Maphuvbo momo! Maphuvbo kha ma wonegi nigu gu na ni maphuvbo nya yadi ni ayo nya mba yadi. Ina ayo vathu va fudego va nga ba va vbanya mafuni?

Ahihi. Muthu a gufa kha hongoli aya vbanya wulangawo gu vbanyago maphuvbo, nga edzi vathu nya vangi va pimisago khidzo. Ha gu dziti kharini? Khu gu Bhibhiliya ya gu ganeya kharato. Bhibhiliya libhuku li ganeyago lisine li tago khu ga Nungungulu moyo basi nya lisine, oyu lina laye a gu Jehovha. Kha nga olu Jehovha a gu uye a vangidego vathu, a ngu siti gwadi esi si va dugeleyago tepo va fago. — Ndzimo 83:18; 2 Thimoti 3:16.

Bhibhiliya yari khiyo Nungungulu wumbide muthu nyo pheye Adhamu, “khu kudzudzwane nya mafu.” (Genesi 2:7) Nungungulu a di mu vega omu nya Paradhesi, thembweni ga Edheni. Nari khatshi Adhamu a di engiside nayo wa Jehovha, gima na safa; na nga gu vbanya mafuni kala muhuno. Ganiolu, tepo Adhamu a nga ndraga nayo wa Nungungulu khagwenye, Nungungulu a di mu embeya khuye: ‘U na bweleya u khala gambe mafu. Kholu uwe u kudzudzwane, u na bweleya gambe u khala kudzudzwane.’ — Genesi 3:19.

Isoso sa gu thula ginani? Nga dundrugeya, a diri hayi Adhamu na si gu vangwi khu Jehovha khu kudzudzwane nya mafu? Uye a diri mwalo. A di siri liphuvbo ndzadzini li nga ba li ngo vireya gu velegwa. Uye a diri mwalo. Khu kharato, tepo Jehovha a nga khuye Adhamu a na ‘bweleya a khala gambe mafu’, uye a di gu tshamuseya gu khuye Adhamu a nafa. Khandri a di hadzi vbindrugedza a khala liphuvbo.  Tepo a ngafa, Adhamu a di pheledza gu mba na womi; gu mba manega gambe. Gufa ga gu thula gu mba vbanya.

Ganiolu ahati vambe va fudego ke? Anavo va mwalo gambe? Bhibhiliya ya gu hlamula gu khiyo:

• “Vatshavbo [vathu ni sirengo] va na hegisa khu guya dangamwedo. Va giridwe khu kudzudzwane nya mafu, khu guralo, vatshavbo va na bwelela mafuni.” — Muhevbudzi 3:20.

• “Vale va fudego kha va pimi gambe gilo.” — Muhevbudzi 9:5.

• “Lihaladzo, livengo ni lidiwo lawe, satshavbo si fuvide.” — Muhevbudzi 9:6.

• “Phalani nya vafi u hongolago umo, gu mwalo thumo, makungu, mapimo, ambari wugengeli nya gukari.” — Muhevbudzi 9:10.

• “[Vathu] la gu duga liphuvbo lawe, va gu wuya va khala kudzudzwane; ga ilo litshigu, ma gu hegisa guralo makungu yawe yatshavbo.” — Ndzimo 146:4, NM.

 Si ngu gu garadzeya gu yi khodwa Milowo yeyi? A bari gu si ngu gu garadzeya, nga dundrugeya khesi: Dzindrangani nya dzingi, mwama khuye a thumago dzitsapawu gasi gu sayisa ndranga yaye. Tepo mwama a fago, gu tala nya dzitepo ndranga yaye ya gu tshala yi tshaniseka. Dzimbe dzitepo mwangadzi waye ni sanana va ngu hamuga ni dzitsapawu nyo renge guhodza. Dzimbe dzitepo va ngu tshala va tshaniswa khu vambe vathu. Olu nga dzi wudzisa esi: ‘A bari gu mwama wule a ngu vbanya nga liphuvbo, khu ginani a si simamigo gu sayisa ndranga yaye? Khu ginani a si vhikeyigo ndranga yaye ga vathu nya guvivbe?’ Isoso kha si kodzegi kholu milowo ya gu ganeya lisine. Mwama wule kha ngo vbanya gambe, gi mwalo a gi kodzago gu gira. — Ndzimo 115:17.

Ina esi sa gu thula gu khiso vale va fudego gima kha va na nga wuswa va vbanya gambe? Ne, khandriso. Hi na ganeya khu guwuswa ga vale va fudego ga sipimo si na landreyago. Ganiolu isoso sa gu thula gu khiso avo va fudego kha va siti esi uwe u girago. Avo kha va gu woni, kha va gupwi, ambari gu ganeya nago. U mwalo gighelo nya gu va thave. Avo kha va kodzi gu gu phasa, ambari gu gu gireya guvivba. — Muhevbudzi 9:4; Isaya 26:14.