Kha nga u hevbudego omu nya bruxura yeyi, Bhibliya yi na ni matshina nya mangi nya milayo ma na gu phasago uwe ni ndranga yago. Jehovha o vbweta gu khuye u tsaka. Uye a ngu tumbisa gu khuye wa gu thangisa gu mu khozeya, “simbe mu na ningwa kha nga libhaso [“mu na engedzedwa,” NM].” (Matewu 6:33) Khu lisine uye o vbweta gu khuye uwe u khala pari yaye. Thumisa dzatshavbo dzi ndziya dzi na gu tulegeyago gasi gu haguleya wupari wago ni Nungungulu. Aya malungelo nya makhongolo ngudzu nya guvbindre yatshavbo ma kodzago gu manwa khu muthu.—Matewu 22:37, 38.

NGA WONA ESI BHIBLIYA YI SI GANEYAGO: “‘Eni nyi na khala babe wanu, enu mu na khala sanana sangu nya madzaha ni dzimbiri.’ Go ganeya Pfhumu nya tshivba yatshavbo.” (2 Vakorinto 6:18) Nungungulu o vbweta gu khuye uwe u khala pari yaye nya yikhongolo. Gu gira nombelo gilo gimwegyo gi na phasago gu vbaha wupari wowo. Jehovha a ngu gu ramba gu mba ‘garala khu gu gira milombelo.’ (1 Vatesalonika 5:17) Uye a ngu dogoreya ngudzu gupwa mapimo ni gugaradzega si gomogo monyoni gwago. (Vafilipi 4:6) Wa gu gombeya ni sivbango nya ndranga yago, iso si na wona gu khiso Jehovha muthu nya lisine gwago.

Vbavbandze nya gu ganeye ni Nungungulu basi, gu vbwetega gu u mu engiseya. U ngu kodza gu gira isoso khu gu hevbula Lito laye ni mabhuku ma seketedwago omu nya Bhibliya. (Ndzimo 1:1, 2) Dundrugeya esi u si hevbulago (Ndzimo 77:12, 13) Gu engiseya Nungungulu gambe go lomba gu u manega mitshanganoni nya Wukristo tepo yatshavbo.—Ndzimo 122:1-4.

Yimbe ndziya nya lisima nya gu tiyise gupwanana gwago ni Jehovha khu gu bhuleya vambe khuye. Wa gu dzi ningedzeya ngudzu thumoni wowo, u na dzipwa nuri vbafuvbi ngudzu naye.—Matewu 28:19, 20.

GIRA KHARATI:

• Tshigu ni tshigu dzi vegeye tepo nya gu leri Bhibliya ni gu gombeya

• Kha nga ndranga, thangisani mithumo ya mu liphuvboni mbeli nya guhungate ni guhagana

NGA WONA ESI BHIBLIYA YI SI GANEYAGO: ‘Hidzimeyani vbafuvbi ga Nungungulu, uye nuye a na mi hidzimeleya.’ (Jakobe 4:8) Girani longoloko nya wukhozeli nya ndranga mubwe mu wu landra khu vbafuvbi. (Tumbunuko 18:19) Ganiolu somo simbe si vbwetegago. Gu vbwetega gu Nungungulu a gira gipandre nya guvbanye gwanu ga tshigu ni tshigu. Tiyisa gupwanana nya sivbango nya ndranga yago ni Nungungulu khu gu ganeya khuye ‘wa gu ba na u khade nyumbani gwago, wa gu ba na u gimbiya ndziyani, gikhati u ya lalago ni gikhati u wugago.’ (Nayo 6:6, 7) Dzi emiseye gu fanana ni Josuwa, a nga khuye: “Eni ni ndranga yangu, hi na thumeya Jehovha.”—Josuwa 24:15.

GIRA KHARATI:

• Gira longoloko wu na gu phasago gwadi gu hevbudza, nu gu dundrugeya esi givbango ni givbango nya ndranga yago gi si vbwetago