Dauda wa Sera Leyowa, dandrede omu nya gidhoropana gi gomogo gipandre ngulu gya wuronga. Uye a di khuye: “Na nyi ngari lidzaha, ndranga yathu yi di gu dwanisana khu gipeto ni yimbe ndranga. Vatshavbo va di gu banga gipeto gyagimwegyo. Gu ranidwe mwama moyo nya nyanga gasi gu ta lamula mahungu yaya. Uye a di dzega libona a pharisa mumbe mwama, khavbovbo a mu fenengedza mwendra nya guage. Nya mba hweya mwama wule a di pheya gu ndrendremeya ni gu lutuga. Na khedzide libona, a di samala khuye: ‘Nya gu wona gikhosane gi hidzimeyago! Gi ambade sombo nya guage. Khya gulapha nigu gi gumbide ngudzu, gi ni dzinvi, gya gu gimbiya khu tshetengelo.’

“A di gu tshamuseya edzi a nga ba a khade khidzo Vhovho wathu nya mwama! Khavbovbo a di pheya gu garadzega a kwanguluga khuye: ‘Mwa gu ba mu si khodwi esi nyi ganeyago, deluni mu ta si wona khu mwabune!’ Khu lisine, mwalo gwathu a nga tiya gu gira isoso! Nyanga yi di rudzisa mwama wule khu gu mu mitegedzeya mati nya wunyanga nyo patwe ni mahagane ma nga ba ma romo omu nya gigasi.

“Na gu ganeya khu gu thumisa mwama wa omu nya libona, ‘Vhovho’ a di khuye gipeto gile gi di gu lumba ethu. A di embeya vhovho nya nyamayi gu khuye a nga si kodza gu lima petoni mule nya mba thava gilo. Ndranga yile yimbe kha ya bomba isoso. Mahungu ma di vbeya kharato.”

 Matshangu nya nga aya ma olovelegide Muhwa-dambo ga Afrika. Omu ni mambe malanga mafuni, mazanazana nya vathu va gu khodwa gu khavo vathu va fudego va guya vbanya khu liphuvbo, va bwe va kodza gu wona ambari gu gira gilogyo womini nya vathu mafuni. Ina isoso lisine? Ina vale va fudego va ngu vbanya kamo? A bari gu kha va vbanyi, khu va mani va dzi ranago maphuvbo ya vale va fudego? Guti mihlamulo nya lisine nya siwudziso sesi gu na ni lisima ngudzu. Esi sa gu thula gufa ni guvbanya.