Bhibhiliya ya gu ganeya khiyo Sathane “mupembi nya litigo latshavbo.” (Gutuledwa 12:9) Sathane ni madhemoni yaye kha va vbweti gu khavo hi khodwa avba nya Lito la Nungungulu, agu Bhibhiliya. Avo va gu zama gu gira gu vathu va khodwa gu khavo vale va fudego va ngu vbanya wulangawo gu vbanyago sivangwa nya liphuvbo. Hongoleni hi wona edzi va girago khidzo isoso.

Wukhongeyi nya wungi wa gu hevbudza gu khuwo tepo vathu va fago gu na ni liphuvbo li dugago li ya vbanya omu si khalago sivangwa nya liphuvbo. Vari khavo liphuvbo kha lifi ga gufa mili. Avo gambe va gu hevbudza gu khavo liphuvbo kha lifi kholu ilo gilo gi sifigo.

Ganiolu isoso khandriso si hevbudzwago khu Lito la Nungungulu. Bhibhiliya ya gu tshamuseya gu khiyo muthu i hefemulo, uwo khandri gilo gi gomogo ndrani nya muthu. Khu giyeyedzo, Bhibhiliya ya gu ba yi tshamuseya khu gu vangwa ga Adhamu, ya ri khiyo: ‘Jehovha Nungungulu a di wumba muthu khu kudzudzwane nya mafu a mu furugedza dzithonvuni gwaye hefemulo nya womi, khavbovbo muthu a di khala givangwa givbanyago.” (Genesi 2:7, NM) Khu kharato, Adhamu kha hakha hefemulo; uye a diri hefemulo.

 Sirengo niso mihefemulo. — Genesi 1:20, 21, 24, 30.

Kha nga olu Bhibhiliya yi ganeyago gu khiyo “hefemulo” wa gu thula muthu khu abune, guti gu khethu uwo hefemulo wu ngufa, kha si hi samadzise. Milowo yari khiyo:

• “Wule [hefemulo] a nga ghohago khuye a na fago.” — Ezekiyeli 18:4.

• “Samisoni a [di] ganeya gu khuye: ‘Hefemulo wangu wu nafe gumogo ni vaFilisitiya.’” — Valamuli 16:30, NM.

• “Ina gu ngu dzumedziswa khu litshigu nya Sabhadho gu gira silo nya sadi mwendro nya guvivbe, gani? Gu vbanyisa muthu, mwendro gu mu songa?” — Marko 3:4.

Yimbe milowo ya gu tshamuseya gu khiyo hefemulo wu ngu kodzega gu fuviswa (Genesi 17:14), khu matshari (Josuwa 10:37), khu gu gamwa, (Joba 7:15), ni gu dzama (Johane 2:5). Khu kharato, hefemulo wu ngufa.

Wa gu leri Bhibhiliya yatshavbo, gima khu na nga mana malito ma gu khayo “hefemulo wu si figo.” Hefemulo nya muthu khandri liphuvbo. Gihevbudzo gi gu khigyo hefemulo kha wufi kha giti khomu nya Bhibhiliya. Gihevbudzo gyogyo khya Sathane ni madhemoni yaye. Jehovha a ngu nyenya yatshavbo malipha nya wukhongeyi. — Mavingu 6:16-19; 1 Thimoti 4:1, 2.

Yimbe ndziya eyi Sathane a kanganyisago khiyo vathu, gu thumisa dzinyanga. Nyanga, muthu a kodzago gu hakha mahungu ma tago khu ga sivangwa nya liphuvbo. Vathu nya vangi, gu pata ni dzinyanga, va gu khodwa gu khavo mahungu yoyo ma guta khu ga maphuvbo ya vale va fudego. Ganiolu, kha nga olu hi si wonidego omu nya Bhibhiliya, isoso kha si kodzegi. — Muhevbudzi 9:5, 6, 10.

Ina ka, mahungu yoyo ma guta khu hayi? Ma guta khu ga madhemoni! Madhemoni ma na ni makodzelo nya gu khedziseye muthu na nga gu vbanya; ma ngu dziti edzi muthu yoyo a nga ba a ganeya khidzo, edzi a nga ba a khade khidzo, esi a nga ba a gira ni esi a nga ba a siti. Khu kharato, ma ngu vbevbugedwa gu pimedzeya esi a nga ba a gira muthu wule a fudego. — 1 Samuweli 28:3-19.

Yimbe ndziya eyi Sathane a andrisago khiyo malipha maningano ni vale va fudego gu thumisa mitsheketo. Gu tala nya dzitepo mitsheketo yoyo yi ngu ndreyisa vathu avba nya lisine nya Bhibhiliya. — 2 Thimoti 4:4.

Afrika, gu na ni mitsheketo nya yingi yi ganeyago khu vathu va wonidwego na va gu vbanya hwane nya gu ba va fude. Gu tala nya dzitepo, siwoniso soso sa gu girega hwindzo ngundzu ni omu muthu yoyo a nga ba a vbanya umo. Ganiolu nga dziwudzisa esi: ‘Ina si ngu pwala gu muthu a gu ni tshivba nya gu wuge khu ga vafudego, a ya wugeya hwindzo ni ndranga yaye ni dzipari dzaye?’

Ina khandri muthu nyo khaguri a fanago ni oyu a fudego? Khu giyeyedzo, tepo vatshumayeli vavili nya maKristo va nga ba va tshumayela tigoni nyo khaguri, va di tugula gikhosane nya mwama gi nga ba gi va landriseya khu dziora nyo khaguri. Tepo va nga gi wudzisa, va di tugula gu khavo igyo gi di gu pimisa gu khigyo moyo wawe a diri ndriyaye a nga ba a fude myaga hwane. Igyo gi di gu phazama, ganiolu kha gya dzumeya gu khigyo gyo phazama. Nga dundrugeya khesi gikhosane gile gi nga ya bhuleya dzipari ni vambe vathu!

Khu lisine, u nguti silo nya singi esi vathu va tshukago va si wona, va sipwa mwendro gu si lora. Silo soso nya mba olovelega, si ngu thusedzeya ava si va dugeleyago. Marein, a vbanyago Muhwa-dambo ga Afrika, a di gu oloveya gupwa lito la vhovho waye nya nyamayi na gu mu rana wutshigu. Marein a di gu womba dzihuwa khu gu thava avba nya gu vatshavbo ndrangani va wuga. A di hegisa khu gu handruga.

A bari gu ava va fudego va ngu vbanya khu lisine, ina si di hadzi pwisisega gu avo va thurugiseya valongo vawe? Khu lisine ne. Mahungu yoyo nya gu vivbe ma guta khu ga madhemoni.

Ahati mahungu yale ma wonegago nga khatshi ma ngu tsakisa ni gu thaveleya? Khu giyeyedzo, Gbassay, wa Sera Leyowa a di gu dwala. Khavbovbo a di lora papayi waye a nga ba a fude. Uye a di mu leleteya gu hongola avba nya simbo nyo khaguri a ya rola lihagane a li pata ni mati, a seya. Kha nga ba na yede gu ganeya ni muthu na si gu giri isoso. Hwane nya gu ba na giride isoso a di hawuluga.

Nyamayi moyo a di khuye a di tedwa khu mwama waye ni wutshigu na gu vbindride litshigu limwedo na fude. A di khuye a di gu mburide ngudzu nigu a di gu ambade sombo nya gumbure.

 Mahungu ni siwoniso nya nga esi sa gu wonega nga khatshi khyadi ni gu khatshi si ngu phasa. Ina iso sa guta khu ga Nungungulu furi? Ne, kha siti khiyo. Jehovha, “Nungungulu nya lisine.” (Ndzimo 31:5) Uye gima kha tsakiswi khu gu hi lipheya mwendro gu hi kanganyisa. Madhemoni khayo basi ma girago isoso.

Ganiolu, ina kamo momo madhemoni nya yadi? Ahihi. Ambari olu ma tshukago ma wonega nga khatsi ma ngu phasa, yatshavbo khandri yadi. Tepo Dhiyabhulosi a nga ganeya ni Evha, dzi giride nga khatshi muthu nya wadi. (Genesi 3:1) Ganiolu, ginani gi nga dugeleya Evha hwane nya gu ba a engiside Dhiyabhulosi a bwe a gira esi uye a nga ganeya? A difa.

U ngu dziti nuwe gu khuwe si olovelegide gu muthu nya mba wadi a yeyedza wuwadi ga vale a vbwetago gu va gireya guvivba ni gu va kanganyisa. Livingu limwedo la Afrika lari khilo: “Magwaha swe, monyo phum”. Nigu Lito la Nungungulu lari khilo: “Sathane a ngu dzi gira ngilozi ya Nungungulu.” — 2 Vakorinto 11:14.

Nungungulu kha ngo ganeya gambe ni vathu omu mafuni khu gu thumisa dzindroro, siwoniso mwendro malito ma tago khomu guvbanyago sivangwa nya liphuvbo. Uye a gu va thangeya ni gu va hevbudza khu gu thumisa Bhibhiliya, a gu iyo yi kodzago gu gira muthu a khala nya “guvbelele, a kodze gu gira mithumo yatshavbo nya yadi.” — 2 Thimoti 3:17.

Khu kotani nya olu Jehovha a hi haladzago, uye a ngu hi gengedza gasi hi dzi woneya avba nya milaphwi ya Dhiyabhulosi. Uye a ngu dziti gu khuye madhemoni valala nya vakhongolo.