1, 2. Khu vamani vambe vakona va nga ba vari dzipari dza Jehovha?

KHU mani u mu nago gu a khala pari yago? Muthu u mu golago. Muthu u pwananago naye, anuye na pwanana nago. Muthu nyo rule, a gu na ni makhalelo u ma tsakeyago.

² Jehovha Nungungulu a ngu hatha vathu nyo khaguri gasi va khala dzipari dzaye. Khu giyeyedzo, Abrahama a diri mweyo nya dzipari dza Jehovha. (Isaya 41:8; Jakobe 2:23) Jehovha gambe a di gu gola Dhavhidhe. A di khuye Dhavhidhe ‘mwamana a tsakisago monyo waye.’ (Mithumo 13:22) Muprofeti Dhaniyeli a diri “gigodwa” gya Jehovha. — Dhaniyeli 9:23.

3. Khu ginani Abrahama, Dhavhidhe, ni Dhaniyeli va nga khala dzipari dza Jehovha?

³ Si giride kharini gu Abrahama, Dhavidhe, ni Dhaniyeli va khala dzipari dza Jehovha? Jehovha a di khuye ga Abrahama: “Uwe u yingiside magana yangu.” (Genesi 22:18) Jehovha o khala pari ya vale va mu engisago khu gudzinogisa. Ambari vathu nya litigo-rumba va ngu kodza gu khala dzipari dzaye. Jehovha tshamusede va na Israyeli khuye: “Mu yingisa lito langu, eni nyi na khala Nungungulu wanu, enu mu khala vathu vangu.” (Jeremiya 7:23) Khu kharato anuwe gu vbwetega gu u engisa Jehovha wo ba u vbweta kamo gu khala pari yaye.

4, 5. Ina Jehovha o vhikeya kharini dzipari dzaye?

⁴ Bhibhiliya yari khiyo Jehovha a ngu khedza dzindziya nya gu a “yeyedza tshivba yaye ga vale va mu vbwetago khu monyo wawe watshavbo.” (2 Dzikoronika 16:9) Ga Dzindzimo 32:8, Jehovha o tumbisa dzipari dzaye gu khuye:  “Nyi na gu hevbudza nyi gu nonedza ndzila u na yi landrago; nyi na gu khedzisela, nyi khala singalagadzi wago.”

⁵ Womo nala nya tshivba ngudzu a vbwetago gu hi digisa gu khala dzipari dza Nungungulu. Ganiolu Jehovha o vbweta gu hi vhikeya. (Leri Dzindzimo 55:22.) Kha nga olu hi gu dzipari dza Jehovha, ho mu thumeya khu monyo wathu watshavbo. Ho tumbega gwaye ambari na hiri ga siemo nyo garadze. Nigu hi na ni gutumba nyo fane nogu gu nga ba guri ni muembi nya Dzindzimo. Lovide esi maningano ni Jehovha: “Uye khade nyamudye gwangu, gima kha nyi na thava gilo.” (Dzindzimo 16:8; 63:8) Sathane o zama kharini gu hi digisa gu khala dzipari dza Nungungulu?

6. Ginani egi Sathane a nga ganeya khu vathu?

⁶ Omu nya Gipimo 11 hi hevbude gu khethu Sathane ganedzide Jehovha a bwe a mu singedza gu khuye muliphi nigu kha lulama kholu a nga ne gu dzumeleya Adhamu ni Evha gu dzi hatheya vabune esi si nga ba siri sadi ni esi si nga ba si vivbide. Livru ya Joba, omu nya Bhibhiliya, yo hi hevbudza gu khiyo Sathane a ngu singedza gambe vathu va vbwetago gu khala dzipari dza Nungungulu. Sathane o ganeya gu khuye avo vo thumeya Nungungulu khu kotani nya esi a va ningago, na siri khu gu Mu haladza. Sathane ganede gambe gu khuye a nga kodza gu gira gu ni wevbini muthu a wugeya Nungungulu. Hongoleni hi nga wona gu hi nga hevbula ginani ga Joba nigu hi nga vhikedwa kharini khu Jehovha.

7, 8. a) A di gu dzipwa kharini Jehovha khu Joba? b) Ginani a ganedego Sathane khu Joba?

⁷ A diri mani Joba? A diri muthu nya wadi a vbanyidego omu nya 3.600 myaga hwane. Jehovha ganede gu khuye khu tepo yoyo gu diri mwalo muthu nyo fane naye mafuni. Joba a diri ni githawo nya gikhongolo khu Nungungulu,  nigu a di gu venga guvivba. (Joba 1:8) Khu lisine, Joba a diri pari nya yikhongolo ya Jehovha.

⁸ Sathane singedzide Joba gu khuye a di gu thumeya Nungungulu khu kotani nya dzithomba. Sathane a di khuye ga Jehovha: “Khandri olu u vhikelago ndranga yaye gumogo ni silo saye, gani? U kategiside thumo nya mandza yaye, ni mitshambi yaye yi andride tigoni momu. Aholu, wa gu khusedza libogo lago u k[h]uha iso a gu naso, wona gwadi nya gukhuwe a na gu vala nu gu mu wona.” — Joba 1:10, 11.

9. Ginani egi Jehovha a nga dzumeleya Sathane gu gira?

⁹ Sathane singedzide Joba khuye o thumeya Jehovha basi khu kotani nya esi Uye a mu ningidego. Sathane ganede gambe khuye a na kodza gu digisa Joba gu thumeya Jehovha. Jehovha kha ema ni Sathane omu nya mapimo yoyo, ganiolu Uye dzumelede gu Sathane a linga Joba gasi guti gu a diri pari ya Jehovha khu gu Mu haladza kamo gani.

10. Sathane wugede kharini Joba, nigu Joba phindrude kharini?

¹⁰ Gupheya, Sathane bide mwendro gu songa sirengo satshavbo sa Joba. Khavbovbo a songa sithumi nya singi sa Joba. Joba luzide satshavbo. Avba nya guwugeye nyo hegise, Sathane a di songa likhumi sanana sa Joba khu gingulu. Ganiolu Joba simamide gu tumbega ga Jehovha. “Khu satshavbo sesi Joba kha gira ni gighoho gimwegyo, gambe kha singedza gilo Nungungulu.” — Joba 1:12-19, 22.

11. a) Ginani gimbe egi Sathane a giridego Joba? b) Joba si hakhide kharini?

¹¹ Sathane kha tsukula gusingedza gwaye. Lingide Nungungulu khu gu khuye: “K[h]uha marambo yaye ni nyama yaye, u na wona idzo a na gu gu vala khidzo, nu gu mu wona.” Khu kharato Sathane wugede Joba khu madwali nyo vbise ngudzu. (Joba 2:5, 7) Ambari ulolo, Joba a di  tumbega gambe ga Jehovha. A di khuye: “Nyi na kala nyifa na nyi gukheni, nyi mwalo nandru.” — Joba 27:5.

12. Joba fakazide kharini gu khuye Sathane a diri muliphi?

¹² Joba kha nga ba ati gilo khesi Sathane a nga ba a mu singedzide mwendro gu khuye khu ginani a nga ba a tshaniseka ngudzu. A di gu pimisa khuye Jehovha khuye a nga ba a mu vangeya sigaradzo saye. (Joba 6:4; 16:11-14) Ambari ulolo, Joba simamide gu tumbega ga Jehovha. Khavbovbo gu diri mwalo gukanakana. Joba kha nga ba a dzi dwaneya saye basi. A diri pari ya Nungungulu kholu a di gu Mu haladza. Gusingedza gwatshavbo ga Sathane gu diri malipha!

13. Khu wevbi handro nya gutumbege ga Joba?

¹³ Ambari olu Joba a nga ba a si siti esi si nga ba si girega ndzadzini, uye a di tumbega ga Nungungulu a bwe a yeyedza khuye Sathane vivbedwe khu monyo. Jehovha tshatshazede Joba khu kotani nya wupari waye nyo tumbege. — Joba 42:12-17.

14, 15. Ginani egi Sathane a singedzidego vathu vatshavbo?

¹⁴ U nga mana sihevbulo nya lisima avba ga esi si dugeledego Joba. Muhuno, Sathane o hi singedza khu gu khuye ho thumeya Jehovha khu kotani nya esi hi si manago Gwaye. Omu ga Joba 2:4, Sathane a di khuye: “Muthu a ngu dzi kodza gu ningela satshavbo a gu naso, gasi gu kodza gu vbanyisa womi waye.” Khu kharato Sathane o singedza vathu vatshavbo gu khuye vo dzi dwaneya sawe basi, na siri Joba enga. Mazana myaga hwane nyo ba Joba a fude, Sathane simamide gu vala Jehovha ni gu singedza sithumi saye. Khu giyeyedzo, ga Mavingu 27:11, ho hevbula esi: “Mwanangu, tala khu wugengeli nya mapimo u tsakisa monyo wangu, gasi nyi na kodza gu ninga phindrulo uye a nyi hembululago.”

¹⁵ U nga hatha gu engisa Jehovha ni gu khala pari Yaye  nyo tumbege gasi u yeyedza gu khuwe Sathane muliphi. Ambari so vbwetega gu u vbindrugedza silo nya sikhongolo womini gwago gasi gu khala pari ya Nungungulu, ugogo guhatha nya gwadi ngudzu guvbindra satshavbo u nga si girago! Guhatha gogo gilo nya lisima ngudzu. Sathane wari khuye khu na nga tumbega ga Nungungulu tepo u na mananago ni sigaradzo. O zama gu hi kanganyisa gasi gu hi si tumbegi ga Nungungulu. Khu ndziya muni?

16. a) Khu dzevbi dzindziya a dzi thumisago Sathane gasi gu digisa vathu gu thumeya Jehovha? b) Dhiyabhulosi a nga zama kharini gu gu digisa gu thumeya Jehovha?

¹⁶ Sathane o thumisa dzindziya nya dzingi gasi gu songa wupari wathu ni Nungungulu. O hi wugeya na gu “dzuma-dzuma nga nghala yi vbwetago muthu nya gu mu hodza.” (1 Pedro 5:8) U nga samali tepo dzipari dzago, sivbango nya ndranga, mwendro vambe va na zamago gu gu digisa gu hevbula Bhibhiliya ni gu gira silo nya sadi. U nga dzipwa nu wugedwa. * (Johane 15:19, 20) Sathane gambe a ngu dzi gira “ngilozi ya Nungungulu.” Khu kharato, a nga zama gu hi kanganyisa gasi hi si engisi Jehovha. (2 Vakorinto 11:14) Yimbe ndziya a yi thumisago Sathane gasi gu hi digisa gu thumeya Jehovha khu gu hi gira hi pimisa gu khethu kha hi si kodzi gu thumeya Nungungulu. — Mavingu 24:10.

17. Khu ginani hi engisago Nungungulu?

¹⁷ Tepo hi engisago Jehovha, ho yeyedza gu khethu Sathane muliphi. Ginani gi na hi phasago gu engisa?  Bhibhiliya yari khiyo: “U na haladza PFHUMU Nungungulu wago, khu monyo wago watshavbo, ni hefemulo wago watshavbo, ni tshivba yago yatshavbo.” (Dhewuteronome 6:5) Ho engisa Jehovha kholu hi mu haladzago. Kha nga lihaladzo lathu khu Jehovha li dandrago, hi na vbweta gu gira satshavbo a hi lombago gu gira. Mupostoli Johane lovide khuye: “Guhaladza Nungungulu khu gu sayisa milayo yaye; milayo yaye kha yi garadzi gu yi landrisa.” — 1 Johane 5:3.

18, 19. a) Khu sevbini simbe silo nyo khaguri a gu khuye kha Jehovha si vivbide? b) Ho dziti kharini gu khethu Jehovha kha hi lombi gu gira silo hi si si kodzigo?

¹⁸ Ganiolu, silo muni nyo khaguri esi Jehovha a gu khuye si vivbide? Gu na ni siyeyedzo nya silo soso omu nya kwadru “ Venga esi Jehovha a si vengago.” Gupheya, u nga thuga u pimisa gu khuwe silo soso kha sa loleya ngudzu. Ganiolu tepo u lerigo mavhesi nya Bhibhiliya u bwe u dundrugeya esi ma si ganeyago, u na pwisisa wugengeli nyo engise milayo ya Jehovha. U na bwe upwa gambe gu khuwe  gu vbwetega gu u vbindrugedza siloso guvbanyani gwago. Ambari olu isoso si garadzago yimbe tepo, wo vbindrugedza makhalelo yoyo, u na mana gurula ni gutsaka gu manwago khu gu khala pari nyo tumbege ya Nungungulu. (Isaya 48:17, 18) Ho dziti kharini gu khethu si ngu kodzega gu vbindrugedza makhalelo yoyo?

¹⁹ Jehovha gima kha hi lombi gu gira gilo hi si gi kodzigo. (Dhewuteronome 30:11-14) Kha nga Pari yathu nya lisine, uye a ngu hiti gwadi guvbindra ethu vamune. A ngu yiti tshivba yathu ni gutandrega gwathu. (Dzindzimo 103:14) Mupostoli Pawulo a ngu hi kutsa: ‘Nungungulu tumbegide, kha na nga dzumedzisa gukhuye mu mane silingo nya guvbindre tshivba yanu. Mwa gu lingwa, a na mi tulela gambe dzindzila nya gu gi pale.’ (1 Vakorinto 10:13, NM) Hi nga tumba gu khethu Jehovha dzitepo dzatshavbo a na hi ninga tshivba nyo gire silo nyo lulame. A na gu ninga “tshivba . . . nya yikhongolo” gasi yi gu phasa gu timiseya sigaradzo. (2 Vakorinto 4:7) Hwane nyo ba a manide giphaso gya Jehovha khu tepo yoyo, Pawulo ganede khuye: “Nyi  ngu kodza gupala satshavbo tshivbani ya wule a nyi tiyisago.” — Vafilipi 4:13.

20. Makhalelo muni gu vbwetegago gu u ma pimedzeya, nigu khu ginani?

²⁰ Ho ba hi vbweta gu khala dzipari dza Jehovha, gu vbwetega gu hi diga gu gira esi Jehovha a gu khuye si vivbide, ganiolu gu vbwetega gu hi gira simbe gambe. (Varoma 12:9) Dzipari dza Nungungulu dzo gola esi uye a si golago. Idzo dzi tshamusedwe omu nya Dzindzimo 15:1-5. (Leri.) Dzipari dza Jehovha dzi ngu pimedzeya makhaleleo yaye dzi bwe dzi yeyedza “lihaladzo, litsako, gurula, gutimisela, gu dzi ningedzela, ndruda, wuwadi, gutumbega, gu dzi rudzisa, gu hunga monyo.” — Vagalatiya 5:22, 23.

21. U nga hevbuleya kharini gu yeyedza makhalelo aya Jehovha a ma golago?

²¹ U nga hevbuleya kharini gu yeyedza makhalelo yoyo nya yadi? Gu vbwetega gu u hevbula esi Jehovha a si golago khu gu leri ni gu hevbula Bhibhiliya tepo yatshavbo. (Isaya 30:20, 21) Wo gira isoso, lihaladzo lago khu Jehovha li na dandra, nigu tepo yoyo u na vbweta gu mu engisa.

22. Handro muni u na wu manago wo engisa Jehovha?

²² Esi u na thugago u vbweta gu si vbindrugedza guvbanyani gwago si nga fananiswa ni gu tshula sombo sa gale, khavbovbo u ambala sawalo. Bhibhiliya yari khiyo gu vbwetega gu u tshula “muthu wa gale” u bwe u ambala “muthu muphya.” (Vakolosi 3:9, 10) Ambari olu si si vbevbugigo, tepo hi vbindrugedzago makhalelo yoyo hi bwe hi engisa Jehovha, uye o tumbisa gu hi ninga “tshatshazelo” nya wukhongolo. (Dzindzimo 19:11) Khu kharato, hatha gu engisa Jehovha u bwe u yeyedza gu khuwe Sathane muliphi. Thumeya Jehovha, na siri khu kotani nya makategwa ya mindru wa tshigu, ganiolu khu gu mu haladza. Khavbovbo u na khala pari nya yikhongolo ya Nungungulu!