1, 2. Siwudziso muni esi vathu va oloveyago gu gira?

SANANA si ngu gira siwudziso nya singi. U nga si tshamuseya gilogyo, ganiolu si vbedza khiso, ‘Khu ginani?’ Tepo u pimago gu si ninga tshamuselo, si nga tsanga si gu wudzisa gambe khiso, ‘Ganiolu khu ginani?’

² Gani hi sanana mwendro hi vakhongolo, hatshavbothu hi na ni siwudziso. Si nga girega na hi gu dzi wudzisa gu khethu ginani hi na hodzago mwendro hi na ambalago ambari gu renga. Mwendro hi na ni siwudziso nya lisima ngudzu nyo yelane ni guvbanya ambari mindru wa tshigu. Ganiolu ho mba mana miphindrulo yi pwisisegago nya siwudziso sathu, hi nga thuga hi diga gu yi vbwetedzeya.

3. Khu ginani vathu nya vangi va pimisago gu khavo kha si kodzegi gu mana miphindrulo nya siwudziso sawe nya lisima?

³ Ina Bhibhiliya yi nayo miphindrulo nya siwudziso nya lisima hi si girago? Vathu nya vangi adzina vo pimisa kharato, ganiolu vo wona khatshi Bhibhiliya yi ngu garadza ngudzu gu yi pwisisa. Adzina vo pimisa gu khavo vahevbudzi ni vapaderi basi va gu nayo miphindrulo yakona. Nigu vambe vo khala dzitshoni gu dzumeya gu khavo kha va yiti miphindrulo. Uwe ke, wo si wona kharini?

4, 5. Siwudziso muni nya lisima u gu naso? Khu ginani gu vbwetegago gu u simama gu vbwetedzeya miphindrulo yakona?

⁴ Gudzina saye u ngu vbweta miphindrulo nya siwudziso nya nga esi: Khu ginani nyi velegidwego? Ginani gi na nyi giregeyago tepo nyi na fago? Khade kharini Nungungulu? Muhevbudzi nya khongolo, Jesu, a di khuye: “Lombani, mu na ningwa; vbwetani, mu na si mana; khokhothani, mu na tuledwa.” (Matewu 7:7) U nga digi gu vbwetedzeya kala u mana miphindrulo nyo tumbege.

⁵ Khu lisine, wo simama “gu vbweta,” u na yi mana  miphindrulo omu nya Bhibhiliya. (Mavingu 2:1-5) Miphindrulo yakona kha yi garadzi gu yi pwisisa. Esi u na si hevbulago si na gu gira u vbanya womi nyo tsakise olu ni gu mana wumindru nyo tsakise. Hongole hi bhule khu giwudziso gimwegyo gi garadzago vathu nya vangi.

6. Khu ginani vambe vathu va gu khavo Nungungulu kha khathali khu gutshaniseka gwawe?

⁶ Vathu nya vangi vo pimisa gu khavo Nungungulu kha hi khathaleyi. Vari khavo nari pwani Nungungulu khu lisine a di gu khathala, mafu na ma sa khala kharati. Hi ngu wona dzinyimbi, guvengana ni wusiwana mafuni gwatshavbo. Vathu va ngu dwala, va tshaniseka va bwe vafa. Vambe va ngu wudzisa gu khavo, ‘Nungungulu o ba a hi khathaleya, khu ginani a si fuvisigo gutshaniseka gwatshavbo gogu?’

7. a) Vathangeyi nya dzitshetshe vo va hevbudza kharini vathu gu khavo Nungungulu vivbedwe khu monyo? b) Khu ginani hi tiyisegago gu khethu Nungungulu mwalo nandru khu silo nyo vivbe si dugeleyago?

⁷ Vathangeyi nya dzitshetshe dzimbe dzitepo va ngu gira vathu va khodwa gu khavo Nungungulu vivbedwe khu monyo. Go dugeleya gilo nyo vivbe, vari khavo gugola ga Nungungulu. Pwani a di dzina gu khuye gi dugeleya. Tepo va ganeyago kharato, khu lisine vo rwega nandru wakona Nungungulu. Ganiolu Bhibhiliya yo hevbudza gu khiyo Nungungulu gima kha giri guvivba. Jakobe 1:13 o hi embeya gu khuye Nungungulu kha lingi muthu khu silo nyo vivbe. Wari khuye: “Muthu a gu lingwa a nga ganeli khuye: ‘Khu Nungungulu a nyi lingago.’ Nungungulu kha dzi kodzi gu lingwa khu guvivba, gambe kha lingi muthu.” Isoso so tshamuseya gu khiso ambari olu Nungungulu a si himbedzeyigo gudugeleya nya silo nyo vivbe, uye gima kha giri silo soso. (Leri Joba 34:10-12.) Hongole hi wone giyeyedzo.

8, 9. Khu ginani si vivbidego gu rwega nandru Nungungulu khu sigaradzo sathu? Ninga giyeyedzo.

 ⁸ Nga dundrugeya khu lidzaha li vbanyago ni vavelegi valo. Babe walo a ngu li gola ngudzu nigu a li hevbudzide dzindziya nyo hunge makungo nya yadi. Khavbovbo, lidzaha li pandruga li khuga ndrangani. Li ya gira silo nyo vivbe, li thegeya sigaradzoni. Ina u na rwega nandru babe walo khu silo nyo vivbe si dugeleyago lidzaha lolo kholu a nga ne gu li himbedzeya gu khuga ndrangani? Khu lisine ne! (Luka 15:11-13) Gu fana ni babe yoyo, Nungungulu kha himbedzeya vathu tepo va hathidego gu pandruga ni gu gira silo nyo vivbe. Khu kharato go dugeleya sigaradzo, gu vbwetega gu hi dundruga gu khethu khandri Nungungulu a girago gu si dugeleya. Si vivbide gu rwega nandru wowo Nungungulu.

⁹ Gyomo gighelo nyo pwale ngudzu gi girago Nungungulu a si himbedzeyi gudugeleya nya silo nyo vivbe kala olu. Omu nya Gipimo 11 u na hevbula esi Bhibhiliya yi si tshamuseyago khisoso. Ganiolu tiyisega gu khuwe Nungungulu a ngu hi haladza nigu uye gima mwalo nandru khu sigaradzo sathu. Khu lisine, Uye khuye enga a gu na ni tshivba nyo si lulamise. — Isaya 33:2.

10. Khu ginani hi kodzago gu tiyisega gu khethu Nungungulu a na lulamisa satshavbo si ghohetedwego khu vathu nyo vivbe myonyo?

¹⁰ Nungungulu agide. (Isaya 6:3) Satshavbo a girago si lulamide, si agide nigu khyadi. Khu kharato hi ngu kodza gu mu tumba. Vathu nya nyama kha va khala kharato. Dzimbe dzitepo va ngu gira silo nyo vivbe. Nigu ambari mufumeli a lulamidego guvbindra vatshavbo mwalo tshivba nyo lulamise satshavbo si ghohetedwago khu vathu nyo vivbe myonyo. Mwalo a gu na ni tshivba nya yikhongolo nya nga eyi Nungungulu a gu nayo. Uye a ngu si kodza nigu a na lulamisa satshavbo si ghohetedwego khu vathu nyo vivbe myonyo. A na fuvisa guvivba gwatshavbo kala gupindruga. — Leri Dzindzimo 37:9-11.

11. O dzipwa kharini Nungungulu khu gutshaniseka gwago?

¹¹ O dzipwa kharini Nungungulu tepo a wonago esi si giregago mafuni ni esi si gu dugeleyago? Bhibhiliya yo hevbudza gu khiyo Nungungulu a ngu “gola gululama.” (Dzindzimo 37:28) Khu kharato uye a ngu khathala ngudzu khu silo nyo lulame ni esi nyo vivbe. A ngu venga gu wona vathu na va tshaniseka. Bhibhiliya yari khiyo monyo waye wu di “swihala ngudzu” tepo a wonidego mafu ya gale na ma tade khu guvivba. (Genesi 6:5, 6) Nungungulu kha vbindrugedza. (Malakiya 3:6) Bhibhiliya yari khiyo khu lisine Nungungulu a ngu khathala khedzi u dzi pwago khidzo. — Leri 1 Pedro 5:7.

12, 13. a) Khu ginani hi haladzago hi bwe hi khathaleya vambe, nigu ho dzipwa kharini khu gutshaniseka gu gu romo mafuni? b) Khu ginani hi tiyisegago gu khethu Nungungulu a na fuvisa gutshaniseka ni guvivba gwatshavbo?

¹² Bhibhiliya yi ngu tshamuseya gambe gu khiyo Nungungulu hi giride khu mufananiso waye. (Genesi 1:26) Isoso so tshamuseya gu khiso Nungungulu hi giride na hiri ni makhalelo nya yadi nya nga aya a gu nawo. Khu kharato wo ba u garadzega khu gu wona vathu nya mba na nandru na va gu tshaniseka, dziti gu khuwe Nungungulu a ngu tshaniseka ngudzu khiso guvbindra uwe! Ho siti kharini isoso?

¹³ Bhibhiliya yo hi hevbudza gu khiyo “Nungungulu lihaladzo.” (1 Johane 4:8) Satshavbo esi Nungungulu a si girago so kutswa khu lihaladzo. Khu kharato ethu hi ngu haladza kholu Nungungulu a haladzago. Nga pimisa khesi: Nari pwani u diri ni tshivba, ina u di hadzi gu fuvisa gutshaniseka ni guvivba gwatshavbo mafuni? Khu lisine nu gu fuviside, kholu u ngu haladza vathu. Ahati Nungungulu ke? Uye na ni tshivba, nigu olu a hi haladzago, a na fuvisa gutshaniseka ni guvivba gwatshavbo. Tiyisega gu  khuwe satshavbo situmbiso si khumbugidwego gupheyani nya livru yeyi khu lisine si na tadzisega! Ganiolu gasi gu tumba situmbiso sesi, gu vbwetega gu uti simbe khu Nungungulu.

14. Khu levbini lina la Nungungulu, nigu ho dziti kharini gu khethu gu vbwetega gu hi li thumisa?

¹⁴ Wo vbweta gu gira wupari ni muthu, ginani u oloveyago gu pheya khigyo u mu embeya? Lina lago. Ina Nungungulu na ni lina? Dzitshetshe nya dzingi dzari khidzo lina laye khu Nungungulu mwendro khu Pfhumu, ganiolu ayoyo kandri malina. Malito basi ma tshamuseyago esi a gu iso, gu fana ni “mufumeli” mwendro “muthangeyi.” Nungungulu hi embede gu khuye lina laye khu Jehovha. Dzindzimo 83:18, omu nya Tradução do Novo Mundo, yari khiyo: ‘Va na dziti gu khavo uwe, u gu ni lina Jehovha, khuwe wenga u Khugegidego Ngudzu mafuni gwatshavbo.’ Valovi nya Bhibhiliya va thumiside lina la Nungungulu khu gipimo nya magumi mazana dzinyondro. Jehovha o vbweta gu khuye uti lina laye u bwe u li thumisa. O gu embeya lina laye gasi u kodza gu khala pari yaye.

15. Lo tshamuseya ginani lina Jehovha?

¹⁵ Lina la Nungungulu, Jehovha, li na ni tshamuselo nyo ete. Lo tshamuseya gu khilo Nungungulu  a ngu kodza gu tadzisa ni gevbini gitumbiso a gi girago nigu a ngu kodza gambe gu tadzisa makungo yaye. Kha tandrwi khu gilo. Khu Jehovha enga a kodzago gu manega ni lina leli. *

16, 17. Khu wevbini tshamuselo nya: a) “nya Tshivba Yatshavbo”? b) “Pfhumu nya gupindruge”? c) “Muvangi”?

¹⁶ Kha nga hi si wonidego, Dzindzimo 83:18 yo ganeya esi khu Jehovha: ‘Khuwe wenga u Khugegidego Ngudzu.’ Nigu, Gutuledwa 15:3 wari khuye: “Pfhumu Nungungulu,  nya Tshivba Yatshavbo, sigiro sago sikhongolo, si ngu liwugisa! Dzindzila dzago dzi lulamide, dzi na ni lisine, uwe Pfhumu nya [gupindruge, NM].” Mo tshamuseya ginani malito “nya Tshivba Yatshavbo”? Mari khayo Jehovha na ni tshivba nya yikhongolo guvbindra ni wevbini muthu ndzadzini ni mafuni. Nigu malito “Pfhumu nya gupindruge” mo tshamuseya gu khayo uye mwalo maphelo ambari mahegiso, womo tepo yatshavbo. Dzindzimo 90:2 yo tshamuseya gu khiyo uye womo gukhugeya gupindruga kala gupindruga. Ina isoso kha si samadzisi?

¹⁷ Khu Jehovha basi a gu Muvangi. Gutuledwa 4:11 wari khuye: “Pfhumu Nungungulu wathu, u ngu yedwa khu gu hakha gidhumo, ni rungudzo ni tshivba, kholu khuwe Muvangi nya silo satshavbo; khu gudzina gwago u si vangide ni gu si tumbulugisa.” Khu lisine, gukhugeya ga dzingilozi ndzadzini, dzinyeledzi vbatshani, mihandro misimboni, kala ga dzindzandzi linene — khu Jehovha a giridego silo satshavbo u kodzago gu si dundrugeya!

18. Khu ginani vathu va pimisago gu khavo gima kha va na si kodza gu khala dzipari dza Nungungulu? Ginani egi Bhibhiliya yi gi ganeyago khisoso?

¹⁸ Tepo vathu va lerigo khu makhalelo nyo samadzise ya Jehovha, vo khala hwanga ni gu bwe va pimisa gu khavo, ‘Nungungulu na ni tshivba nya yikhongolo, khugegide ngudzu nigu womo hwindzo ngudzu, si nga kodzega kharini gu a nyi khathaleya?’ Ganiolu ina Nungungulu kamo o vbweta gu khuye hi dzipwa kharato? Ne vbadugwana. Nungungulu o vbweta gu khala vbafuvbi ni ethu. Bhibhiliya yari khiyo Nungungulu “mwalo hwindzo ga moyo ni moyo nya ethu.” (Mithumo 17:27) Nungungulu o vbweta gu khuye u hidzimeya gwaye, nigu a ngu tumbisa gu khuye “uye nuye a na mi hidzimelela.” — Jakobe 4:8.

19. a) U nga si kodza kharini gu khala pari ya Nungungulu? b) Khu mevbini makhalelo ya Jehovha u ma golago ngudzu?

¹⁹ U nga si kodza kharini gu khala pari ya Nungungulu? Jesu a di khuye: “Guvbanya nya gupindruge khogu: vati uwe basi kha nga Nungungulu nya lisine, ni guti Jesu Kristo, a gu uye u nga mu rumelago.” (Johane 17:3) Simama gu hevbula, u nati Jehovha ni Jesu. Nigu guvbindra isoso u nga mana guvbanya nya gupindruge. Khu giyeyedzo, hi hevbude gu khethu “Nungungulu lihaladzo.” (1 Johane 4:16) Ganiolu, uye gambe na ni mambe makhalelo nya mangi nya yadi. Bhibhiliya yo hi embeya gu khiyo Jehovha muthu nya “wuhindzi ni gupwela wusiwana; a hwelago gu goroga, a tadego khu wuwadi ni [lisine, NM].” (Ekisodha 34:6) Jehovha ‘khwadi, a ngu tsetseleya.’ (Dzindzimo 86:5) Nungungulu na ni gutimiseya nigu tumbegide. (2 Pedro 3:9; Gutuledwa 15:4) Tepo u lerigo Bhibhiliya, u na hevbhula nya singi si yelanago ni makhalelo yaye nya yadi.

20-22. a) Hi nga dzipwa kharini na hiri vbafuvbi ni Nungungulu na hi si kodzi gu mu wona? b) Ginani gi vbwetegago gu u gi gira wo kutsedzedwa khu vambe gu diga gu hevbula Bhibhiliya?

²⁰ U nga dzipwa kharini nuri vbafuvbi ni Nungungulu  nu si kodzi gu mu wona? (Johane 1:18; 4:24; 1 Thimoti 1:17) Tepo u lerigo khu Jehovha omu nya Bhibhiliya, u na muti kha nga Muthu nya lisine. (Dzindzimo 27:4; Varoma 1:20) Tepo u yago u hevbula ngudzu khu Jehovha, u na mu haladza kamo ngudzu u bwe u dzipwa nu romo vbafuvbi ngudzu naye.

²¹ U na pwisisa gu khuwe Jehovha Babe wathu. (Matewu 6:9) Hi ningide womi, nigu o vbweta gu khuye hi vbanya gwadi khavba si kodzegago khavbo. Isoso khiso babe nya lihaladzo a vbweteyago sanana saye. (Dzindzimo 36:9) Khu lisine, Bhibhiliya yo hevbudza gu khiyo u nga si kodza gu khala pari ya Jehovha. (Jakobe 2:23) Ngapwa isoso. Jehovha, Muvangi nya ndzadzi ni mafu, o vbweta gu khuye u khala pari yaye!

²² Vambe vathu gudzina saye va nga vbweta gu khavo u diga gu hevbula Bhibhiliya. Gudzina vo thava gu khavo u na diga tshetshe yago. Ganiolu u nga dzumeyi ni moyo a gu digisa gu khala pari ya Jehovha. Uye Pari nya yadi ngudzu guvbindra dzatshavbo.

23, 24. a) Khu ginani gu vbwetegago gu u simama gu gira siwudziso? b) Ginani hi na ganeyago khigyo omu nya gipimo gi landreyago?

²³ Olu u hevbulago Bhibhiliya, u na mana silo u no ne gu si pwisisa gwadi. U nga khali dzitshoni gu gira siwudziso mwendro gu lomba giphaso. Jesu a di khuye gu vbwetega gu hi dzi nogisa gu fana ni sanana nya sidugwana. (Matewu 18:2-4) Nigu sanana si ngu gira siwudziso nya singi. Nungungulu o vbweta gu khuye u mana miphindrulo yakona. Khu kharato, hevbula Bhibhiliya khu ndruda gasi u tiyisega gu khuwe esi u si hevhulago lisine. — Leri Mithumo 17:11.

²⁴ Ndziya nya tshukwana nya gu muti khiyo Jehovha khu gu hevbula Bhibhiliya. Omu nya gipimo gi landreyago, hi na tugula gu khethu khu ginani Bhibhiliya yi hambanago ni dzilivru dzatshavbo.