Hatshavbo hi yede gu hatha. Gu thumeya Jehovha mwendro gu thumeya Sathane ni madhemoni yaye. Kha hi si kodzi gu gira sa sivili khu gumogo. Wugengeyi gu hatha gu thumeya Jehovha!

Kha nga hi si wonidego, madhemoni ma gu tsakiswa khu gu tshanisa vathu ni gu va lipheya. Jehovha khandri kharato. Uye a gu gola vathu kha nga edzi babe nyo khaguri a golago khidzo sanana saye. Uye khuye muningi nya “satshavbo nya sadi hi hakhidego ni giningwa nya gululame.” (Jakobe 1:17) Uye kha digi gu gira esi nya sadi ga vathu, ambari sa gu mu lemeleya gundzu. — Vaefeso 2:4-7.

Nga dundrugeya khu silo si giridwego khu Jesu mafuni, Gyanana gya Nungungulu. Uye giride gu sidudu si ganeya ni sikhumu si wona. Uye hawulugiside va nya gudwala khu sokono ni silima. Tutumiside madhemoni a bwe a hawulugisa yatshavbo mafumbo nya madwali. Khu tshivba ya Nungungulu, Jesu wuside vathu va fudego gasi va vbanya gambe. — Matewu 9:32-35; 15:30, 31; Luka 7:11-15.

Vbavbandze nya gu hi lipheye gasi gu hi pengisa, Nungungulu tepo yatshavbo a gu ganeya lisine. Uye gima kha kanganyisi. — Mitengo 23:19.

Kha nga edzi wuluru wu molago khidzo dziphuga khu guvbevbuga, dzimiliyoni nya vathu va modwe khu guvbevbuga avba nya gu khodwe silo nya malipha. Avo va gu thava vale va fudego. Va gu thava madhemoni. Avo va gu thava mabango, mipfhukwa ni wuloyi. Va gu khodwa sihena si seketedwago avba nya malipha ya Sathane Dhiyabhulosi. Sithumi sa Nungungulu kha sa modwa khu silo soso.

Jehovha na ni tshivba nya yikhongolo ngudzu guvbindra Sathane. Wa gu thumeya Jehovha, uye a na gu vhikeya avba nya madhemoni. (Jakobe 4:7) Wuloyi kha wu na nga gu gira gilo. Khu giyeyedzo, Nijerya, dzinyanga dziraru dzi zamide gu songa mweyo nya Dzifakazi dza Jehovha yi nga ba yi bomba gu khuga khu dhoropani. Khu gu ba na wuloyi wadzo wa sa thuma gilo, mweyo nya dzinyanga dzile yi di ndrendremeya khu hwanga, yi vbwetedzeya Fakazi yile gasi gu lomba divalelo.

Wa gu tshaniswa khu madhemoni, u nga si kodza gu rana Jehovha khu lina, uye a na gu vhikeya. (Mavingu 18:10) Ganiolu, gasi gu vhikedwa khu Jehovha, u yede gu dzi hambanisa khu gu vbeleya ni satshavbo si gimbileyanago ni wunyanga mwendro madhemoni. Vakhozeyi va Nungungulu va Efeso va giride isoso. Avo va di hengeledza yatshavbo mabhuku yawe nya wuloyi va vbisa. (Mithumo 19:19, 20) Sithumi sa Nungungulu si yede gu gira niso kharato. Dzi hambanise ni dzisolo, wutumbe, mabhuku nya wuloyi, mifungu “nya gu dzi vhikeye” khiyo, wuloyi ni satshavbo si gimbileyanago ni wunyanga.

Wa gu vbweta gu tsakisa Nungungulu, kha si eneyi basi gu diga wukhozeyi nya malipha ni gu diga gu gira silo nya guvivbe. U yede gu patega khu lisine-sine omu nya wukhozeyi wu agidego. Bhibhiliya yi ngu yeyedza esi si vbwetegago:

Sathane ni madhemoni va na ni vathu mafuni va hevbudzago ni gu gira silo nya guvivbe. Ganiolu Jehovha nuye a ni vathu. Avo Dzifakazi dza Jehovha. (Isaya 43:10) Mafuni gwatshavbo gu na ni Dzifakazi dzi vbindrago 8 dzimiliyoni. Dzatshavbo dza gu dzi garadzeya gu gira silo nya sadi ni gu hevbudza lisine vathu. U nga si kodza gu tshangana nadzo omu nya dziSalawu nya Mufumo. Idzo dzi na ya gu hakha khu lihaladzo.

Thumo wadzo gu phasa vambe gu thumeya Nungungulu. Idzo dzi na hevbula nago Bhibhiliya gaya gwago, dzi gu phasa guti edzi u na khozeyago khidzo Jehovha khu ndziya nya lisine. Khu na nga livba gilo khu gihevbulo gyogyo. Dzifakazi dzi ngu tsaka khu gu hevbudza lisine kholu idzo dzi haladzago vathu ni Jehovha Nungungulu.