Hongoleni hi gira nga khatshi hi womo lidhoropani la Jeriko. Lidhoropa lolo lomo tigoni ga Khanani, omu vathu va si khodwigo ga Jehovha. Lidhoropani momo gu na ni nyamayi moyo a ranwago pwani khu Rahabhe.

Gikhati Rahabhe a nga ba na a ngari gyadzyana pwide edzi Mosi a nga kabanisa khidzo Yiphwa nya Gufuviye a dusa Vaisraeli khu Egipito. Uye gambe pwide edzi Jehovha a nga phasa khidzo Vaisraeli gu pala dzinyimbi va nga dwana ni valala vawe. Olu a gupwa pwani Vaisraeli va khade vbafuvbi ni Jeriko!

Limbe litshigu, ni wutshigu, vama vavili nya va Israeli va di beya Jeriko gasi gu khedzisisa lidhoropa. Avo va di vboha ndrangani ga Rahabhe. Rahabhe a di va lomba gu beya va khala nyumbani. Ni wutshigu wo pfhumu ya Jeriko yi dipwa pwani gu bede vathu va Israeli lidhoropani gasi gu ta li khedzisisa, nigu vathu vovo vomo gaya ga Rahabhe. Pfhumu yi di ruma vama gasi gu ya va mola. Rahabhe a di siha vama vale vavavili va Israeli vbatshani nya nyumba yaye, a embeya vama vale va nga rumwa khu pfhumu ya Jeriko khuye: ‘Vama vale vavavili nya Vaisraeli va di romo avba, ganiolu va dugide lidhoropani. Mwa gu va landra kamwe olu, mu na va mana!’ U ngu dziti khuwe khu ginani Rahabhe a nga siha vama vale Vaisraeli?— Kholu uye a di gu khodwa ga Jehovha nigu a di gu dziti gu khuye Jehovha a na ningeya litigo la Khanani ga Vaisraeli.

Na va si gu dugi nyumbani ga Rahabhe, vama vale nya Vaisraeli va tumbiside khavo Rahabhe ni valongo vaye va na vbulugiswa gikhati Jeriko a na tshungunudwago. U ngu siti esi va nga mu embeya gu gira?— Avo va di khavo: ‘Dzega ngodzi yeyi nya gufuviye u yi vbayega vbavbandze nya janeya yago. Wa gu gira kharato, vatshavbo va na gu ba va romo nyumbani gwago va na vbuluga.’ Rahabhe a di gira esi vama vale nya Vaisraeli va nga mu embeya. U ngu dziti gu khuwe khavbovbo ginani gi nga girega?—

Hwane nya matshigwana, Vaisraeli va di dzuwulugeya lidhoropa nya mba gira ligwaha. Ndrani nya livbandre na limwedo matshigu avo va di dzuwulugeya lidhoropa gumogo khu litshigu. Ganiolu, khu litshigu nya livbandre na mavili avo va di dzuwulugeya lidhoropa livbandre na sivili sikhati. Khavbovbo vatshavbo va di kwanguluga. Jehovha a di khungumula mabhiyo  nya lidhoropa ma thega vbavbatshi. Ganiolu nyumba yi nga ba yi vbayegidwe ngodzi nya gufuviye vbajaneyatunu kha ya thega! U ngu yi wona vbagithombetunu vbavba?— Rahabhe ni valongo vaye va vbulugisidwe!

Wa gu hevbula ginani khu Rahabhe?— Rahabhe a di gu khodwa ga Jehovha kholu a ngapwa silo nya singi nya gutsakise ngudzu a nga si gira. Anuwe u ngu hevbula silo nya singi nya gutsakise sa Jehovha. U ngu khodwa ga Jehovha kha nga Rahabhe?— Hi ngu dziti gu khethu u ngu khodwa!