Ginani u girago wa gu ba na upwa hwanga?— Gudzina saye wa gu lomba papai ni mamayi gasi va gu phasa. Ganiolu womo mumbe muthu nuye a kodzago gu gu phasa. Uye na ni tshivba ngudzu guvbindra vathu vatshavbo. U ngu dziti gu khuwe khu mani?— Khidzo, khu Jehovha Nungungulu. Hongoleni hi ganeya khu lidzaha limwedo li ranwago pwani khu Dhavhidhe omu nya Bhibliya. Ilo li diri mwalo hwanga kholu li di gu dziti gu khilo sikhati satshavbo Jehovha a na li phasa.

Gukhugeya gikhati Dhavhidhe a nga ba na a ngari gyanana, papai ni mamayi waye va di mu hevbudza gu gola Jehovha. Isoso si mu phaside gu mba thava ambari a gu dugeledwa khu silo nya guthise. Uye a di gu dziti gu khuye Jehovha Pari yaye nigu a na mu phasa. Limbe litshigu Dhavhidhe na gu havisa dzinvuta, gu dita ngala yi ta mola nvuta mweyo khu likana layo! U ngu dziti gu khuwe ginani Dhavhidhe a nga gira? Uye a di tutumisa ngala a yi mana abwe a yi songa nya mba na gilo mandzani! Khu gimbe gikhati gu dita ursu niyo yi ta mola nvuta; Dhavhidhe a di yi tutumisa niyo a yi songa! Khu mani a nga phasa Dhavhidhe?— Khidzo, khu Jehovha.

Gyomo gimbe gikhati gambe Dhavhidhe a nga yeyedza gu khuye mwalo hwanga. Vaisraeli va di gu dwana ni vathu va ranwago pwani Vafilista. Gu diri ni lisotshwa limwedo nya Mufilista li nga ba liri muthu nya gulaphe ngudzu! Li di gu ranwa pwani khu Goliate. Muthu yoyo nya gulaphe ngudzu a di gu kanyisa masotshwa ya Israeli ni Jehovha. Goliate a di rana masotshwa ya Israeli gasi ma ya dwana naye. Ganiolu Vaisraeli vatshavbo va di gu thava gu dwana naye. Gikhati Dhavhidhe a ngapwa isoso, a di embeya Goliate khuye: ‘Eni nyi na dwana nago! Nyi na gu pala, kholu Jehovha a na nyi phasa!’ Dhavhidhe a diri ni hwanga?— Khidzo kamwe, a diri mwalo hwanga. U ngu dzina gu dziti gu khuwe ginani gi nga girega?

Dhavhidhe a di dzega fisga yaye ni livbandre siwindri nya mba lodzwa gasi a ya dwana ni muthu wule nya gulaphe ngudzu. Tepo Goliate a nga wona khuye Dhavhidhe a ngari lidzaha, a di mu hega. Ganiolu Dhavhidhe a di embeya Goliate khuye: ‘Uwe wa gu nyi teya ni supada, ganiolu eni nya gu gu teya khu lina  la Jehovha.’ Khavbovbo Dhavhidhe a di theya giwindri vbafisgatunu, a tutuma a khinga Goliate, a ya mu rinyeya giwindri gile, gi di dzegeya gu ya veta Goliate khu vbagiwombotunu! Goliate a thega afa! Vafilista vatshavbo va di thava va tutuma. Khu ginani Dhavhidhe, ambari olu a nga ba na a ngari lidzaha, a nga pala muthu wule nya gulaphe ngudzu?— Kholu a nga phaswa khu Jehovha. Jehovha a diri ni tshivba ngudzu guvbindra muthu wule nya gulaphe ngudzu!

Wa gu hevbula ginani khesi si nga giregeya Dhavhidhe?— Jehovha na ni tshivba ngudzu guvbindra vathu vatshavbo. Uye gambe Pari yago. Khu kharato, wa gupwa hwanga, dundruga gu khuwe Jehovha a ngu kodza gu gu phasa gasi u tiya!