1, 2. Khu ginani u wonago nombelo kha nga giningwa nyo hathege, nigu khu ginani si vbwetegago gu hiti esi Bhibhiliya yi hevbudzago khuwo?

JEHOVHA, a gu uye a “giridego ndzadzi ni mafu,” o wona mifumo nya vathu kha nga lidoto nya mati nya lidugwana ngudzu omu nya libhaketi. (Dzindzimo 115:15; Isaya 40:15) Ambari olu hi gu vadugwana ngudzu ho ninganiswa ni litigo latshavbo, Dzindzimo 145:18, 19 yari khiyo: “PFHUMU Nungungulu womo vbafuvbi ni vatshavbo va mu ranago, ni ga vatshavbo va mu lombago khu lisine. Uye a gu ninga esi va si vbwetago avo va mu thavago; a ngu va yingisa va gu mu lomba giphaso, a va vbanyisa.” Nga wona lithomo nyo samadzise eli hi gu nalo! Jehovha, Muvangi nya tshivba yatshavbo, o vbweta gu pwanana gwadi ni ethu, nigu a ngu dzina gu engiseya milombelo yathu. Khu lisine, nombelo lithomo, giningwa nyo hathege egi Jehovha a ningidego moyo ni moyo wathu.

² Ganiolu, Jehovha a na hi engisa basi ho ganeya naye khu ndziya a yi tsakeyago. Hi nga gira kharini isoso? Hongoleni hi wone esi Bhibhiliya yi ganeyago maningano ni nombelo.

3. Khu ginani gu vbwetegago gu u gombeya ga Jehovha?

³ Jehovha o vbweta gu khuye u gombeya, mwendro gu ganeya naye. Ho siti kharini isoso? Gira wuhindzi u leri Vafilipi 4:6, 7. Dundrugeya khu lithomo lolo hi ningwago. Pfhumu nya mafu ni ndzadzi yi ngu khathala ngudzu khuwe nigu yo vbweta gu khiyo u yi embeya edzi u dzipwago khidzo u bwe u yi embeya sigaradzo sago.

4. Gu gombeya ga Jehovha gambe ni gambe gu na tiyisa kharini wupari wago naye?

⁴ Nombelo wo hi phasa gu gira wupari nya wukhongolo  ngudzu ni Jehovha. Dzipari dzo oloveya gu tepo yatshavbo dzi bhuleyana khu mapimo yadzo, gugaradzega, ni gudzipwa gwadzo, wupari wadzo wu naya wu tiya. Isoso si ngu fana ni gu gombeya ga Jehovha. Khu gu thumisa Bhibhiliya, uye a ngu hengeya mapimo yaye ni gudzipwa gwaye nago, a bwe a gu embeya esi a na girago mindru wa tshigu. U nga hengeya nuwe naye gudzipwa gwago gu etidego khu gu ganeya naye gambe ni gambe. Khu gu gira isoso, wupari wago ni Jehovha wu naya wu tiya ngudzu. — Jakobe 4:8.

5. Ho dziti kharini gu khethu Jehovha kha engiseyi milombelo yatshavbo?

⁵ Ina Jehovha a ngu engiseya milombelo yatshavbo? Ahihi, khandri yatshavbo. Dziteponi dza muprofeti Isaya, Jehovha embede vaIsrayeli khuye: “Ambari mwa gu engedzela milombelo yanu, eni kha nyi na mi yingisa, kholu mandza yanu ma tade khu novba.” (Isaya 1:15) Khu kharato, ho mba dzi woneya, hi nga thuga hi gira silo si na hi hambanisago ni Jehovha, si mu gira a si theyi kota khu milombelo yathu.

6. Khu ginani gukhodwa gu gu ga lisima ngudzu? U nga yeyedza kharini gu khuwe u na ni gukhodwa?

 ⁶ Ho ba hi vbweta gu khethu Jehovha a engiseya milombelo yathu, gu vbwetega gu hi khodwa gwaye. (Marko 11:24) Mupostoli Pawulo tshamusede gu khuye: “Muthu nyamba khodwa kha dzi kodzi gu tsakisa Nungungulu, kholu, oyu a hidzimelago ga Nungungulu fanede gukhodwa gukhuye Nungungulu womo, ni gukhuye a ngu tshatshazela avo va mu vbwetago.” (Vahebheru 11:6) Ganiolu kha si eneyi basi gu khethu hi ngu khodwa. Gu vbwetega gu hi yeyedza gukhodwa gwathu guagani khu gu engisa Jehovha tshigu ni tshigu. — Leri Jakobe 2:26.

7. a) Khu ginani gu vbwetegago gu hi dzi nogisa ni gu yeyedza githawo tepo hi gombeyago ga Jehovha? b) Hi nga yeyedza kharini gu khethu hi ngu ganeya silo si khugeyago monyoni tepo hi gombeyago?

⁷ Gu vbwetega gu hi dzi nogisa hi bwe yeyedza githawo tepo hi gombeyago ga Jehovha. Khu ginani? Ho vbweta gu ganeya ni pfhumu mwendro muthangeyi nya litigo, ho gira isoso khu ndziya nya githawo. Jehovha khuye Nungungulu nya Tshivba Yatshavbo, khu kharato ina kha hi yeli gu dzi nogisa ngudzu tepo hi ganeyago naye? (Genesi 17:1; Dzindzimo 138:6) Gu vbwetega gu hi tumbega hi bwe hi gombeya ga Jehovha na si khugeya monyoni, na hi si wuyedzeyi malito ya mamowo gambe ni gambe. — Matewu 6:7, 8.

8. Ho ba hi gombeya khu gilogyo, ginani gimbe gi vbwetegago gu hi gi gira?

⁸ Khu guhegisa, tepo hi gombeleyago gilogyo, gu vbwetega gu hi gira satshavbo hi si kodzago gasi gu thumeya egi hi gi lombidego. Khu giyeyedzo, ho gombeya ga Jehovha khesi hi si vbwetago tsigu ni tshigu, kha hi na nga vbedza hi khala migara na hi vireya gu khethu Jehovha a hi ninga satshavbo ambari nya mba si thumeya. Gu vbwetega gu hi thuma ngudzu hi bwe hi dzumeya ni wevbi thumo hi kodzago gu wu gira. (Matewu 6:11; 2 Vatesalonika 3:10) Mwendro ho lomba gu Jehovha a hi phasa gu diga gu gira gilo  nyo vivbe, gu vbwetega gu hi gimbileya hwindzo ni makhalelo yatshavbo ma kodzago gu hi linga gu gi gira. (Vakolosi 3:5) Hongoleni hi hevbula khu siwudziso si oloveyago gu girwa maningano ni nombelo.

9. Gu vbwetega gu hi gombeya ga mani? Ginani egi Johane 14:6 a hi hevbudzago khu nombelo?

⁹ Gu vbwetega gu hi gombeya ga mani? Jesu hevbudzide valandreli vaye gu gombeya ga ‘Baba wathu a gu romo ndzadzini.’ (Matewu 6:9) Ganede gambe khuye: “Eni kheni ndzila, ni lisine, ni guvbanya. Mwalo a vbohago ga Babe nyamba yiswa kheni.” (Johane 14:6) Khu kharato gu vbwetega gu hi gombeya ga Jehovha basi khu gu thumisa Jesu. So thula ginani gu gombeya khu gu thumisa Jesu? Gasi gu Jehovha a dzumeya milombelo yathu, gu vbwetega gu hi yeyedza githawo thumo nyo hathege a wu ningidego Jesu. Kha nga hi hevbudego, Jesu dzude mafuni gasi a ta hi vbanyisa gighohoni ni gufani. (Johane 3:16; Varoma 5:12) Jehovha gambe emiside Jesu kha nga Muphasi nya Mhamba mwendro Mupristi nya Khongolo ni Mulamuli. — Johane 5:22; Vahebheru 6:20.

10. Ina gu vbwetega gu hi gombeya na hi khade khu ndziya nyo hathege? Tshamuseya.

¹⁰ Ina gu vbwetega gu hi gombeya na hi khade khu ndziya nyo hathege? Ahihi, Jehovha kha lombi gu hi khidzima, hi khala, mwendro gu ema tepo hi gombeyago. Bhibhiliya yo hi hevbudza gu khiyo hi nga gombeya na hi khade ni khu yevbini ndziya yi yeyedzago githawo. (Nehemiya 8:6; Dhaniyeli 6:10) Egi gi gu gya lisima ngudzu ga Jehovha khandri edzi hi khadego khidzo tepo hi gombeyago, ganiolu khu gu ganeya naye khu ndziya nya githawo. Hi nga gombeya khu lito nyo khugege mwendro khu monyoni ni hayini hi gomogo ni ga yevbini tepo mihani mwendro wutshigu. Tepo hi gombeyago ga Jehovha, hi nga tumba gu  khethu a na hipwa ambari ho mba pwidwa khu mumbe muthu. — Nehemiya 2:1-6.

11. Khu sevbini silo nyo khaguri esi hi kodzago gu ganeya khiso ni Jehovha?

¹¹ Ginani hi kodzago gu gi lombeleya? Hi nga gombeleya satshavbo si hakhegago ga Jehovha. Bhibhiliya yari khiyo: “Ha gu lomba gilo maningano ni gudzina gwaye, hi na ni lisine nya gukhethu a ngu hipwa.” (1 Johane 5:14) Ina hi nga gombeya khu silo sathu habune? Ina. Gu gombeya ga Jehovha gu vbwetega gu gu fana ni gu ba hi ganeya ni pari nya yikhongolo. Hi nga embeya Jehovha satshavbo si gomogo mapimoni ni monyoni gwathu. (Dzindzimo 62:8, NM) Hi nga gombeya gwaye gasi a hi ninga liphuvbo laye nya guage nya tshivba gasi li hi phasa gu gira esi si lulamidego. (Luka 11:13) Hi nga lomba gambe Jehovha gu a hi ninga wugengeyi gasi hi kodza gu hunga makungo nya yadi, nigu hi nga gombeleya gu a hi ninga tshivba nyo emisane ni sigaradzo. (Jakobe 1:5) Gu vbwetega gu hi lomba Jehovha gu a hi divaleya sighoho sathu. (Vaefeso 1:3, 7) Gu vbwetega gambe gu hi gombeleya vambe, gupata ndranga yathu gumogo ni vandriyathu va libandlani. — Mithumo 12:5; Vakolosi 4:12.

12. Ginani gi yelago gu thangiswa omu nya milombelo yathu?

¹² Ginani gi yelago gu thangiswa omu nya milombelo yathu? Khu Jehovha ni gugola gwaye. Gu vbwetega gu hi mu bonga na si khugeya monyoni khu satshavbo a hi gireyago. (1 Dzikoronika 29:10-13) Ha guti isoso kholu tepo Jesu a nga ba ari mafuni, hevbudzide vapizane vaye ndziya nyo gombeye khiyo. (Leri Matewu 6:9-13.) A di khuye gu di gu vbwetega gu va gombeleya gu lina la Nungungulu li agiswa, esi si thulago gu li wonwa kha nga gilo nyo age. Khavbovbo Jesu yeyedzide gu khuye gu vbwetega gu hi gombeleya gu Mufumo wa Nungungulu wuta nigu gugola ga Jehovha gu girwa mafuni gwatshavbo. Tshambi hwane nyo ba hi gombede khu silo soso nya lisima khavbo Jesu a hi tshudego gu gombeya khu silo sathu wutumbu. Tepo hi  thangisago Jehovha ni gugola gwaye omu nya milombelo yathu, ho yeyedza esi si gu sa lisima ngudzu gwathu.

13. Milombelo yathu yi yede gu vbedza tepo muni?

¹³ Milombelo yathu yi yede gu vbedza tepo muni? Bhibhiliya kha yi ganeyi. Milombelo yathu yi nga lapha mwendro gu rola, khu guya khu giyemo gyakona. Khu giyeyedzo, hi nga gira nombelo nyo role ho ba hi vbweta gu hodza ganiolu hi gira nombelo nyo laphe tepo hi bongago Jehovha mwendro tepo hi mu embeyago gugaradzega gwathu. (1 Samuweli 1:12, 15) Kha hi vbweti gu gira milombelo nyo  laphe gasi gu samadzisa vambe basi, kha nga esi va nga ba va gira vambe matshiguni ya Jesu. (Luka 20:46, 47) Jehovha kha samadziswi khu milombelo nya kharato. Egi gi gu gya lisima ga Jehovha khu gu hi gombeya na si khugeya monyoni gwathu.

14. Gungani si vbwetegago gu hi gombeya, nigu isoso so hi hevbudza ginani khu Jehovha?

¹⁴ Gungani si vbwetegago gu hi gombeya? Jehovha o hi kutsa gu ganeya naye tepo yatshavbo. Bhibhiliya yari khiyo gu vbwetega gu hi ‘vireya na hi gu lombelela,’ hi “pharisa milombeloni,” hi bwe ‘hi si garali khu gu gira milombelo.’ (Matewu 26:41; Varoma 12:12; 1 Vatesalonika 5:17) Jehovha tepo yatshavbo dongide gu hi engiseya. Hi nga mu bonga tshigu ni tshigu khu kotani nya lihaladzo ni wuhindzi a gu nawo. Hi nga lomba gambe wugengeyi waye, tshivba, ni gutiyiswa. A bari gu khu lisine hi ngu ninga lisima lithomo  hi gu nalo nyo gombeye ga Jehovha, hi na londrola ni yevbi tepo gasi gu ganeya naye.

15. Khu ginani gu vbwetegago gu hi ganeya khethu “amen” tepo hi vbedzago gu gombeya?

¹⁵ Khu ginani gu vbwetegago gu hi ganeya khethu “amen” tepo hi vbedzago gu gombeya? Lito “amen” lo thula gu khilo “khu lisine” mwendro “si na girege kharato.” Iyoyo ndziya nyo yeyedze gu khethu hi ngu tiyisa esi hi ganedego omu nya nombelo wathu, si gu khiso, hi ganede khu monyo watshavbo. (Dzindzimo 41:13) Bhibhiliya yo hi hevbudza gambe gu khiyo gwadi gu hwane nya nombelo wu girwago vathuni hi ganeya khethu “amen” khu monyoni ambari khu lito nyo khugege, gasi gu yeyedza gu khethu hi ngu dzumeleyana ni esi si ganedwego. — 1 Dzikoronika 16:36; 1 Vakorinto 14:16.

16. Ina Jehovha a ngu phindrula milombelo yathu kamo? Tshamuseya.

¹⁶ Ina Jehovha a ngu phindrula milombelo yathu kamo? Ina, a ngu phindrula. Bhibhiliya yo mu rana khiyo khuye a “yingisago milombelo.” (Dzindzimo 65:2) Jehovha a ngupwa a bwe a phindrula milombelo yi khugeyago monyoni nya dzimilyoni nya vathu, nigu o gira isoso khu dzindziya nyo hambanehambane.

17. Jehovha o thumisa kharini dzingilozi ni sithumi saye sa mafuni gasi gu phindrula milombelo yathu?

¹⁷ Jehovha o thumisa dzingilozi dzaye ni sithumi saye sa mafuni gasi gu phindrula milombelo yathu. (Vahebheru 1:13, 14) Gu na ni siyeyedzo nya singi nya vathu va gombedego va lomba gu phaswa gu pwisisa Bhibhiliya nigu hwane nya isoso va endredwe khu moyo nya Dzifakazi dza Jehovha. Bhibhiliya yo yeyedza gu khiyo dzingilozi dzi ngu patega gutshumayelani nya “Mahungu nya Yadi” mafuni gwatshavbo. (Leri Gutuledwa 14:6.) Nigu, nya vangi vbakari gwathu hi ngu gombeya ga Jehovha khu kotani nya sigaradzo mwendro khu gu hamuga silo nyo dzi  vbanyise, khu hwane hi ningwa giphaso khu ndruye nya muKristo. — Mavingu 12:25; Jakobe 2:16.

18. Jehovha o thumisa kharini liphuvbo laye nya guage gumogo ni Bhibhiliya gasi gu phindrula milombelo yathu?

¹⁸ Jehovha a ngu thumisa liphuvbo laye nya guage gasi gu phindrula milombelo yathu. Tepo hi gombeleyago giphaso gasi gu emisana ni gigaradzo, uye a nga thumisa liphuvbo laye nya guage gasi gu hi ninga sileletelo ni tshivba. (2 Vakorinto 4:7) Jehovha a ngu thumisa gambe Bhibhiliya gasi gu phindrula milombelo yathu ni gu hi phasa gu hunga makungo khu wugengeyi. Tepo hi lerigo Bhibhiliya, hi nga mana milowo yi na hi phasago. Jehovha a nga kutsa muthu mitshanganoni gu a ganeya silo hi vbwetago gu sipwa mwendro gu lidhota libandlani li hi tshamuseya mahungu nya Bhibhiliya ma na hi phasago. — Vagalatiya 6:1.

19. Khu ginani si thugago si gira khatshi Jehovha kha phindruli milombelo yathu?

¹⁹ Ganiolu, dzimbe dzitepo si nga gira gu hi dzi wudzisa gu khethu, ‘Gasi khu ginani Jehovha a si phindruligo milombelo yangu kala olu?’ Dundruga gu khuwe uye a ngu yiti tepo ni ndziya nya tshukwana gasi gu phindrula milombelo yathu. A ngu siti esi si hi keneleyago. Adzina gu na vbwetega gu hi simama gu gombeya khu tepo nyo khaguri gasi gu mu yeyedza gu khethu hi ngu tiyisega khesi hi si lombago ni gu mu yeyedza gu khethu hi ngu mu tumba kamo. (Luka 11:5-10) Dzimbe dzitepo Jehovha o phindrula milombelo yathu khu ndziya hi nga mba yi vireya. Khu giyeyedzo, hi nga gombeya khu kotani nya gigaradzo nyo khaguri, ganiolu vbavbandze nyo vbedze gigaradzo gyogyo, a nga hi ninga tshivba nyo gi timiseye. — Leri Vafilipi 4:13.

20. Khu ginani gu vbwetegago gu hi gombeya ga Jehovha dzitepo nya dzingi?

²⁰ Nga wona lithomo nyo samadzise eli hi gu nalo nyo gombeye ga Jehovha! Hi nga tiyisega khethu uye a na hipwa. (Dzindzimo 145:18) Nigu ho gombeya ga Jehovha dzitepo nya dzingi na si khugeya monyoni, wupari wathu naye wu na tiya ngudzu.