Hevbula mahungu yago u ma pwisisa. Pwisisa mahungu yatshavbo gasi gu u ma tshamuseya khu ndziya nyo vbevbuge ni malito yago.

Thumisa dzifrazi nyo role ni guvbevbuga. Ambari olu si dzumeledwago gu thumisa dzifrazi nyo laphe, tshamuseya matshina nya gisekelo khu dzifrazi nyo role ni gukongoma.

Tshamuseya malito nya mba olovelega. So kodzega, u nga thumisi malito ma gu mba tidwa khu vaengiseyi vago. So hunga gu khumbuga malito nya mba olovelega, muthu nyo khaguri a khumbugwago omu nya Bhibhiliya, mipimo nyo khaguri mwendro giolovedzo nyo khaguri, gu vbwetega gu u gi tshamuseya.