. a) Ina u ngu khodwa gu khuwe ho vbanya matshiguni nyo hegise? Khu ginani u khodwago isoso? b) Ginani gi na dugeleyago vale va engisago Jehovha ni vale va si mu engisigo?

¹⁵ Ina u ngu khodwa gu khuwe ho vbanya matshiguni nyo hegise? Siprofeto nya singi nya Bhibhiliya si ganeyago khu matshigu nyo hegise si ngu tadzisega. Nugunugu Jehovha a na emisa gutshumayedwa nya mahungu nya yadi, khavbovbo “guhegisa” gu na vboha. (Matewu 24:14) Ginani guhegisa? Go thudwa Harimagedhoni, yi gu tepo eyi Jehovha a na fuvisago guvivba gwatshavbo. Jehovha a na thumisa Jesu ni dzingilozi dzaye nya tshivba gasi gu fuvisa vatshavbo vale va bombago gu engisa Uye ni Gyanana gyaye. (2 Vatesalonika 1:6-9) Hwane nya isoso, Sathane ni madhemoni yaye kha va na nga kanganyisa gambe vathu. Nigu vatshavbo vale va dzinago gu engisa Nungungulu ni gu dzumeya Mufumo waye va na wona gutadzisega nya situmbiso satshavbo sa Nungungulu. — Gutuledwa 20:1-3; 21:3-5.

16. Kha nga olu guhegisa gu gomogo vbafuvbi ngudzu, ginani gi vbwetegago gu u gira?

¹⁶ Nugunugu litigo leli li fumwago khu Sathane li na fuva. Ganiolu gwadi ngudzu gu dzi wudzisa gu khethu, ‘Ginani gi vbwetegago gu nyi gira?’ Jehovha o vbweta gu khuye u simama gu hevbula esi si gomogo omu nya Bhibhiliya khavba u si kodzago khavbo. Gu vbwetega gu u khathaleya ngudzu gihevbulo gyago. (Johane 17:3) Semana ni semana Dzifakazi dza Jehovha dzo gira mitshangano gasi gu  phasa vathu gu pwisisa Bhibhiliya. Zama gu manega mitshanganoni yoyo tepo yatshavbo. (Leri Vahebheru 10:24, 25.) So lomba gu u vbindrugedza silo nyo khaguri tepo u hevbulago, u nga thavi gu gira isoso. Khu gu gira isoso, wupari wago ni Jehovha wu na tiya ngudzu. — Jakobe 4:8.

17. Khu ginani vathu nya vangi va na ta manwago khu guhegisa na va pfhade?

¹⁷ Mupostoli Pawulo tshamusede gu khuye gufuviswa ga va nyo vivbe gu na vboha kha “nga mbafa, vbakari nya wutshigu,” vathu nya vangi na va pfhade. (1 Vatesalonika 5:2) Jesu profetide khuye vathu nya vangi va na kanyisa siyeyedzo nyo khiso ho vbanya matshiguni nyo hegise. A di khuye: “Kha nga idzo gu nga giregago khidzo matshiguni ya Nowa, kharato nugo gu na girega litshigu a na tago Mwamana wa Muthu [mwendro, matshigu nyo hegise]. Na wu si gu dugi talo nya mati, vathu va di gu hodza ni gu sela; vama va di gu dzega, vanyamayi va di gu dzegwa, kala litshigu Nowa a nga belago litaroni. Kha va nga tugula gilo, kala gu vboha talo nya mati wu ngata va mwaladza vatshavbo. Kharato nugo gu na girega litshigu a na tago Mwamana wa Muthu.” — Matewu 24:37-39.

18. Gigengedzo muni egi Jesu a hi ningago?

¹⁸ Jesu hi gengedzide gu khuye kha si vbwetegi gu hi khala na hi pfhade “khu limidzo ni gu leva, . . . ni sigaradzo nya guvbanye.” A di khuye guhegisa gu na vboha khu githugedza, “kha nga naphwi.” Ganede gambe khuye ugo gu nata “vbakari nya vathu vatshavbo, va mafuni.” Khavbovbo a di engedzeya khuye: “Khalani na mu dongide, na mu gu lombelela gikhati gyatshavbo, gasi mu mane tshivba nya guvbuluge ga satshavbo si na gu dugelelago, mu kodza guta manwa khu Mwamana wa Muthu na mu nga tsaramide.” (Luka 21:34-36) Khu ginani si gu na ni lisima ngudzu gu engisa gigengedzo gya Jesu? Khugu nugunugu litigo nyo vivbe la Sathane li na fuviswa. Gu na vbuluga basi vale va na dzumeledwago khu Jehovha ni Jesu gu vbanya mafuni nya maphya kala gupindruga. — Johane 3:16; 2 Pedro 3:13.