GUPHEYA MABHULO
GIHEVBULO 4
Khala muthu nya gudzinogise
Litshina nya nayo: ‘Khu gu dzi nogisa, wonani vambe na vari vakhongolo guvbindra enu.’ — Filp. 2:3.
Ginani Pawulo a giridego?
1. Sistiri VHIDHYU, mwendro leri Mithumo 26:2, 3. Khavbovbo gira siwudziso si landreyago:
-
Pawulo yeyedzide kharini gu dzi nogisa tepo a nga ganeya ni Pfhumu Agiripa?
-
Pawulo yeyedzide kharini gu khuye esi a nga ba ganeya si di guta khiyo ga Jehovha nasiri khiyo gwaye? — Wona Mithumo 26:22.
Ginani hi gi hevbulago khu Pawulo?
2. Mahungu yathu ma ngu kuha vambe tepo hi ganeyago khu ndziya nya gudzinogise ni githawo.
Pimedzeya Pawulo
3. Ganeya khu ndziya nya githawo. Potsa gu yeyedza gu khuwe u nguti satshavbo guvbindra vambe.
4. Si vege guagani gu khuwe mahungu u bhulago naye ma gu seketedwa omu nya Bhibhiliya. Lito la Nungungulu li nga kuha edzi vambe va pimisago khidzo ni gu dzipwa khidzo. Ha gu li thumisa, hi na va phasa gu tiyisa gukhodwa gwawe avba nya Lito la Nungungulu nasiri avba nya malito yathu.
5. Simama gurula. U nga khaleyi gu mu gurumedza a khodwa gu khuye esi u ganeyago lisine. Ethu kha hi vbweti gu ganedzisana. Yeyedza gu dzinogisa, u simama nu rude ni gu yiti tepo nyo khuge khiyo. (Mav. 17:14; Tit. 3:2) Ha gu ganeya khu ndziya nya yadi, adzina muthu yoyo a na engiseya mahungu yathu limbe litshigu.
