GIHEVBULO 13
Thimoti a di gu Vbweta gu Phasa Vathu
Thimoti a diri lidzaha li nga ba li tsaka khu gu phasa vathu. Uye a di gu gimbiya-gimbiya malanga nya mangi gasi gu ya phasa vambe vathu. Khu kotani nya isoso, uye a diri ni womi nya gutsakise ngudzu. U ngu dzina gu siti esi a nga gira?—
Mayi ni kokwe wa Thimoti va mu hevbudzide khu Jehovha
Thimoti dandrede lidhoropani li ranwago pwani i Listra. Kokwe waye, Loyide, ni mayi waye, Eunise, va phede gu mu hevbudza khu Jehovha na ngari dugwana. Gikhati Thimoti a nga ba na gu dandra, a di gu vbweta gu phasa vambe vathu guti Jehovha.
Gikhati a nga ba a ngari lidzaha, Pawulo a di mu lomba gu khuye va gimbiya-gimbiya vatshavbo gasi gu ya tshumayela mambe malanga. Thimoti khuye: ‘Ina!’ Uye a di dongide gu gimbiya a phasa vambe vathu.
Thimoti endride ni Pawulo va hongowa lidhoropani limwedo la Makedhoniya li ranwago pwani Tesalonika. Avo va gimbide pfhuka nya gulaphe ngudzu khu mawundru vabwe va khileya ngalava gasi gu vboha iyoyo. Gikhati va nga vboha, va phaside vathu nya vangi gu hevbula khu Jehovha. Ganiolu vambe vathu va di zangari va zama gu va bayisa. Khu kotani nya isoso, Pawulo ni Thimoti va di khuga va ya tshumayela gumbe.
Thimoti a diri ni womi nya gutsakise
Hwane nya migima nya gukari, Pawulo a di lomba Thimoti gu bweleya Tesalonika gasi a ya wona gu khuye vandriyawe va ngu wuga gwadi gani. Si di gu lomba gu Thimoti a tiya hambo gasi gu bweleya lidhoropani lolo nya gu garadze! Ganiolu Thimoti bwelede kholu a di gu garadzegeya vandriyaye iyoyo. Gikhati a nga bweleya ga Pawulo, Thimoti wide ni mahungu nya yadi. Vandriyawe Tesalonika va di ngari vadi!
Thimoti thumide myaga nya yingi ni Pawulo. Gimbe gikhati Pawulo lovide khuye Thimoti a diri muthu nya gutsakise gu mu ruma a ya phasa mabandla. Thimoti a di gu gola Jehovha ni vathu.
Uwe ke, u ngu gola vathu nigu u ngu dzina gu va phasa gu hevbula khu Jehovha?— Wa gu ba u va gola, u na manega ni womi nya gutsakise kha nga Thimoti!
