Rebheka a di ri nyamayi a nga ba a gola Jehovha. Mwama waye a di gu ranwa pwani khu Isaki. Isaki nuye a di gu gola Jehovha. Rebheka tivanide kharini ni Isaki? Rebheka yeyedzide kharini gu khuye a di gu vbweta gu tsakisa Jehovha? Hongoleni hi wone.

Isaki a di ri gyanana gya Abrahama ni Sara. Avo va di gu khala tigoni ga Khanani, omu vathu va nga ba va si khozeyi Jehovha. Ganiolu Abrahama a di gu vbweta gu khuye gyanana gyaye gi dzega nyamayi a khozeyago Jehovha. Khu kharato, Abrahama a di ruma githumi gyaye gu hongowa Harani, omu va nga ba va khala valongo va Abrahama, a ya vbweteya nyamayi Isaki. Pedi khatshi githumi a nga gi ruma khu Eliezeri.

Eliezeri hongode ni simbe sithumi sa Abrahama. Ilolo li di ri lipfhumba nya likhongolo ngudzu. Avo va di hongowa ni likhumi dzikamelu dzi nga ba dzi rwade guhodza ni siningwa. Eliezeri na mutide kharini nyamayi a nga vbweta gu hatheya Isaki? Gikhati Eliezeri ni simbe sithumi va nga vboha Harani, va di ya ema vbafuvbi ni nambo kholu Eliezeri a di gu dziti gu khuye yi di gu vboha tepo nya gu vathu va ya rega mati. Uye a di gombeya ga Jehovha khuye: ‘Nyamahegyana nyi na mu lombago mati nya gu seye a nyi ninga abwe a ninga dzikamelu dzangu, nyi na dziti gu kheni khuye u mu hathidego.’

 Khavbovbo gu di vboha vbanambotunu gyadzyana nya gu pwani khu Rebheka. Bhibliya ya ri khiyo uye a di mburide ngudzu. Eliezeri a di mu lomba mati, Rebheka khuye: ‘Lisine. Nyi na gu ninga mati, bwe khavbo nyi regeya dzikamelu dzago nidzo.’ Nga dundrugeya! Dzikamelu dzipwago lidora dzi ngu seya ngudzu mati. Khu kharato, Rebheka bwelelede namboni sikhati nya singi a ya rega mati. U ngu mu wona vbagithombetunu vbavba edzi a thumago khidzo?— Eliezeri a di hlamala khedzi Jehovha a nga hlamula khidzo nombelo waye.

Eliezeri a di ninga Rebheka siningwa nya singi nya gumbure. Rebheka a di rana Eliezeri ni simbe sithumi va hongowa gaya ga vavelegi vaye. Eliezeri a di ya tshamuseya gighelo nya gu rumwe gwaye Harani khu Abrahama nedzi Jehovha a hlamudego khidzo nombelo waye. Valongo va Rebheka va di dzumeya gu khavo a dzegwa khu Isaki.

Rebheka a di gu dzina gu dzegwa khu Isaki?— Rebheka a di gu dziti gu khuye khu Jehovha a nga ruma Eliezeri gu hongowa Harani. Khu kharato, tepo valongo va Rebheka va nga mu wudzisa khavo a ngu dzina gu hongowa Khanani a ya khala mwangadzi wa Isaki, uye a di khuye: ‘Ina, nyi ngu dzina.’ Nya mba hweya, uye a di hongowa ni Eliezeri. Gikhati va nga vboha Khanani, uye a di khala mwangadzi wa Isaki.

Jehovha kategiside Rebheka kholu a nga gira esi Jehovha a nga ba a vbweta gu khuye a gira. Hwane nya myaga nya yingi, Jesu velegedwe gilongoni gya Rebheka! Wa gu fanana ni Rebheka, u tsakisa Jehovha, a na gu kategisa nuwe.