“Nungungulu wa ndzadzini a na emisa wumbe mufumo nya gu gima kha wu na khoziswa khu mambe mafumbu.” — Dhaniyeli 2:44.

“Hi ningidwe gyanana nya gikhwathana; wufumu womo magatani gwaye.” — Isaya 9:6.

• Gu na gu ninga litsako khu guti gu khuwe womo mufumo nya gululame u na phasegago khuwo. — Isaya 48:17, 18.

• U na tsaka khu guti gu khuwe mafuni nya maphya ma tago, u na ba u ri ni womi nya guvbeleye ni gutsakisa. — Gutuledwa 21:3, 4.

Ina, khu sighelo sivili:

• Jesu yeyedzide esi Mufumo wa Nungungulu wu na si girago. Jesu hevbudzide vapizane vaye gu gombeya va lomba gu khavo Mufumo wa Nungungulu wuta nigu gugola ga Nungungulu gu girega mafuni. (Matewu 6:9, 10) Jesu yeyedzide edzi nombelo wowo wu na hlamudwago khidzo.

  Tepo a nga ba a romo mafuni, Jesu hodziside vathu, a hawulugisa vadwali abwe a wusa vathu khu gufani! (Matewu 15:29-38; Johane 11:38-44) Kha nga Mufumeli nya Mufumo wa Nungungulu, Jesu yeyedzide khu ndziya nya gutsakise esi Mufumo wowo wu na gireyago ava va na fumedwago khuwo. — Gutuledwa 11:15.

• Makhalelo nya mafu yaya ma gu yeyedza gu khayo Mufumo wa Nungungulu wu nata nugunugu. Jesu yeyedzide gu khuye na gu nga tshade vbadugwana gasi Mufumo wa Nungungulu wu resa gurula mafuni, mafu yaya ma na tala khu dzinyimbi, dzindzala ni sirevareva. — Matewu 24:3, 7.

  Makhalelo yaya hi ngu ma wona muhuno. Khu kharato hi ngu kodza gu tumba gu khethu nugunugu Mufumo wa Nungungulu wu na fuvisa satshavbo sigaradzo sesi.