Mahungu nya yadi ma guta khu ga Jehovha, Nungungulu nya gutsake, oyu a vbwetago gu khuye dzindranga dzi tsaka. (1 Thimoti 1:11, Tradução do Novo Mundo) Uye khuye mutumbunusi nya wugadzi. Mutshadho nya nayo khwa lisima gasi ndranga yi mana gutsaka kholu uwo wa gu wumba wulanga nya gutiye gasi gu dandrisa sanana. Makristo ma yede gu landra milayo ya tigoni gwayo yi yelanago ni gu lovedzisa mutshadho. — Hevbula Luka 2:1, 4, 5.

Nungungulu a gu wu wona kharini wugadzi? Uye o vbweta gu khuye wugadzi wu gira patano nya gupindruge wa mwama ni nyamayi. Jehovha o vbweta gu khuye mwama a tumbega ga mwangadzi waye ni mwangadzi a tumbega ga mwama waye. (Vahebheru 13:4) Uye a ngu venga guhulana. (Malakiya 2:16) Ganiolu uye a ngu dzumeya gu khuye maKristo ma hulana ma bwe ma dzegana ni mumbe muthu moyo wawe a gu bhaya. — Hevbula Matewu 19:3-6, 9.

Jehovha vangide vama ni vanyamayi gasi moyo ni moyo a tadzisa esi si keneleyago ga pari yaye. (Genesi 2:18) Kha nga hungo nya ndranga, mwama yede gu thangeya ni gu sayisa ndranga yaye khu gu yi ninga guhodza, wulanga nya gu khale ni guambala, ni gu yi hevbudza mahungu ya Nungungulu. Gu vbwetega gu a yeyedza lihaladzo nya guvbeleye ga mwangadzi waye. Vama ni vagadzi va yede gu haladzana ni gu ningana githawo. Olu vama ni vagadzi va nga ne nga vbeleya, gu hevbula gu divaleyana sihoso gilo nya lisima ngudzu gasi lipango li mana gutsaka. — Hevbula Vaefeso 4:31, 32; 5:22-25, 33; 1 Pedro 3:7.

Mwa gu ba mu ri ni sigaradzo wugadzini gwanu, mwavavili mu yede gu dzi garadzeya gu vbanyisana khu lihaladzo. (1 Vakorinto 13:4, 5) Lito la Nungungulu kha li kutsedzeyi gu hambana gasi gu vbedza sigaradzo nya sidugwana nya ndranga. — Hevbula 1 Vakorinto 7:10-13.

Jehovha o vbweta gu khuye enu mu tsaka. Uye a gu gu ningani wusingalagadzi nya wadi ngudzu wu yeyedzago edzi mu yede gu londrowa khidzo wuphya wanu. O vbweta gu khuye mu phasega khu guti ni guvidzwa ga vavelegi vanu. (Vakolosi 3:20) Jehovha gambe o vbweta gu khuye mu tsaka khu gu gireya gilogyo Muvangi wanu ni Gyanana gyaye. — Hevbula Muhevbudzi 11:9-12:1; Matewu 19:13-15; 21:15, 16.

Enu mu yede gu dzi garadzeya gu ninga sanana sanu guhodza, wulanga nya gu khale ni guambala. (1 Thimoti 5:8) Ganiolu, gasi sanana sanu si mana gutsaka, mu yede gambe gu si hevbudza gu haladza Nungungulu ni gu hevbudzwa khuye. (Vaefeso 6:4) Giyeyedzo gyanu nya gu haladze Nungungulu gi ngu kodza gu kutsedzeya myonyo ya sanana sanu. Gihevbudzo gyanu gya gu seketedwa khu Lito la Nungungulu, gi ngu kodza gu vbindrugedza mapimo ya sanana sanu ma gira mapimo nya yadi. — Hevbula Dhewuteronome 6:4-7; Mavingu 22:6.

Sanana si ngu phasega ma gu si tiyisa ni gu si zundza. Iso gambe si ngu vbweta gu kawukwa ni gu laywa. Gihevbudzo gyogyo gi na va vhikeya mavbanyeloni yaya yimbe tepo ma na va mago gutsaka. (Mavingu 22:15) Ganiolu, gulaya gogo kha gu vbwetegi guva gulaya nya gutshanise mwendro nya wusathane. — Hevbula Vakolosi 3:21.

Dzifakazi dza Jehovha dzi ngu dusa dzilivru nya dzingi dzi lovedwago gu phasa ngudzungudzu vavelegi ni sanana. Dzilivru dzodzo dza gu seketedwa khu Bhibhiliya. — Hevbula Ndzimo 19:8, 12.