U ngu va wona vama vava vbagithombetunu vbavba?— Khu Matewu, Marko, Luka, Johane, Pedro, Jakobe, Judha ni Pawulo. Vatshavbo va vbanyide gikhati gimwegyo ni Jesu, nigu va lovide matimo ya Jesu. Hongoleni hiti simbe si yelanago navo.

Vararu vawe va diri vapostoli va nga ba va tshumayela ni Jesu. U ngu dziti gu khuwe khu vamani?— Khu Matewu ni Johane ni Pedro. Vapostoli Matewu ni Johane va di gu muti gwadi Jesu. Moyo ni moyo wawe  va lovide libhuku li ganeyago khu guvbanya ga Jesu. Mupostoli Johane gambe lovide libhuku li ranwago pwani Gutuledwa ni malangaliya mararu ma ranwago pwani Johane nya Guhegule, Johane nya Wuvili ni Johane nya Wuraru. Mupostoli Pedro lovide malangaliya mavili ma gomogo omu nya Bhibliya. Ayo ma gu ranwa pwani Pedro nya Guhegule ni Pedro nya Wuvili. Omu nya lidangaliya laye nya wuvili, Pedro lovide khu gikhati Jehovha a nga ganeya khu Jesu gukhugeya ndzadzini khuye: ‘Egi gyanana gyangu. Nyi ngu gi gola ni gu dzipwa matshandza khigyo.’

Vambe vama vbagithombetunu vbavba navo va ngu hi hevbudza khu Jesu omu nya mabhuku va nga lova. Moyo wawe khu Marko. Pedi khatshi uye a di romo tepo Jesu a nga modwa nigu si wone satshavbo si nga girega. Mumbe khu Luka. Uye a diri dhogodheya. Pedi khatshi uye khade mukristo hwane nya gufe ga Jesu.

Vambe vama vavili va nga lova Bhibliya u va wonago vbagithombetunu va diri valandra va Jesu. U ngu mati malina yawe?— Khu Jakobe ni Judha. Gupheyani avo kha va nga ba va khodwa ga Jesu. Avo gambe va di gu pimisa gu khavo Jesu handrugide vbadugwana. Khu hwane nya gikhati avo va khodwe ga Jesu va khala makristo.

Mulovi nya Bhibliya nya guhegise u mu wonago vbagithombetunu khu Pawulo. Na si gu khali mukristo, uye a di gu ranwa pwani khu Sawulo. Uye a di gu zondra makristo ni gu ma tshanisa. U ngu dziti gu khuwe ginani gi nga gira Pawulo a dzumeya gu khala mukristo?— Limbe litshigu, Pawulo na gu gimbiya ndziyani a dipwa khu githugedza muthu na gu ganeya naye gukhugeya ndzadzini. Gu diri Jesu! Uye a di wudzisa Pawulo khuye: ‘Khu ginani u tshanisago ava va khodwago ga eni?’ Hwane nya isoso, Pawulo a di vbindrugedza a khala mukristo. Pawulo lovide 14 mabhuku nya Bhibliya, gukhugeya Varoma kala Vahebheru.

Ethu hi ngu leri Bhibliya tshigu ni tshigu, khandridzo?— Khu gu leri Bhibliya, ethu ha gu hevbula silo nya singi khu Jesu. U ngu dzina gu hevbula simbe khu Jesu?—