Guvelegwa nya gyanana gu ngu resa litsako ni sigaradzo ga vadzegani. Kha nga vathu va nga gu tewulago, mu na thuga mu hlamala khu gu wona gu khenu olu gikhati gyanu ni tshivba yanu so thumisedwa ngudzu vbagusayisatunu nya gyanana gyanu. Gu mba lala ni gu vbindrugedza nya gudzipwe gwanu si nga thuga si tsolopeteya gupwanana gwanu. Si na vbwetega gu uwe ni oyu u dzeganego naye mu gira malulamiselo nya gu kari gasi mu kodza gu sayisa gyanana gyanu gumogo ni gu vhikeya wugadzi wanu. Matshina nya milayo nya Bhibliya ma nga gu phasani kharini gu emisana ni guvbindrugedza gogo nya mavbanyelo?

NGA WONA ESI BHIBLIYA YI SI GANEYAGO: ‘Lihaladzo li na ni gutimiseya ni wuwadi.’ Lihaladzo gambe ‘kha li dwaneyi gu dzi tsakisa, kha li khali likhulu.’ (1 Vakorinto 13:4, 5) Si ngu pwisisega gu, kha nga nyamayi a nga gu tewulago, u na vbweta gu vega gupima gwago ga gyanana gyanu. Ganiolu, mwama wago a nga thuga a dzipwa na si khathaledwi. Khu kharato, u nga divali gu khuwe anuye a ngu vbweta gu khuye u mu khathaleya. Khu gu yeyedza gutimiseya ni wuwadi, u ngu kodza gu mu gira a dzipwa nari muthu a khathaledwago gumogo ni gudzipwa na gu patega gusayisani nya gyanana gyanu.

“Enu nenu vama, vbanyani ni vagadzi vanu khu gurula ni githawo.” (1 Pedro 3:7) Pwisisa gu khuwe mwangadzi wago a na thumisa tshivba yaye nya yingi gusayisani nya gyanana gyanu. Uye olu na ni gudzihlamuleya nya guphya, nigu khu kharato a nga dzipwa na garade ni gu vbeya tshivba. Simbe sikhati gambe a nga thuga a gu zangareya, ganiolu zama gu rula, kholu “muthu a si vbiredzeyigo gu zangari i tshukwana guvbindra mwama nya tshivba.” (Mavingo 16:32) Yeyedza gu khuwe u ngu mu pwisisa, u mu ninga giphaso a gi vbwetago.—Mavingo 14:29.

GIRA KHARATI:

• Gileletelo ga vababe: Phasa mwangadzi wago gu sayisa gyanana, ambari vbawutshigutunu. Vbungula gikhati u gi thumiseyago simbe silo gasi u khala tepo nya yingi ni mwangadzi wago ni gyanana gyago

• Gileletelo ga vamayi: Dzumeya tepo mwama wago a lombago gu gu phasa gu khathaleya gyanana. A gu mba kodza gu gi sayisa gwadi, u nga mu konaniseyi, ganiolu mu yeyedze magirelo ya kona khu ndziya nya yadi

NGA WONA ESI BHIBLIYA YI SI GANEYAGO: ‘Va vavili va na khala muthu moyo [“nyama mweyo,” NM] basi.” (Tumbunuko 2:24) Ambari olu mu gu na ni givbango nya giphya ndrangani gwanu, dundruga gu khuwe uwe ni oyu u dzeganego naye mu ngari “nyama mweyo.” Dzi garadzeye gu simama gu tiyisa gupwanana gwanu.

Vagadzi, bongani giphaso mu ningwago khu vama vanu. Gu va embeyani gu khenu mu ngu va bonga gu ngu kodza gu “vbanyisa.” (Mavingo 12:18) Vama, embeyani vagadzi vanu gu khenu mu ngu va haladza ni gu va ninga ngudzu lisima. Vadzundzeni khedzi va sayisago khidzo ndranga.—Mavingo 31:10, 28.

‘Muthu a nga dwaneyi basi esi si mu tsakisago wurumba waye, aholu muthu ni muthu a na dwaneye esi si tsakisago muthu kwawe.’ (1 Vakorinto 10:24) Tepo yatshavbo gireya silo nya sadi oyu u dzeganego naye. Kha nga vadzegani, dzi ningeni tepo nya gu khale mu bhula, mu dzundzana ni gu engiseyana. Tepo mu hengeyago malawu, muthu ni muthu a nga dwaneyi gu dzi tsakisa wurumba waye basi. Khathaleya esi oyu u dzeganego naye a si vbwetago. Bhibliya yari khiyo: ‘Mwama ni ngadzi mu nga bombeyani, vbavbandze nya gupwananeni.’ (1 Vakorinto 7:3-5) Khu kharato, tulani myonyo yanu mu bhula khu mhaka yeyi. Gutimiseya ni gupwisisa gwanu gu na tiyisa gupwanana gwanu.

GIRA KHARATI:

• U nga divali gu dzi ninga tepo gasi mu khala mwatshavbo

• Gira silwana si na phasago oyu u dzeganego naye gu a dzipwa na gu haladzwa, nya nga gu mu rengeya giningwa nya gu kari

NGA WONA ESI BHIBLIYA YI SI GANEYAGO: ‘Gukhugeya wananani wago, u ngu yi pima gwadi Milowo nya guage. Iyo yi na ni tshivba nya gu gu ninge guti gu yisago guvbanyiswani.’ (2 Thimoti 3:15) Girani malulamiselo nya edzi mu na hevbudzago khidzo gyanana gyanu. Igyo gi ngu kodza gwadi gu hevbula, ambari na gi si velegwi. Ambari na gi ngari ndrani, gyanana gi ngu kodza guti malito yanu ni gu dziti gu khigyo mu tsakide mwendro ne. Gi hevbuleyeni na gi ngari gidugwana. Ambari gudzina saye gi no ne gu si pwisisa esi mu lerigo, isoso si na gi phasa gu gola gu leri tepo gi na dandrago.

Mu nga pimisi gu khenu gyanana gyanu gi ngari gidugwana gasi gu gi kodza gupwa esi mu si ganeyago khu Nungungulu. Igyo gi fanede gu mi pwani na mu gu gombeya ga Jehovha. (Nayo [Deuteronome] 11:19) Ambari mwa gu ba na mu gu hagana, ganeyani khu silo si giridwego khu Nungungulu. (Ndzimo 78:3, 4) Tepo gyanana gyanu gi dandrago, gi na wona edzi mu golago khidzo Jehovha, nigu anigyo gi na hevbula gu mu gola.

GIRA KHARATI:

• Gombeyani ga Jehovha mu lomba guti gasi gu hevbudza gyanana gyanu

• Bweleleyani gu gi ganeleya malito ni mahungu nya gisekelo gasi gi pheya gu ma hevbula na gi ngari gidugwana