GIHEVBULO 7

Jehovha muthu nyo khale kharini?

WOMBISA

Wo dundrugeya khu Jehovha Nungungulu, wo mu wona nga muthu nyo khale kharini? Ina wo mu wona nari hwindzo ngudzu, nga dzinyeledzi? Mwendro wo mu wona na siri muthu, ganiolu nari tshivba nya yikhongolo nya tumbunugo nyo fane ni libara? Gwadigwadi Jehovha muthu nyo khale kharini? Bhibhiliya yi ngu hi yeyedza makhalelo ya Nungungulu yi bwe yi ganeya khiyo uye womo vbafuvbi gwathu.

1. Khu ginani hi gu mba mu wona Nungungulu?

Omu ga Johane 4:24, Bhibhiliya yari khiyo “Nungungulu Liphuvbo.” Jehovha mwalo givili nya nyama. Uye liphuvbo li vbanyago ndzadzini, wu gu wulanga si gu mba kodzega gu wu wona.

2. Khu yavbini makhalelo nyo khaguri a gu nawo Jehovha?

Ambari olu Jehovha a si wonegigo, uye na ni makhalelo ma mu tivegisago ga ava va vbwetago gu muti. Bhibhiliya yari khiyo: Jehovha a ngu “gola gululama, gima kha digi avo va khodwago gwaye.” (Ndzimo 37:28) Uye gambe “tade khu wuwadi ni wuhindzi,” ngudzungudzu khu vale va tshanisekago. (Jakobe 5:11) Jehovha “womo vbafuvbi ga vale myonyo yawe yi vbisegago, a vbanyisa avo mihefemulo yawe yi khuvekidego.” (Ndzimo 34:18) U di gu dziti gu khuwe esi hi girago si nga mu tsakisa mwendro gu mu zangarisa Jehovha? Phe Jehovha kha tsaki a gu wona muthu na gira silo nya guvivbe. (Ndzimo 78:40, 41) Ganiolu, a gu wona muthu na gira silo nya sadi, a ngu tsaka ngudzu. — Leri Mavingu 27:11.

3. Jehovha a gu yeyedza kharini gu khuye a ngu hi haladza?

Likhalelo nya likhongolo a gu nalo Jehovha lihaladzo. Gasi gu ganeya lisine, Bhibhiliya yari khiyo “Nungungulu lihaladzo.” (1 Johane 4:8) Jehovha kha thumisi Bhibhiliya basi gasi gu hi embeya khuye a ngu hi haladza, ganiolu hi ngu si wona gambe khu maho yathu avba nya silo a si vangidego. (Leri Mithumo 14:17.) Khu giyeyedzo, nga dundrugeya khedzi a hi giridego khidzo. A hi ningide makodzelo nyo wone dzikori nyo mbure, gupwa dzimuzika nyo tsakise, ni gu gupwa gutshamba tepo hi hodzago. Jehovha o vbweta gu khuye hi vbanya womi nyo tsakise.

GIRA WUGEVISISI NYO ETE

Wona egi Jehovha a gi thumisago gasi gu gira silo nyo hlamadzise. Wona gambe edzi Jehovha a yeyedzago khidzo makhalelo yaye.

4. Liphuvbo nya guage tshivba ya Nungungulu

Kha nga ethu hi thumisago mawogo yathu gasi gu gira mithumo yathu, Jehovha o thumisa liphuvbo laye nya guage. Vambe vathu vo pimisa gu khavo liphuvbo nya guage khu Nungungulu, ganiolu Bhibhiliya yari khiyo liphuvbo nya guage tshivba eyi Nungungulu a yi thumisago gasi gu gira silo. Lerini Luka 11:13 ni Mithumo 2:17, khavbovbo mu bhula khu siwudziso sesi:

Kha nga hi si wonidego, Nungungulu a na “tshisa mwendro gu guhula” lipuvbo laye nya guage ga vatshavbo va mu lombago. Wo si wona kharini, liphuvbo nya guage khu Nungungulu mwendro tshivba ya Nungungulu? Khu ginani u ganeyago isoso?

Jehovha o thumisa liphuvbo laye nya guage gasi gu gira silo nyo hlamadzise. Lerini Ndzimo 33:6 ni 2 Pedro 1:20, 21, mu vbedza mu bhula khu giwudziso gegi:

Khu sevbini silo nyo khaguri esi Jehovha a giridego khu gu thumisa liphuvbo laye nya guage?

5. Jehovha na ni makhalelo nyo tsakise

Mosi a diri githumi nyo tumbege gya Nungungulu, ganiolu a di gu vbweta gu muti gwadi Muvangi waye. Khu kharato, Mosi a di mu embeya, khuye: ‘Nyi ngu lomba u nyi embela gikungo gyago, nyifela gu guti.’ (Ekisodha 33:13) Khavbovbo, Jehovha a di bhuleya Mosi makhalelo yaye nyo khaguri. Lerini Ekisodha 34:4-6, khavbovbo mu bhula khu siwudziso sesi:

Khu yavbini makhalelo nyo khaguri aya Jehovha a bhuledego Mosi?
Khu yavbini makhalelo nyo khaguri ya Jehovha u ma tsakeyago?

6. Jehovha a ngu khathala khu vathu

Vathu va Nungungulu, va nga ba va ranwa pwani Vahebheru, va diri dzigumbi tigoni Egipto. Jehovha dzi pwide kharini khu gu va wona na va tshaniseka? Engiseyani AUDHYU, na mu landriseya khomu nya Dzibhibhiliya dzanu, mwendro mu leri Ekisodha 3:1-10. Khavbovbo, mu ba bhula khu siwudziso si landreyago.

AUDHYU: Jehovha a di gu gu wona gutshaniseka gwawe (2:45)

Kha nga u si wonago avba nya matimu yaya, Jehovha o dzipwa kharini tepo a wonago vathu na va tshaniseka? — Wona mavhesi 7 ni 8.
Wo si wona kharini, ina Jehovha a ngu dzina kamo gu phasa vathu va tshanisekago? Hagi uye na ni tshivba kamo nya gu gire isoso? Khu ginani u ganeyago isoso?

7. Tumbunugo wo hi hevbudza makhalelo ya Jehovha

Jehovha a ngu hi yeyedza makhalelo yaye avba nya esi a si vangidego. Sistirini VHIDHYU. Khavbovbo, lerini Varoma 1:20, mu vbedza mu bhula khu siwudziso sesi.