Gu hambana ni vambe vathu, Jesu vbanyide ndzadzini kha nga muthu nya liphuvbo na a si gu velegwi mafuni. (Johane 8:23) Uye khuye givangwa nya gupheye gya Nungungulu, nigu uye phasedzede guvangani nya silo satshavbo. Khuye enga a nga vangwa khu Jehovha abune nigu khu kharato yede gu ranwa pwani “Mwamana wa moyo” mwendro Gyanana gya Nungungulu gi velegidwego gyonga. (Johane 1:14) Jesu thumide kha nga Muganeli wa Nungungulu. Khavbovbo uye a gu ranwa pwani “Lito.” — Hevbula Mavingu 8:22, 23, 30; Vakolosi 1:15, 16.

Nungungulu rumede Gyanana gyaye mafuni khu gu rurisa womi waye ndzadzini a wu theya ndrani ga gyadzyana nya mbiri nya muJudha nya gu pwani khu Mariya. Khu kharato Jesu a diri mwalo babe nya nyama. (Luka 1:30-35) Jesu dzude mafuni gasi 1) gu ta hevbudza lisine khu Nungungulu, 2) gu ta hi ninga giyeyedzo nya edzi hi yedego gu gira khidzo gugola ga Nungungulu ambari na hi gu emisana ni sigaradzo, ni 3) gu ta ningeya womi waye nya guvbeleye kha nga ‘gudzegiswa.’ — Hevbula Matewu 20:28.

Gudzegiswa i tengo wu livbwago gasi gu dusa muthu a gu romo mhangoni nya gufe. (Ekisodha 21:29, 30) Gufa ni gugumba kha sa nga ba si gira gipandre nya makungo nya gupheye ya Nungungulu khu vathu. Ha gu siti kharini isoso? Nungungulu embede muthu nya gupheye, Adhamu, gu khuye a gu gira esi Bhibhiliya yi si ranago gu khiyo “gighoho,” a nafa. Naripwani Adhamu kha ghoha, gima na a safa. (Genesi 2:16, 17; 5:5)  Kha nga edzi Bhibhiliya yi ganeyago, gufa gu “bede” mafuni khu kotani ga Adhamu. Khu kharato, Adhamu ningide gighoho situgulwana saye satshavbo ni tsayiso yakona a gu gufa. Ha gu vbweta gudzegiswa gasi hi duga tsayisoni nya gufe hi ningidwego khu Adhamu. — Hevbula Varoma 5:12; 6:23.

Khu mani a nga ba a ninganedwa khu gu livba tengo nya gudzegiswe gasi gu hi dusa gufani? Ha gufa, ha gu dzi livbeya honga tsayiso yoyo. Mwalo muthu nya gu mba vbeleya a kodzago gu livbeya vambe sighoho sawe. — Hevbula Ndzimo 49:7-9, A Biblia Go Basa.

Guhambana ni ethu, Jesu a diri muthu nya guvbeleye. Khu kharato, kha sa nga ba si vbwetega gu afa khu sighoho saye kholu uye gima kha ghoha. Vbavbandze nya isoso, Jesu fude khu kotani nya sighoho sa vambe. Nungungulu yeyedzide lihaladzo nya likhongolo ngudzu ga vathu khu gu rumeya Gyanana gyaye gasi gu ta hi feya. Jesu nuye yeyedzide lihaladzo laye khetu khu gu engisa Babe waye ni gu ningeya womi waye khu kotani nya sighoho sathu. — Hevbula Johane 3:16; Varoma 5:18, 19.

Tepo a nga ba a romo mafuni, Jesu hawulugiside vadwali, a wusa ava va fudego ni gu dusa vathu gutshanisekani. Khu kharato uye yeyedzide esi mindru wa tshigu a na gireyago vathu vatshavbo va engisago. (Matewu 15:30, 31; Johane 5:28) Hwane nya gufe ga Jesu, Nungungulu mu wuside gasi a vbanya kha nga muthu nya liphuvbo. (1 Pedro 3:18) Khavbovbo Jesu a di ya vireya nyamudye ga Nungungulu kala Jehovha a mu ninga tshivba gasi gu fumeya mafu yatshavbo kha nga Pfhumu. (Vahebheru 10:12, 13) Olu Jesu o fuma kha nga Pfhumu ndzadzini, nigu valandreli vaye va ngu tivisa mahungu yoyo nya yadi mafuni gwatshavbo. — Hevbula Dhaniyeli 7:13, 14; Matewu 24:14.

Nugunugu Jesu a na thumisa tshivba yaye kha nga Pfhumu gasi gu fuvisa gutshaniseka gwatshavbo ni ava va gu vangago. Vatshavbo ava va khodwago ga Jesu khu gu mu engisa va na vbanya paradhesini mafuni. — Hevbula Ndzimo 37:9-11.