GIPANDRE NYA 5
Ndziya nya Guvbanye khu Gurula ni Valongo Vanu
‘Gu vbwetega muri ni ndruda, gudzinogisa, gurula ni gutimiseya.’
Mutshadho wa gu wumba ndranga nya yiphya. Ambari olu u na simamago gu haladza ni gu ninga githawo vavelegi vago, avba gwago muthu yoyu u dzeganego naye khuye a gu wa lisima ngudzu guvbindra vatshavbo mafuni. Lisine leli li nga garadzeya valongo nya gu kari gu li dzumeya. Ganiolu matshina nya milayo nya Bhibliya ma nga gu phasa gu ninganiseya silo, gasi u simama gu vbanya khu gurula ni valongo vago nu gu dzi garadzeya gu tiyisa gupwanana nya ndranga nya yiphya u yi vbahago.
1 WONA VALONGO VAGO KHU NDZIYA YI FANEDEGO
NGA WONA ESI BHIBLIYA YI SI GANEYAGO: “Ninga githawo babe ni mayi wago.” (Vaefeso 6:2) Na gu si khathalisegi tinga u gu nayo, tepo yatshavbo u fanede gu ninga githawo vavelegi vago. Pwisisa gu khuwe oyu u dzeganego naye, kha nga muthu a gu na ni vavelegi, fanede nuye gu va khathaleya. “Lihaladzo li mwalo lidiwo,” khu kharato u nga dzipwi na u romo mhangoni khu olu muthu u dzeganego naye a pwananago ni vavelegi vaye.
GIRA KHARATI:
-
Potsa gu ganeya silo nya nga esi: “Tepo yatshavbo valongo vago va gu nyi tshipisa” mwendro “Mamayi wago gima kha tsaki khesi nyi girago”
-
Zama gu wona silo khu ndziya yeyi oyu u dzeganego naye a si wonago khiyo
2 SA GU VBWETEGA, TIYA LONGO
NGA WONA ESI BHIBLIYA YI SI GANEYAGO: ‘Mwama a na diga ndranga ya babe ni mayi waye a feya gu ya vbanya ni mwangadzi waye, va vavili va khala muthu moyo basi.’ (Tumbunuko 2:24) Tepo u tshadhago, vavelegi vago va nga dzipwa na va ngari ni gudzihlamuleya nya gu kari khuwe, nigu khu kharato va nga vbweta gu dzi bedzedzeya wugadzini wago guvbindra pimo.
Khuwe ni oyu u dzeganego naye mu fanedego gu pwanana khu mivbingano mu na va vegeyago, khavbovbo mu va embeya khu ndziya nya lihaladzo. Mu ngu kodza gu va embeya lisine nya mba va gorosa. (Mavingo 15:1) Gudzinogisa, gurula ni gutimiseya gu na gu phasa gu tiyisa gupwanana ni valongo vago ni gu simama gu ‘yeyedzana lihaladzo.’
GIRA KHARATI:
-
Wa gu ba nu gu garadzega khu gu valongo va dzi bedzedzeya ngudzu womini wanu, bhudzisana khiso ni oyu u dzeganego naye na mu rude
-
Pwananani khedzi mu na dzi gimbidzisago khidzo dzimhaka dzedzi
