Gasi khu ginani Sathane ni Madhemoni yaye va girago ni gevbini gasi gu kanganyisa vathu? Khu gu, va gu vbweta gu khavo hi dzi pata navo avba nya wu wugeyi wawe. Va gu vbweta gu khavo hi va khozeya. Avo gambe va gu vbweta gu khavo hi khodwa malipha yawe hi bwe hi gira esi Jehovha a si nyenyago. Gu tala nya silo soso sa gu pata sihena si gimbileyanago ni vale va fudego.

Gu fedwa khu gigodwa gyathu, si ngu pwisa wuvi, khu kharato hi yede gu garadzega. Jesu “a di liya” tepo yi ngafa pari yaye Lazaro. — Johane 11:35.

Gu na ni sihena nya singi si gimbileyanago ni gufa, iso somo khu gu hambanahambana mafuni. Nya singi kha si dwanisani ni matshina nya milayo nya Bhibhiliya. Ganiolu, somo esi si seketedwago khu mawonelo nya gu khayo vale va fudego va ngu vbanya nigu va ngu kodza gu wona ava va vbanyago. Gu pileka ni girumbi, gu liya nyo vbindre pimo ni madzingelo nya ndruma, satshavbo soso so girwa khu gu thava gu zangarisa liphuvbo la wule a fudego. Kha nga olu hi dzitigo gu khethu vale va fudego “kha va pimi gambe gilo,” ava va girago silo soso va gu emeya malipha ya Sathane. — Muhevbudzi 9:5.

 Simbe sihena so khugeya avba nya gu kodwe gupwani vale va fudego va gu vbweta giphaso gya ava va vbanyago, nigu va gu tshuka va si tangadziswi va gu gireya guvivba ava va vbanyago. Mambe mayigo gu ngu girwa mibuzo ni dzimhamba ga gu tshuka muthu a tshanganisa 40 matshigu mwendro mwaga hwane nya gu ba na fude. Vathu va gu gira isoso na va gu khavo va gu phasa mufi ‘gu vboha’ omu gu vbanyago sivangwa nya liphuvbo. Gimbe gihena gi olovelegidego, gu ningeya guhodza ni wadwa dzinguluvi.

Silo soso si vivbide kholu sa gu andrisa malipha ya Sathane maningano ni vale va fudego. Ina Jehovha a ngu dzumeleya gu khuye hi gira gilogyo gi seketedwago avba nya sihevbudzo nya madhemoni? Ne vbadugwana! — 2 Vakorinto 6:14-18.

Sithumi sa Nungungulu nya lisine kha si dzi bedzedzeyi omu nya silo si seketeyago malipha ya Sathane. Khu ndziya nya lihaladzo, iso sa gu vega gupima avba nya gu phase gumogo ni gu tangadzisa ava va vbanyago. Si ngu dziti gu khiso muthu a gufa, khu Jehovha basi a kodzago gu mu phasa. — Joba 14:14, 15.

Vathu nyo khaguri va ngu dzi tshanganisa ni madhemoni khu gu thumisa dzinyanga. Isoso so ranwa pwani wuloyi mwendro wunyanga. Wuloyi, gufemba, gutshwayila, dzisolo ni gu wudzisa dzinguluve, satshavbo sesi makhalelo nya wunyanga.

Bhibhiliya yi ngu kona silo sesi khu gu khiyo: “A nga manegi vbakari gwanu ni moyo . . . nya guthumise wunyanga, ni gulola dzisolo, va nya gufemba ni wuloyi; nya gu gire sisamadziso, va nya gutshwayina, va nya sikwembu, dzinyanga ni va nya guwudzisa vafi. Kholu vatshavbo avo va na girago isoso, manyala ga [Jehovha] Nungungulu.” — Dhewuteronome 18:10-12.

Khu ginani Jehovha a hi gengedzago ngudzu gasi hi si beleyi sihena sesi?

Jehovha a gu hi gengedza gu mba beleya ni gevbini gilo gi gimbeleyanago  ni wuloyi kholu o vbweta gu khuye hi khadzisega gwadi. Uye a ngu haladza ni gu theya kota khu vathu, nigu a ngu dziti gu khuye ava va dzi tshanganisago ni madhemoni va ngu tshaniseka.

Moyo nya ava va tshanisekidego, khu Nilda a nga bari nyanga Brazili. Uye hanisidwe ngudzu khu madhemoni. A di khuye: “Maphuvbo . . . ma di nyi mbaka, ma nyi ninga sileletelo. Yimbe tepo dzi di gu khotha yimbe tepo dzi di si khothi, nigu nyi di gu garadzega mapimoni. Madhemoni ma di nyi tshanisa avba nya gu dzi horoga. Nyi di gu seya mirendre nya gu rudzise mapimo nyi bwe nyi seya wadwa ni gu daha nya mba ema. Isoso si dzegide myaga nya yingi.”

Khu gu phaswa khu Jehovha ni Dzifakazi, Nilda kodzide gu dzi hambanisa ni madhemoni, olu o vbanya na tshulegide. Wari khuye: “Nyi ngu gu kutsani mwatshavbo gu kheni gima mu nga dzi tshanganisi ni maphuvbo [nyo vivbe].”