1. Khu mani a yedego gu hi embeya ndziya nya lisine nyo khozeye khiyo Jehovha?

DZITSHETSHE nya dzingi muhuno dzo ganeya gu khidzo dzo hevbudza lisine khu Nungungulu. Ganiolu isoso khandri lisine, kholu dzitshetshe dzo hevbudza silo nyo hambane ngudzu maningano ni edzi a gu idzo Nungungulu ni edzi gu vbwetegago gu hi mu khozeya khidzo. Hi nga yiti kharini ndziya nya lisine nyo khozeye khiyo Nungungulu? Jehovha khuye enga a kodzago gu hi embeya edzi gu vbwetegago gu hi mu khozeya khidzo.

2. U nga yiti kharini ndziya nya lisine nyo khozeye khiyo Nungungulu?

² Jehovha hi ningide Bhibhiliya gasi hi kodza gu hevbula ndziya nya lisine nyo mu khozeye khiyo. Khu kharato hevbula Bhibhiliya, Jehovha a na gu phasedzeya gu phasega khu sihevbulo saye kholu uye a ngu khathala ngudzu khuwe. — Isaya 48:17.

3. Ginani egi Nungungulu a vbwetago gu khuye hi gira?

³ Vathu nyo khaguri vari khavo Nungungulu a ngu dzumeya dzitshetshe dzatshavbo, ganiolu khandriso isoso hi nga hevbudzwa khu Jesu. A di khuye: “Khandri watshavbo wule a gukhuye: ‘Pfhumu, Pfhumu, a na belago Mufumoni wa Ndzandzini. Aholu a na bela basi uye a girago gugola ga Babe wangu.” Khu kharato gu vbwetega gu hiti khethu ginani gugola ga Nungungulu, khu hwane hi gu gira. Mahungu yoyo ma khongolo ngudzu kholu Jesu fananiside vathu nya mba engisa Nungungulu ni sighevenga, si “girago guvivba.” — Matewu 7:21-23.

4. Ginani egi Jesu a ganedego maningano ni gu gira gugola ga Nungungulu?

⁴ Jesu hi gengedzide khuye ho vbweta gu gira gugola ga Nungungulu hi na emisana ni silingo. A di khuye: “Belani khu mwanya nya dugwana! Kholu ndzila yi yisago  gumbembani yi anamide ngudzu; mwanya wakone nuwo. Nya vangi khavo va belago khiyo! Gasi ndzila yi yisago guvbanyani yi hongide ngudzu; mwanya wakone nuwo. Vadugwana va belago khiyo.” (Matewu 7:13, 14) Ndziya nyo honge, mwendro ndziya nya lisine nyo khozeye khiyo Nungungulu, yo yisa womini nya gupindruge. Ndziya nyo aname, mwendro ndziya nya mba yadi nyo khozeye khiyo Nungungulu, yo yisa gufani. Ganiolu Jehovha kha vbweti gu khuye ni moyo afa. O ninga vatshavbo lithomo nyo hevbule khuye. — 2 Pedro 3:9.

5. U nga va tugula kharini ava va khozeyago Nungungulu khu ndziya nya lisine?

⁵ Jesu a di khuye hi nga va tugula ava va khozeyago Nungungulu khu ndziya nya lisine. Ho gira isoso khu gu gevisisa esi va si khodwago ni gu si gira. Uye a di khuye: “Mu na vati khu mihandro yawe.” A bwe a engedzeya khuye: “Simbo watshavbo nya wadi wa gu thela mihandro nya yadi.” (Matewu 7:16, 17) Isoso kha si thuli khiso ava va khozeyago Nungungulu va vbelede. Ganiolu, tepo yatshavbo sithumi sa Nungungulu so zama gu gira silo nyo lulame. Olu hi na wona esi si na hi phasago gu tugula ava va khozeyago Nungungulu khu ndziya nya lisine.

6, 7. Khu ginani wukhozeli nya lisine wu seketedwago omu nya Bhibhiliya? Giyeyedzo gya Jesu gyo hi hevbudza ginani?

⁶ Gu vbwetega gu wukhozeli wathu wu seketedwa omu nya Bhibhiliya. Bhibhiliya yari khiyo: “Milowo yatshavbo nya Guage yi lovidwe khu tshivba ya Nungungulu, yi ngu phasa gu hevbudza ni gu kawuka ni gu luleka, ni gu dandrisa khu gululama, gasi muthu wa Nungungulu a khale nya guvbelele, a kodze gu gira mithumo yatshavbo nya yadi.” (2 Thimoti 3:16, 17) Mupostoli Pawulo lovede maKristo khuye: “Olu mu nga hakha Mahungu gwathu, Mahungu ya Nungungulu mu ma hakhidego. Kholu, khandri  mahungu nya vathu, aholu, mahungu nya lisine la Nungungulu.” (1 Vatesalonika 2:13) Wukhozeli nya lisine wo seketedwa basi omu nya Lito la Nungungulu, Bhibhiliya. Kha wu seketedwi khu mawonelo nya vathu, sihena, mwendro simbe silo.

⁷ Satshavbo esi Jesu a hevbudzidego si di gu seketedwa omu nya Lito la Nungungulu. (Leri Johane 17:17.) Tepo nya yingi a di gu thumisa Milowo kha nga giseketelo nya esi a nga ba a ganeya. (Matewu 4:4, 7, 10) Sithumi nya lisine sa Nungungulu so landreya giyeyedzo gya Jesu si bwe si seketeya omu nya Bhibhiliya satshavbo silo si hevbudzago.

8. Ginani egi Jesu a hi hevbudzidego maningano ni gu khozeya Jehovha?

⁸ Gu vbwetega gu hi khozeya Jehovha enga. Dzindzimo 83:18, khomu nya Tradução do Novo Mundo, yari khiyo: ‘Uwe, lina lago li gu Jehovha, khuwe wenga u Khugegidego Ngudzu guvbindra vatshavbo mafuni.’ Jesu a di gu vbweta gu khuye vathu va dziti gwadi gu khavo khu mani Nungungulu nya lisine, a bwe a va hevbudza lina la Nungungulu. (Leri Johane 17:6.) Jesu a di khuye: “U na khozela Pfhumu Nungungulu wago; khuye basi u na gu mu thumelago.” (Matewu 4:10) Khu kharato, kha nga hi gu sithumi sa Nungungulu, ho landreya giyeyedzo gya Jesu. Ho khozeya Jehovha enga, hi thumisa lina laye, hi bwe hi hevbudza vambe lina la Nungungulu ni esi a na hi gireyago.

9, 10. Hi nga yeyedzana kharini gu khethu hi ngu haladzana?

⁹ Gu vbwetega gu hi haladza vathu khu monyo watshavbo. Jesu hevbudzide vapizane vaye gu haladzana khu gyawe. (Leri Johane 13:35.) Isoso kha si giregi khu guya khu malanga hi tago khumo, khu makhalelo yathu, khu gughanya mwendro khu wusiwana. Guhaladzana gwathu gu yede gu hi tshanganisa kha nga vandruye. (Vakolosi 3:14) Khu kharato kha hi hongoli nyimbitunu, ne kha hi songi vathu. Bhibhiliya yari khiyo: “Ogu khugo guhambana nya lisine nya sanana sa Nungungulu ni sanana sa Sathane. Oyu a si girigo esi nya gululame, ni gumba haladza  ndriyaye, khandri gyanana gya Nungungulu.” Yi bwe yi engedza khiyo: “Hi na haladzane khu gyathu. Hi nga giri kha nga Kayimi a nga bani a gu lumba Sathane a songa ndriyaye.” — 1 Johane 3:10-12; 4:20, 21.

¹⁰ Hi ngu thumisa tepo yathu, tshivba, ni dzithomba gasi gu phasana ni gu tiyisana khu gyathu. (Vahebheru 10:24, 25) Hi ngu “girela esi nya sadi vathu vatshavbo.” — Vagalatiya 6:10.

11. Khu ginani hi dzumeyago Jesu kha nga ndziya yi hi vbohisago ga Nungungulu?

¹¹ Gu vbwetega gu hi engisa Jesu kholu khuye ndziya nyo hi vbohise ga Nungungulu. Bhibhiliya yari khiyo: “Kha hi dzi kodzi gu mana guvbanyiswa khu mumbe muthu, kholu, mafuni gwatshavbo limwalo limbe lina li riyidwego vathu li gu ni tshivba nya gu hi vbanyise.” (Mithumo 4:12) Omu nya Gipimo 5 nya livru yeyi, hi hevbude gu khethu Jehovha rumede gyanana gyaye gasi gi ta ningeya womi wagyo kha nga gudzegiswa ga vathu nyo engise. (Matewu 20:28) Jehovha hathide Jesu gasi gu fuma kha nga Pfhumu nya mafu yatshavbo. Khigyo gi girago Bhibhiliya yi hi embeya gu khiyo ho vbweta gu vbanya kala gupindruga gu vbwetega gu hi engisa Jesu. — Leri Johane 3:36.

12. Khu ginani hi gu mba dzi bedzedzeya omu nya politika?

¹² Si ngu loleya gu hi dzi bedzedzeya omu nya politika. Jesu kha dzi bedzedzeya omu nya politika. Tepo a nga ba ari gulamudwatunu, embede Pilato, pfhumu nya muRoma, khuye: “Mufumo wangu khandri wa mafuni momu.” (Leri Johane 18:36.) Kha nga Jesu, ethu hi tumbegide ga Mufumo wa Nungungulu wa ndzadzini, nigu khu gighelo gyogyo, ni hayini hi vbanyago umo, kha hi dzi bedzedzeyi omu nya politika. Ambari ulolo, Bhibhiliya yi ngu hi ruma gu engisa “vathangeli va vegidwego khu nayo,” va gu vafumeli. (Varoma 13:1) Ethu hi ngu engisa milayo ya tigoni hi vbanyago umo. Ganiolu, go bari gu nayo nyo khaguri wu ngu dwanisana ni milayo ya Nungungulu, ethu ho pimedzeya vapostoli va nga khavo: “Hi fanede gu yingela  Nungungulu guvbindra gu yingela vathu.” — Mithumo 5:29; Marko 12:17.

13. Ginani hi tshumayelago maningano ni Mufumo wa Nungungulu?

¹³ Hi ngu khodwa gu khethu Mufumo wa Nungungulu khuwo wonga wu na vbedzago sigaradzo mafuni. Jesu a di khuye “Mahungu nya Yadi yaya nya Mufumo” ma na tshumayedwa mafuni gwatshavbo. (Leri Matewu 24:14.) Wu mwalo Mufumo ni moyo nya vathu nya nyama wu kodzago gu gira esi Mufumo wa Nungungulu wu na hi gireyago. (Dzindzimo 146:3) Jesu hi hevbudzide gu lombeleya Mufumo wa Nungungulu tepo a nga khuye: “Mufumo wago wu nate; gudzina gwago gu na girege mafuni kha nga Ndzadzini.” (Matewu 6:10) Bhibhiliya yo hi embeya gu khiyo Mufumo wa Nungungulu wu na fuvisa mifumo yatshavbo ya mafuni nigu uwo “wu na tiya kala gupindruga.” — Dhaniyeli 2:44.

14. Khu vamani u khodwago gu khuwe va ngu khozeya Nungungulu khu ndziya nya lisine?

¹⁴ Hwane nyo hevbule mahungu yaya, dzi wudzise: ‘Khu vamani va seketeyago sihevbudzo sawe omu nya Bhibhiliya? Khu vamani va bhuleyago vambe khu lina la Nungungulu? Khu vamani va haladzanago khu lisine va bwe va khodwa gu khavo Nungungulu rumede Jesu gasi gu ta hi vbanyisa? Khu vamani va gu mba dzi bedzedzeya omu nya politika? Khu vamani va tshumayelago gu khavo Mufumo wa Nungungulu basi wu na kodzago gu vbedza sigaradzo sathu?’ Dzifakazi dza Jehovha dzonga. — Isaya 43:10-12.

15. Ginani gi vbwetegago gu hi gira ho vbweta gu Nungungulu a dzumeya wukhozeli wathu?

¹⁵ Kha si eneyi gu khodwa basi khuwe Nungungulu womo. Ambari madhemoni ma ngu khodwa gu khayo Nungungulu womo, ganiolu kha ma mu engisi. (Jakobe 2:19) Ho vbweta gu khethu Nungungulu a dzumeya wukhozeli wathu, kha si eneyi gu khodwa basi gu khethu uye womo, gu vbwetega gu hi gira esi a ganeyago.

16. Khu ginani gu vbwetegago gu hi bomba wukhongeli nya malipha?

 ¹⁶ Gasi gu Nungungulu a dzumeya wukhozeli wathu, gu vbwetega gu hi bomba wukhongeli nya malipha. Muprofeti Isaya lovide khuye: “Dzi agiseni, mu duga vbakari gwaye.” (Isaya 52:11; 2 Vakorinto 6:17) Isoso khiso si girago gu gu vbwetega gu hi bomba satshavbo si gimbidzisanago ni wukhozeli nya malipha.

17, 18. Ginani “Bhabhiloni nya Khongolo,” nigu khu ginani si vbwetegago gu u dzegeya gu duga gwaye?

¹⁷ Ginani wukhongeli nya malipha? Go thudwa ni yevbi tshetshe yi hi hevbudzago khu khozeya Nungungulu khu ndziya yi dwanisanago ni Lito laye. Bhibhiliya yo rana wukhongeli nya malipha khiyo “Bhabhiloni nya Khongolo.” (Gutuledwa 17:5) Khu ginani? Hwane nya Ndrambi ya matshiguni ya Nowa, wukhongeli nya wungi nya malipha wu phede dhoropani ga Bhabhiloni. Sihevbudzo soso nya malipha si phalalegide mafuni gwatshavbo. Khu giyeyedzo, vathu va nga ba va vbanya Bhabhiloni va di gu khozeya mitsawa nya vanungungulu vararu. Muhuno nugo, dzitshetshe nya dzingi dzo hevbudza gu khidzo Nungungulu o wumbwa khu vathu vararu mwendro Vararu-moyo, ganiolu Bhibhiliya yo hevbudza guagani gu khiyo gu na ni Nungungulu moyo basi nya lisine, Jehovha, nigu Gyanana gyaye khu Jesu. (Johane 17:3) Vathu va nga ba va vbanya Bhabhiloni va di gu khodwa gambe gu khavo muthu na ni gipandre gi simamago gu vbanya tepo givili gi fago va bwe va khodwa gu khavo gipandre gyogyo gi ngu kodza gu ya tshaniseka khu guvbya niloni. Isoso khandri lisine. — Wona Tshamuselo 14, 17, ni 18.

¹⁸ Nungungulu profetide gu khuye nugunugu wukhongeli watshavbo nya malipha wu na fuviswa. (Gutuledwa 18:8) U ngu si pwisisa gu khuwe khu ginani si gu sa givbiredza ngudzu gu u duga khomu nya wukhongeli nya malipha? Jehovha o vbweta gu khuye u gira isoso na u si gu vbeledwi khu tepo. — Gutuledwa 18:4.

19. Tepo u hungago gu thumeya Jehovha, a na gu khathaleya kharini?

 ¹⁹ Tepo u hungago gu duga khomu nya wukhongeli nya malipha gasi gu thumeya Jehovha, si nga gira gu dzipari dzago mwendro valongo va si si pwisisi esi u si hungidego va bwe va gu tshanisa. Ganiolu Jehovha kha na nga gu diga. U na gira gipandre nya ndranga nya vathu nya dzimiliyoni va mafuni gwatshavbo va haladzanago khu lisine, nigu u na mana gutumba nyo vbanye kala gupindruga mafuni nya maphya ya Nungungulu. (Marko 10:28-30) Adzina dzipari dzodzo ni valongo vovo va bombago misuvo yago nyo thumeye Jehovha khu gugimbiya nya tepo va nga dzumeya gu hevbula Bhibhiliya.

20. Khu ginani si gu sa lisima gu khozeya Nungungulu khu ndziya nya lisine?

²⁰ Nugunugu, Nungungulu a na fuvisa guvivba gwatshavbo nigu Mufumo waye wu na fumeya mafu yatshavbo. (2 Pedro 3:9, 13) Yi na ba yiri tepo nyo tsakise! Vatshavbo va na khozeya Jehovha khu ndziya eyi Jehovha a vbwetago gu khuye hi mu khozeya khiyo. Khu kharato khya lisima gu u gira gilogyo olu gasi gu khozeya Nungungulu khu ndziya nya lisine.