XIKOLA NYA VAVHANGELI NYA MUFUMO Vapiyonero va gomogo omu nya 23 kala 65 myaga va dogoreyago gu engedzeya thumo wawe nya gutshumayele, va ngu ranedwa tshangano wu na giredwago ava va dogoreyago gu hevbula Xikola nya Vavhangeli nya Mufumo khu Dimingu vbamihanitunu. Wulanga ni tepo yakona si na tiviswa.

GIPANDRE NYA GU LAMULEYE DZIMHANGO Dziti gu khuwe gipandre gegi gya gu phasa BASI AVA VA DUGEDWAGO KHU MHANGO NYA AVBA NI AVBA.

GIPANDRE NYA SILO NYO DZIMEDZWE Silo satshavbo si manwago na si dzimede gu vbwetega si yiswa avba nya Gipandre nya silo nyo dzimedzwe. Wa gu ba u dzimedzide gilo nyo khaguri, indra avba nya gipandre gegi gasi guya vbweta sombo sago. Sanana si nga dzumeleyana ni vavelegi vaso gu vbwetega si yiswa avba nya gipandre gyogyo. Gasi gu vbevbugisa silo, gira wuhindzi u woneleya sanana sago, u bwe u khala naso vbafuvbi.

GUBHAPATISWA Vbavbandze nya gu ba na si girwa khu mambe magirelo, malanga ya ava va hongolago gubhapatiswatunu ma na vegwa vbavbatshi mbeli nya giluvelo. Avo va hongolago gubhapatiswatunu gu vbwetega gu vaya khala na yi si pheyi ganelo nya bhapatiso khu Sabhadho vbadzimindrutunu. Gu vbwetega gu moyo ni moyo ata ni tuwali ni sombo si yeyedzago githawo a na ambalago gasi gubhapatiswa khiso.

MININGELO Gu thumisidwe dzitsapawu nya dzingi gasi gu dongiseya wulanga wowu, gu mana mitshini nya gu dandrise malito, nya gu yeyedze khiyo dhivhidhiyu ni yimbe mithumo nya yingi yi hi phasago gu wona gwadi tshangano wowu nya gutsakise wu hi phasago gu hidzimeya ga Jehovha. Miningelo yago nya gudzine yi ngu phasedzeya gu livba satshavbo soso ni gu phasedzeya thumo mafuni gwatshavbo. Gasi si gu vbevbugeya, malangani nyo tale avba nya tshangano wowu gu vegidwe dzikaxa nya miningelo dzi lovidwego khu dziletra nya gu wonege gwadi. Miningelo yatshavbo yi ngu bongwa ngudzu. Huwo nya Guthangeye yi ngu gu bonga khu kotani nya wuhindzi wago nya gu seketeye Mufumo.

THUMO NYA GUDZINE Wa gu dogoreya gu phasedzeya mithumo yi yelanago ni tshangano wowu, gira wuhindzi u ya ganeya ni gipandre gegi.

VAYEYEDZEYI Vayeyedzeyi va emisedwe gu gu phasa. Gira wuhindzi u thumisana gwadi navo khu gu landreya sileletelo sawe maningano ni mavegelo nya dzimovha, gu woneleya vathu va beyago ni gu duga, gu vegisa wulanga, ni simbe silo.

WULANGA NYO KHALE Gira wuhindzi u theya kota khu vambe vathu. Dundruga gu khuwe u ngu kodza gu vegeya basi wulanga valongo va vbafuvbi, ava u endrago navo, u khalago navo ndranga mweyo mwendro ava u hevbulago navo Bhibhiliya. Gira wuhindzi u si vegi sombo vbawulangatunu owu u no ne gu wu thumisa.