GIHEVBULO 11

U nga gira ginani gasi u engedzeya gu phasega khu gu leri Bhibhiliya?

WOMBISA

U di nga tshuka u vbweta gu pheya projeto nya yikhongolo, ganiolu u si guti ni avbo nyo pheye khavbo? Gasi si gu vbevbugeya, adzina u di yi pheya vbadugwanavbadugwana kala u vbedza. Khidzo saye ni gu leri Bhibhiliya. Adzina u ngu dzi wudzisa khuwe: ‘Nyi na pheya khu hayi?’ Omu nya gihevbulo gegi, hi na bhula khu silo nya khaguri si na gu phasago gu gola gu leri ni gu hevbula Bhibhiliya.

1. Khu ginani hi yedego gu leri Bhibhiliya?

Muthu a lerigo Bhibhiliya mwendro mwendro nayo wa Jehovha tshigu ni tshigu, a na tsaka. (Leri Ndzimo 1:1-3.) Gasi gu pheya, zama gu leri khu dziminuto nya dzidugwana tshigu ni tshigu. Tepo u na yago u li gola Lito la Nungungulu, u na phasega ngudzu khu guleri gwago nya Bhibhiliya.

2. U nga gira ginani gasi u phasega ngudzu tepo u lerigo Bhibhiliya?

Gasi gu hi phasega ngudzu tepo hi lerigo Bhibhiliya, gu vbwetega hi emanyana hi dundrugeya khesi hi lerigo. (Josuwa 1:8) Tepo u lerigo, dzi gire siwudziso nya nga esi: ‘Esi so nyi hevbudza ginani khu Jehovha? Nyi nga si thumisa kharini guvbanyani gwangu? Nyi nga ma thumisa kharini mavhesi yaya gasi gu phasa vambe?’

3. Nyi nga yi mana hayi tepo nyo leri Bhibhiliya?

Ina si ngu gu garadzeya gu mana tepo nyo leri Bhibhiliya? Khandruwe wenga; vangi si va garadzeyago. Zama gu “sayisa mwendro gu thumisa gwadi gikhati.” (Vaefeso 5:16) U nga gira isoso khu gu hunga ora nyo leri Bhibhiliya tshigu ni tshigu. Nyavangi vo oloveya gu leri Bhibhiliya ni dzimindru. Vambe vo hatha gu leri ni mihani, adzina khu tepo nya almoso. Vambe gambe vo hatha gu leri ni wutshigu na va si lali. Khu yevbini tepo u yi wonago na yiri yadi gwago?

GIRA WUGEVISISI NYO ETE

Wona dzindziya nyo tsakise nyo leri khidzo Bhibhiliya. Wona dzindziya nya dzadi nyo dzi dongiseye khidzo gasi u phasega khu guleri gwago nya Bhibhiliya.

Kha nga guhodza nya guphya mahoni gwathu hi vbedzago hi gu oloveya, si nga kodzega gu anethu hi yi gola gu leri Bhibhiliya

4. Esi u yedego gu gira gasi u gola gu leri Bhibhiliya

Kha si vbevbugi gu huwe bi Bhibhiliya u pheya gu leri. Ganiolu, si nga kodzega gu u gola gu leri Bhibhiliya, gufana ni edzi u girago khidzo tepo u hodzago guhodza nya gu gukhugeya u velegwa u di si hodzi. Lerini 1 Pedro 2:2, mu bwe mu bhula khu giwudziso gegi:

Wo si wona kharini, wo pheya gu leri Bhibhiliya tshigu ni tshigu si nga gu phasa mwendro ne gu gola gu yi leri?

Sistirini VHIDHYU gasi mu wona esi vathu nyo khaguri va giridego gasi va pheya gu gola gu leri Bhibhiliya. Khavbovbo, mu na bhula khu siwudziso si landreyago.

VHIDHYU: Vaphya va pheyago gu gola Lito la Nungungulu (5:33)

Sigaradzo muni si nga ba si tandregisa vaphya hi va wonidego omu nya vhidhyu gu leri Bhibhiliya?
Ginani gi va phasidego gu kodza gu leri Bhibhiliya tshigu ni tshigu?
Ginani va giridego gasi guleri gwawe nya Bhibhiliya gu tsakisa ngudzu?

Mawonelo:

Hatha Bhibhiliya yi ganeyago lisine ni gu bwe yi thumisa maganelelo ya muhuno. Nga pima gu thumisa Wuvbindrugedzeyi nya mafu nya maphya, wo ba wu romo khu lidimi lago.
Pheya khu gu leri sipandre si gu tsakisago ngudzu. Wo vbweta mawonelo, wona gipandre “Pheya gu leri Bhibhiliya.”
Markari gipimo u leridego. Thumisa gipandre “Markari gipimo nya Bhibhiliya u leridego” gi gomogo avba nya libhuku leli.
Thumisa JW Library^®. Khu gu thumisa aplikativhu yeyi, u nga leri mwendro gu engiseya Bhibhiliya khomu nya telefone mwendro wumbe mutshini ni hayini u gomogo.
Thumisa dzi apêndices nya Wuvbindrugedzeyi nya mafu nya maphya, khu Giputukezi. U na mana dzimapa, dzikwadru, ni mitshamuselo nya malito nya Bhibhiliya, gasi si engedzeya gutsakisa nya guleri gwago nya Bhibhiliya.

5. Dongiseya gihevbulo gyago nya Bhibhiliya

Lerini Ndzimo 119:34, khavbovbo mu bhula khu giwudziso gegi:

Khu ginani si gu sa lisima gu pheya khu gu gombeya tepo u vbwetago gu leri Bhibhiliya mwendro gu dongiseya gihevbulo gyago?

U nga gi londrola kharini gihevbulo ni gihevbulo nya libhuku leli? Tepo u dongiseyago gihevbulo nyo khaguri nya libhuku leli, zama gu gira esi:

Leri paragrafo nyo pheye nya gihevbulo gyogyo.
Leri milowo yatshavbo u bwe u zama gu wona edzi yi yelanago khidzo ni paragrafo.
Markari malito mwendro dzifraze dzi hlamulago giwudziso ni giwudziso; isoso si na gu phasa gu bhula gwadi khu gihevbulo gyogyo ni muhevbudzi wago.

U di gu dziti?

Dzifakazi dza Jehovha dzi thumiside Dzibhibhiliya nya dzingi nyo hambane. Ganiolu, ho gola gu thumisa Wuvbindrugedzeyi nya mafu nya maphya kholu Bhibhiliya yeyi yi ngu ganeya lisine, yi ngu vbevbuga gu yi pwisisa, nigu yi ngu thumisa lina la Nungungulu.— Wona ndrima nya jw.org “Ina Dzifakazi dza Jehovha dzo wa ni Bhibhiliya yadzo?”

VAMBE VARI KHAVO: “Gu hevbula Bhibhiliya si ngu garadza ngudzu. Vbavbandze nya isoso, nyi mwalo tepo nyo hevbule Bhibhiliya.”

Uwe ke, wo si wona kharini?

REZUMO

Gasi gu phasega khu gu leri Bhibhiliya, dzi vegeye tepo nyo yi leri, u gombeya nu si pheyi gasi gu pwisisa esi u na lerigo, u bwe u dongiseya gihevbulo gyago.