Ambari olu u zamago gu gira satshavbo u si kodzago gasi wugadzi ni ndranga yago si mana litsako, gu nga thuga gu dugeleya silo nya mba si lindreya si na gu duseyago litsako. (Mutshumayeli 9:11) Khu lihaladzo, Nungungulu a ngu hi ninga giphaso tepo hi mananago ni sigaradzo. Wa gu landra matshina yaya nya milayo nya Bhibliya, uwe ni ndranga yago mu na kodza gu emisana naso, ambari sa gu ba na si gu thisa ngudzu.

NGA WONA ESI BHIBLIYA YI SI GANEYAGO: ‘Vegani ga Nungungulu sigaradzo sanu satshavbo, kholu uye a ngu mi khathaleya.’ (1 Pedro 5:7) Tepo yatshavbo dundruga gu khuwe Nungungulu khandruye a vangago sigaradzo sago. (Jakobe 1:13) Wa gu hidzimeya gwaye, uye a na gu phasa khu ndziya nya wutshukwana ngudzu. (Isaya 41:10) ‘Mu embedzeyeni mabala ya myonyoni gwanu.’ (Ndzimo 62:9)

Uwe gambe u na mana guthaveledwa wa gu leri ni gu hevbula Bhibliya tshigu ni tshigu. Khu gu gira kharato, u na wona edzi Jehovha a hi thaveleyago khidzo “sigaradzoni sathu satshavbo.” (2 Vakorinto 1:3, 4; Varoma 15:4) Uye a ngu tumbisa gu gu ninga ‘gurula ga Nungungulu gu kodzago gu vboha ni omu hi si gu alakanyigo.’—Vafilipi 4:6, 7, 13.

GIRA KHARATI:

• Gombeya ga Jehovha u lomba giphaso gasi u kodza gu rula ni gu pimisa gwadi

• Khedzisisa gwadi esi u pimisago gu si gira, u hatha magirelo nya tshukwana ga yatshavbo

NGA WONA ESI BHIBLIYA YI SI GANEYAGO: “Monyo wa muthu nya gu pimisise wu ngu mana guti, ni ndzeve ya oyu a gu na ni wugengeli yi ngu vbweta gu mana guti.” (Mavingo 18:15) Zama gu pwisisa satshavbo si nga girega. Zama gambe guti esi givbango ni givbango nya ndranga yago gi si vbwetago. Bhula naso ubwe u si engiseya tepo si ganeyago.—Mavingo 20:5.

Ahati wa gu fedwa khu muthu u mu golago ke? U nga thavi gu liya. Dundruga gu khuwe ambari ‘Jesu lide.’ (Johane 11:35; Mutshumayeli 3:4) Gimbe gilo nya lisima gi vbwetegago khu gu hefemula ni gu lala si eneya. (Mutshumayeli 4:6) Isoso si na gu phasa gu emisana ni sigaradzo.

GIRA KHARATI:

• Na gu si gu dugeleyi sigaradzo, oloveya gu bhula ni sivbango nya ndranga yago. Ga gu dugeleya sigaradzo, iso si na dzipwa na si tshulegide gu bhula nago

• Bhula ni vambe vathu va emisanego ni sigaradzo nya nga esi u emisanago naso

NGA WONA ESI BHIBLIYA YI SI GANEYAGO: “Pari nya lisine yi ngu yeyedza lihaladzo dzitepo dzatshavbo, nigu iyo ndruye a velegedwego dzitepo nya sigaradzo.” (Mavingo 17:17) Dzipari dzago dzi ngu dzina gu gu phasa, ganiolu gu na ni gu na dzi si giti gilo nya gu gu gireye. U nga thavi gu dzi embeya esi khu lisine u si vbwetago. (Mavingo 12:25) Gambe lomba vale va yi pwisisago Bhibliya gasi va gu phasa khu mu liphuvboni. Mawonelo va na gu ningago ma seketedwago omu nya Bhibliya ma na gu phasa.—Jakobe 5:14

Wa gu tshangana gikhati gyatshavbo ni vale khu lisine va khodwago ga Nungungulu ni gu tumba situmbiso saye, u na mana giphaso u gi vbwetago. Gambe u na mana guthaveledwa gikhati u phasago vale va vbwetago gutiyiswa. Va bhuleye khu gukhodwa gwago ga Jehovha ni situmbiso saye. Tepo yatshavbo phasa vale va vbwetago giphaso, u si dzi hambanise ni vale ga gu haladzago ni gu gu khathaleya.—Mavingo 18:1; 1 Vakorinto 15:58.

GIRA KHARATI:

• Bhula ni pari yago nya yikhongolo u dzumeya gu khuwe yi gu phasa

• U nga thavi gu ganeya esi u si vbwetago