Jehovha o vbweta gu khuye u muti gwadi. Khu ginani? O vbweta gu khuye uti makhalelo yaye, edzi a thumisanago khidzo ni vathu ni esi a si vireyago gwago. Ina si nga kodzega kamo gu u khala pari ya Nungungulu? (Leri Jakobe 2:23.) Ginani u yedego gu gira gasi u khala pari yaye? Bhibhiliya yi ngu hlamula siwudziso sesi yi bwe yi hi embeya gu khiyo khu ginani gu khala pari ya Jehovha si gu sa lisima ngudzu guvbindra gu manega ni wupari ni mumbe muthu.

1. Ginani egi Jehovha a gu kutsago gu gira?

Bhibhiliya yari khiyo: “Hidzimelani vbafuvbi ga Nungungulu, uye nuye a na mi hidzimelela.” (Jakobe 4:8) So thula ginani isoso? Jehovha o gu kutsa gu khala pari yaye. Vambe vathu si ngu va garadzega gu khodwa gu khavo va nga khala dzipari dza Nungungulu khu kotani nya olu va gu mba mu wona. Ganiolu, omu nya Lito laye, a gu Bhibhiliya, Jehovha a ngu tshamuseya makhalelo yaye yatshavbo, gasi si hi vbevbugeya gu khala dzipari dzaye. Tepo hi lerigo mahungu ya Nungungulu omu nya Bhibhiliya, wupari wathu naye wo engedzeya gu tiya ambari olu hi si kodzigo gu mu wona.

2. Khu ginani Jehovha a gu pari nya yadi ga dzatshavbo u gu nadzo?

Mwalo mumbe muthu a gu golago ngudzu guvbindra Jehovha. Uye o vbweta gu khuye u tsaka u bwe u mu bhuleya ni gevbini gi gu garadzago. ‘Vega avbo gwaye sigaradzo sago satshavbo, kholu uye a ngu gu khathaleya.’ (1 Pedro 5:7) Jehovha o khala na dongide gu phasa, gu thaveleya ni gu engiseya dzipari dzaye. — Leri Ndzimo 94:18, 19.

3. Ginani egi Jehovha a gi vbwetago ga dzipari dzaye?

Jehovha a ngu gola vathu vatshavbo, nya mba tshiya muthu, ganiolu “a gu tsakiswa khu va nya gululama.” (Mavingu 3:32) Jehovha o vbweta gu khuye dzipari dzaye dzi dzi garadzeya gu gira silo si mu tsakisago, dzi si giri silo a si nyenyago. Vambe vathu vari khavo kha va na nga si kodza gu gira satshavbo esi Jehovha a si vbwetago ni gu diga gu gira silo a si nyenyago. Ganiolu, Jehovha a ngu hi pwisisa gwadi. Uye a dzi emisede gu khala pari ya vatshavbo va mu haladzago khu monyo watshavbo ni gu dzi garadzeya gu mu tsakisa. — Ndzimo 147:11; Mithumo 10:34, 35.

 GIRA WUGEVISISI NYO ETE

4. Abrahama a diri pari ya Jehovha

Matimu nya Bhibhiliya ya Abrahama (oyu a ranwago gambe pwani Abrama) ma ngu hi ninga wuketiketi nya esi si vbwetegago gasi hi khala dzipari dza Nungungulu. Lerini khu Abrahama omu ga Genesi 12:1-4. Khavbovbo, bhulani khu siwudziso sesi:

• Ginani egi Jehovha a nga lomba gu khuye Abrahama a gira?

• Ginani egi Jehovha a mu tumbisidego?

• Ahati uye Abrahama ke, dzumede esi a nga lombwa khu Jehovha?

5. Esi Jehovha a si vbwetago ga dzipari dzaye

Gutala nya dzitepo somo esi hi vbwetago gu khethu dzipari dzathu dzi gira.

• Ginani egi u tsakeyago gu khuwe dzipari dzago dzi gu gireya?

Lerini 1 Johane 5:3, mu vbedza mu bhula khu siwudziso sesi:

• Ginani egi Jehovha a gi vbwetago ga dzipari dzaye?

Gasi gu hi engisa Jehovha, si nga lomba gu khiso hi vbindrugedza mavbanyelo yathu mwendro makhalelo yathu. Lerini Isaya 48:17, 18, khu hwane mu bhula khu giwudziso gegi:

• Khu ginani Jehovha a vbwetago gu khuye dzipari dzaye dzi vbindrugedza mavbanyelo yadzo?

 6. Esi Jehovha a si vireyago ga dzipari dzaye

 REZUMO

Jehovha o vbweta gu khuye u khala pari yaye, nigu uye a dongide gu gu phasa gu khala pari yaye.

Siwudziso nyo wusedze

• Jehovha a gu dzi phasa kharini dzipari dzaye?

• Khu ginani Jehovha a vbwetago gu khuye dzipari dzaye dzi vbindrugedza mavbanyelo?

• Wo si wona kharini esi Jehovha a si vbwetago ga dzipari dzaye, ina si ngu lemeya? Khu ginani u ganeyago isoso?