Vomo vathu va khozeyago khu myonyo yawe furi dzitshetsheni dzatshavbo. Si ngu tsakisa guti gu khethu Nungungulu a ngu va wona vathu vovo ni gu va khathaleya. Ganiolu egi gi si tsakisigo khu gu wukhongeli wa gu thumisedwa silo nya guvivbe. (2 Vakorinto 4:3, 4; 11:13-15) Khu gu landra khu mahungu hi ma wonago, hi ma pwago ni gu ma hevbula omu nya dziradhyu, dzitelevizawu ni dzijornali, dzitshetshe nyo khaguri dzi ngu dzi bedza omu nya terorismo, gumbembisani nya lihundzu nyo khaguri, dzinyimbini ni gutshanisani gumogo ni guhengeya malawu ni sanana. Silo sesi si ngu vbisisa ngudzu myonyo ya ava va khodwago ga Nungungulu khu lisine! — Hevbula Matewu 24:3-5, 11, 12.

Wukhongeli nya lisine wa gu rungudza Nungungulu, ganiolu wukhongeli nya malipha kha wu mu tsakisi. Uwo wa gu hevbudza mapimo ma gu mwalo omu nya Bhibhiliya, gupata ni sihevbudzo nya malipha khu Nungungulu ni ava va fudego. Ganiolu Jehovha o vbweta gu khuye vathu vati lisine khuye. — Hevbula Ezekiyeli 18:4; 1 Thimoti 2:3-5.

Si ngu tsakisa guti gu khethu Nungungulu kha kanganyiswi khu wukhongeli wowu wu gu khuwo wu ngu mu haladza ganiolu khu lisine wa gu haladza litigo la Sathane. (Jakobe 4:4) Lito la Nungungulu la gu tshamuseya wukhongeli watshavbo nya malipha kha nga “Bhabhiloni nya Khongolo.” Bhabhiloni a diri lidhoropa la gale omu wu nga pheleya umo wukhongeli nya malipha hwane nya Ndrambi ya matshiguni ya Nowa. Nugunugu Nungungulu a na fuvisa khu githugedza wukhongeli wu kanganyisago ni gu tshanisa vathu. — Hevbula Gutuledwa 17:1, 2, 5, 16, 17; 18:8.

 Ma nga romo mambe mahungu nya yadi. Jehovha kha divala vathu nya myonyo nya gutumbege va phalalegidego dzitshetsheni nya malipha tigoni gwatshavbo. A ngu tshanganisa vathu vovo khu gu va hevbudza lisine. — Hevbula Mikeya 4:2, 5.

Jehovha a ngu khathaleya vathu va golago lisine ni silo nya sadi. Uye a gu va kutsa gu duga dzitshetsheni nya malipha. Vathu va haladzago Nungungulu va ngu gola gu gira ni gevbi gi vbwetegago gasi va mu tsakisa. — Hevbula Gutuledwa 18:4.

Khu lizana nya myaga nya gupheye, tepo vathu nya myonyo nya gutumbege va ngapwa mahungu nya yadi khu ga vapostoli, va di ma tsakeya. Va di hevbula mavbanyelo maphya ga Jehovha, aya ma tsakisago ngudzu, ma gu na ni gighelo ma bwe ma tumbisa womi nya gupindruge. Vathu vovo giyeyedzo nya gyadi gwathu muhuno kholu va yeyedzide gu tsakeya mahungu nya yadi khu gu thangisa Jehovha womini gwawe. — Hevbula 1 Vatesalonika 1:8, 9; 2:13.

Jehovha a ngu hakha ava va dugago omu nya wukhongeli nya malipha a va dzumeya kha nga vakhozeli vaye. Wa gu dzumeya guranwa gogo nya lihaladzo ga Jehovha, u na khala pari yaye, u dzumedwa kha nga moyo nya vakhozeli va Jehovha u bwe u mana guvbanya nya gupindruge. — Hevbula Marko 10:29, 30; 2 Vakorinto 6:17, 18.

Si ngu tsakisa ngudzu guti gu khethu wukhongeli nya malipha wu na lamudwa. Gulamudwa gogo gu na vbedza gutshaniseka ga vathu mafuni gwatshavbo. Wukhongeli nya malipha gima kha wu na nga pengisa ni gu hambanisa gambe vathu. Vathu vatshavbo va na gu ba va vbanya va na tshanganiswa gukhozeyani ga Nungungulu moyo basi nya lisine. — Hevbula Gutuledwa 18:20, 21; 21:3, 4.