1, 2. Hi nga wu mana hayi wuthavelo muhuno?

NGA DZI dundrugeya nu gimbiya ndziyani na gu veta gingulu. Ndzadzini go pheya gu sivbala, gu pheya gu lasa, gu bwe gu pheya gu veta mabara. Khu gitepwana yi pheya guwa ndzadzi. U vbweta wulanga gasi u sihala. Khandri gutsaka gule tepo u manago wulanga nyo khadzisege, wu bangidego!

² Hi womo omu nya giemo nyo fane ni igyogyo muhuno. Makhalelo nya litigo ma guya ma vivba. U nga dzi wudzisa gu khuwe, ‘Nyi nga gu mana hayi guvhikedwa?’ Muembi nya Dzindzimo nya Bhibhiliya lovide esi khu Jehovha: “Uwe Nungungulu wangu, u wuthavelo wangu, u likhokhola langu, u Nungungulu wangu nya gu gutumbe.” (Dzindzimo 91:2) Khu lisine, Jehovha a nga hi hefemudza sigaradzoni sathu olu, a bwe a hi ninga gutumba nya wumindru nyo tsakise.

3. Hi nga gira kharini gasi gu Jehovha a khala wuthavelo wathu?

³ Hi nga vhikedwa kharini khu Jehovha? A nga hi phasa gu emisana ni gevbini gigaradzo hi gu nagyo, nigu na ni tshivba guvbindra ni wevbini a zamago gu hi gireya guvivba. Ambari ho dugeledwa khu silo nyo vivbe muhuno, hi nga tiyisega gu khethu Jehovha a na lulamisa sigaradzo soso mindru wa tshigu. Bhibhiliya yi ngu hi kutsa gu khiyo: “Dzi vegeni lihaladzoni la Nungungulu.” (Judha 21) Gu vbwetega gu hi simama gu pwanana ni Jehovha gasi a hi phasa dziteponi nya sigaradzo. Ganiolu hi nga si gira kharini isoso?

4, 5. Jehovha o yeyedza kharini lihadzo laye gwathu?

⁴ Gasi hi simama gu pwanana ni Jehovha, gu vbwetega gu hiti edzi a hi haladzago khidzo. Dundrugeya satshavbo  esi Jehovha a hi gireyago. Hi ningide mafu nyo mbure a bwe a ma tadza khu misimbo ni sirengo nyo samadzise. Hi ningide gambe guhodza nyo tshambe ni mati nyo age gasi gu seya. Khu gu thumisa Bhibhiliya, Jehovha a ngu hi hevbudza lina laye ni makhalelo yaye nyo tsakise. Guvbindra satshavbo, hi yeyedzide lihaladzo laye tepo a nga rumeya mafuni Gyanana gyaye nyo golege, Jesu, gasi gu ta ningeya womi waye khu kotani yathu. (Johane 3:16) Nigu khu kotani nya muphaso wowo, hi na ni guvireya nyo tsakise ngudzu khu mindru wa tshigu.

⁵ Jehovha hi dongisede Mufumo nya wuMesiya, wu gu mufumo wa ndzadzini wu na ta vbedzago gutshaniseka gwatshavbo nugunugu. Mufumo wowo wu na vbindrugedza mafu ma khala paradhesi, omu vathu vatshavbo va na vbanyago khu gurula ni gutsaka kala gupindruga. (Dzindzimo 37:29) Yimbe ndziya eyi Jehovha a hi yeyedzago khiyo lihaladzo khu gu hi hevbudza ndziya nyo vbanye khiyo womi nya tshukwana khavba si kodzegago khavbo muhuno. A bwe gambe a hi rana gasi gu hi gombeya gwaye, nigu tepo yatshavbo dongide gu engisa milombelo yathu. Jehovha khu lisine a ngu yeyedza lihaladzo laye ga moyo ni moyo wathu.

6. Ina gu vbwetega gu u dzumeya kharini lihaladzo la Jehovha?

⁶ Ina gu vbwetega gu u dzumeya kharini lihaladzo la Jehovha? Mu yeyedze gu khuwe u ngu mu bonga khu satshavbo a gu gireyago. Egi gi si tsakisigo khu gu nya vangi muhuno kha va bongi. Khidzo saye ni tepo Jesu a nga ba ari mafuni. Limbe litshigu, Jesu a di vbanyisa likhumi vadwali nya sokono, ganiolu moyo basi a nga mu bonga. (Luka 17:12-17) Ho vbweta gu fana ni mwama yoyo a nga bonga Jesu. Tepo yatshavbo ho vbweta gu bonga Jehovha.

7. Ina gu vbwetega gu hi haladza Jehovha kala hayi?

⁷ Gu vbwetega gambe gu hi yeyedza lihaladzo lathu khu Jehovha. Jesu embede vapizane vaye khuye gu vbwetega gu va haladza Jehovha khu myonyo yawe yatshavbo, ni  mihefemulo yawe yatshavbo, ni mapimo yawe yatshavbo. (Leri Matewu 22:37.) So thula ginani isoso?

8, 9. Hi nga yeyedza kharini gu khethu hi ngu mu haladza Jehovha?

⁸ Ina si ngu eneya gu ganeya basi gu khethu hi ngu mu haladza Jehovha? Ahihi. Ho ba hi haladza Jehovha khu monyo, hefemulo, ni mapimo yathu yatshavbo, hi na yeyedza lihaladzo lathu khu mithumo yathu. (Matewu 7:16-20) Bhibhiliya yi ngu hevbudza guagani gu khiyo ho ba hi haladza Nungungulu, hi na engisa milayo yaye. Ina si ngu garadza isoso? Ahihi, kholu “milayo yaye kha yi garadzi gu yi landrisa.” — Leri 1 Johane 5:3.

⁹ Tepo hi engisago Jehovha, ho mana womi nyo tsakise. (Isaya 48:17, 18) Ganiolu ginani gi na hi phasago gu simama gu pwanana ni Jehovha? Hongole hi si wone.

10. Khu ginani gu vbwetegago gu u simama gu hevbula khu Jehovha?

¹⁰ U khade kharini pari ya Jehovha? Khu gihevbulo gyago nya Bhibhiliya, u kade u muti gwadi Jehovha u bwe u gira wupari naye. Wupari wowu wo fana ni nilo wu vbwetago gu enzegedzedwa. Kha nga olu nilo wu vbwetago dzikhuni gasi gu wu khondra, anuwe gu vbwetega gu u simama gu hevbula khu Jehovha gasi gu wupari wanu wu simama na wu tiyide. — Mavingu 2:1-5.

11. Sihevbudzo nya Bhibhiliya si na gu khuha kharini?

¹¹ Tepo u simamago gu hevbula Bhibhiliya, u na hevbula silo si na gu khuhago ngudzu monyo. Wona edzi vapizane vavili va Jesu va dzi pwidego khidzo tepo Jesu a nga ba a va tshamuseya siprofeto nya Bhibhiliya. Va di khavo: “Ina kha ha nga bani hi pwa myonyo yathu na yi dzura gikhati a nga bani a gu ganela ni ethu ndzilani, a hi tshamusela Milowo, gani?” — Luka 24:32.

12, 13. a) Ginani gi kodzago gu girega khu lihaladzo lathu khu Nungungulu? b) Hi nga gira kharini gasi gu lihaladzo lathu khu Jehovha li simama gu vbanya?

¹² Kha nga olu myonyo ya vapizane vale yi nga khuhwa  tepo va nga pwisisa Milowo, uwe nuwe adzina u dzi pwide kharato tepo u nga pheya gu pwisisa Bhibhiliya. Isoso si gu phaside guti Jehovha u bwe u mu haladza. Khu dzini gu khuwe lihaladzo lolo li dzidziya. — Matewu 24:12.

¹³ Kha nga olu u khadego pari ya Nungungulu, gu vbwetega gu u dzi garadza gasi gu wupari wowo wu simama na wu tiyide. Gu vbwetega gu u simama gu hevbula khuye gumogo ni Jesu u bwe u dundrugeya khesi u si hevbulago u vbedza u si thumisa guvbanyani gwago. (Johane 17:3) Tepo u lerigo mwendro gu hevbula Bhibhiliya, dzi wudzise gu khuwe: ‘Esi so nyi hevbudza ginani khu Jehovha Nungungulu? Khu ginani si vbwetegago gu nyi mu haladza khu monyo wangu watshavbo ni hefemulo watshavbo?’ — 1 Thimoti 4:15.

14. Nombelo wu nga hi phasa kharini gu simama gu tiyisa lihaladzo lathu khu Jehovha?

¹⁴ Wo ba uri ni pari nya yadi, u ngu ganeya nayo tepo yatshavbo, nigu isoso si ngu tiyisa wupari wanu. Khu ndziya nyo fane, tepo hi ganeyago ni Jehovha gambe ni  gambe khu nombelo, isoso so tiyisa lihaladzo lathu khuye. (Leri 1 Vatesalonika 5:17.) Nombelo giningwa nyo tsakise gi tago khu ga Babe wathu wa ndzadzini. Gu vbwetega gu tepo yatshavbo hi ganeya naye na si gu khugeya monyoni. (Dzindzimo 62:8) Kha gu vbwetegi gu hi wuyedzeya milombelo hi yi vegisidego mapimoni, ganiolu gu vbwetega gu hi siti gwadi esi hi ganeyago. Khu lisine, ho simama gu hevbula Bhibhiliya hi bwe hi gombeya na si gu khugeya monyoni, hi na simama gu tiyisa wupari wathu ni Jehovha.

15, 16. Wo wu wona kharini thumo nya gutshumayele?

¹⁵ Ho vbweta gu simama gu pwanana ni Jehovha, gu vbwetega gambe gu hi bhuleya vakhwathu khu gukhodwa gwathu. Gu bhuleya vambe khu Jehovha lithomo nyo tsakise ngudzu. (Luka 1:74, NM) Nigu khuwo thumo wowo Jesu a ningidego maKristo yatshavbo nya lisine. Moyo ni moyo wathu gu vbwetega a tshumayela mahungu nya yadi nya Mufumo wa Nungungulu. Ina u ngu gira thumo wowo? — Matewu 24:14; 28:19, 20.

¹⁶ Mupostoli Pawulo wonide thumo nya gutshumayele na wuri wa lisima ngudzu; wu ranide gu khuye “thomba.” (2 Vakorinto 4:7) Gu bhuleya vambe khu Jehovha ni makungo yaye i thumo nya lisima ngudzu ga yatshavbo u kodzago gu yi gira. Iyo ndziya nyo thumeye khiyo Jehovha, nigu uye a ngu ninga lisima esi u mu gireyago. (Vahebheru 6:10) Gutshumayela gu nga phasa mwatshavbo, uwe ni vale va gu engiseyago kholu wo phasa vambe gumogo ni uwe gu hidzimeya ga Jehovha ni gu mana womi nya pindrugedwa. (Leri 1 Vakorinto 15:58.) Ina womo wumbe thumo wu kodzago gu gu ninga gutsaka nya gukhongolo?

17. Khu ginani thumo nyo tshumayele wu gu wa givbiredza?

¹⁷ Thumo nyo tshumayele khwa givbiredza ngudzu. Gu vbwetega gu hi “tshumayela mahungu,” nigu gu vbwetega hi “gira isoso khu guvbiredza.” (2 Thimoti 4:2, NM)  Gu vbwetega gu vathu vapwa gilogyo khu Mufumo wa Nungungulu. Bhibhiliya yari khiyo: “Litshigu nya likhongolo la PFHUMU Nungungulu, lomo vbafuvbi li nata khu guvbiredza.” Guhegisa ‘kha gu na nga hweya!’ (Sofoniya 1:14; Habhakuka 2:3) Khu lisine, nugunugu, Jehovha a na mwaladza litigo nyo vivbe la Sathane. Na si si gu giregi isoso, gu vbwetega gu vathu va tiviswa gasi va kodza gu hatha gu thumeya Jehovha.

18. Khu ginani gu vbwetegago gu hi khozeya Jehovha gumogo ni mambe maKristo nya lisine?

¹⁸ Jehovha o vbweta gu khuye hi mu khozeya gumogo ni mambe maKristo nya lisine. Bhibhiliya yari khiyo: “Hongoleni hi tiyiselane khu gyathu, hi phasana gu gira mithumo nya wuhindzi ni mithumo yatshavbo nya yadi. Hi nga digi, kha nga edzi va nga girago vambe, giolovedzo nya gubele mitshanganoni nya Libandla lathu. Aholu, hongoleni hi tiyiselane khu gyathu, ngudzungudzu olu enu mu wonago gukhenu Litshigu la Pfhumu li ngu vboha.” (Vahebheru 10:24, 25) Gu vbwetega gu hi gira satshavbo hi si kodzago gasi gu manega mitshanganoni yatshavbo. Mitshangano yi ngu hi ninga lithomo nya gu kutsane ni gu tiyisana khu gyathu.

19. Ginani gi kodzago gu hi phasa gu haladza vandriyathu nya maKristo?

¹⁹ Wo manega mitshanganoni, u na mana dzipari nya dzadi edzi dzi na gu phasago gu khozeya Jehovha. U nati vandruye nya vama ni vanyamayi ava va dzi garadzeyago gu mu khozeya kha nga uwe. Nigu kha nga uwe anavo kha va vbeleya nigu va ngu gira sihoso. Vo thuga va hosisa, dzi emiseye gu va divaleya. (Leri Vakolosi 3:13.) Tepo yatshavbo vega gupima gwago avba nya makhalelo nya yadi ya vandriyago nya maKristo, khu gu gira isoso si na gu vbevbugeya gu va haladza u bwe u pwanana gwadi ni Jehovha.

20, 21. Ginani “guvbanya nya lisine”?

²⁰ Jehovha o vbweta gu khuye dzipari dzaye dzatshavbo  dzi mana womi nya tshukwana khavba si kodzegago khavbo. Bhibhiliya yo hevbudza gu khiyo mindru watshigu womi wathu wu na ba wu hambanide ngudzu ni owu hi wu vbanyago muhuno.

²¹ Mindru wa tshigu, hi na vbanya kala gupindruga, na siri gu vbanya 70 mwendro 80 myaga basi. Hi na dzi buza khu “guvbanya nyamba vbela” na hi si dwali, na hiri gurulani, ni gutsakani omu nya paradhesi nyo mbure. Khiso isoso Bhibhiliya yi si ranago khiyo “guvbanya nya lisine.” Jehovha a ngu tumbisa gu hi ninga guvbanya gogo nya lisine, ganiolu gu vbwetega gu hi gira satshavbo hi si kodzago olu gasi gu hi gu ‘mana.’ — 1 Thimoti 6:12, 19.

22. a) Hi nga gira kharini gasi gu ‘mana guvbanya nya lisine?’ b) Khu ginani hi si si kodzigo gu mana womi nya pindrugedwa khu tshivba yathu?

²² Hi nga gira kharini gasi hi ‘mana guvbanya nya lisine?’ Gu vbwetega gu hi “thume silo nya sadi” hi bwe hi ‘khala sitetema khu magirelo nya yadi.’ (1 Thimoti 6:18) Isoso so thula gu khiso gu vbwetega gu hi vbanya khesi hi si hevbulago omu nya Bhibhiliya. Ambari ulolo, guvbanya nya lisine kha hi gu mani khu gudzigaradza gwathu habune. Gima na ha sa si kodza gu mana womi nya pindrugedwa khu tshivba yathu. Womi wowo giningwa nya mahala gi tago khu ga Jehovha gasi gu ninga sithumi saye nya gutumbege, gi gu gimwegyo nya siyeyedzo nya “wuhigo hi ningwago” khuye. (Varoma 5:15) Khu lisine, Babe wathu wa ndzadzini a ngu dzina gu ninga sithumi saye nyo tumbege giningwa gegi.

23. Khu ginani gu vbwetegago gu u hatha gwadi olu?

²³ Nga dzi wudzisa gu khuwe, ‘Ina nyi ngu khozeya Nungungulu khu ndziya a yi dzumeyago?’ Wo tugula gu khuwe gu vbwetega gu u vbindrugedza silo nyo khaguri, tshukwana u gira isoso kamo. Ho tumba Jehovha hi bwe hi gira satshavbo hi si kodzago gasi gu mu engisa, Jehovha a na khala wuthavelo wathu. A na sayisa vathu vaye nyo tumbege matshigoni yaya nyo hegise nya litigo leli nyo vivbe la  Sathane. Khu hwane, Jehovha a na hi bedza Paradhesini hi vbanya umo kala gupindruga, kha nga olu a tumbisidego. Khu lisine, u na mana guvbanya nya lisine wo hatha gwadi olu!