Abari gu Nungungulu lihaladzo, khu ginani hi wonago silo nya singi nyo vivbe si girwago khu dzitshetshe dzi dzi embeyago gu khidzo dzo thumeya Nungungulu? Khu gupiya, idzodzo dzitshetshe nya malipha; dzomo kho dzi nyenyezisa lina la Nungungulu. Gasi dzo li nyenyezisa kharini? Ina Nungungulu o dzipwa kharini khisoso? Ina ka, ginani a na girago?

1. Dzitshetshe nya malipha dzo nyenyezisa kharini lina la Nungungulu khesi dzi si hevbudzago?

Dzitshetshe nya malipha dzo gira vathu ‘va diga gu landrisa lisine la Nungungulu, va landrisela malipha.’ (Varoma 1:25) Khu giyeyedzo, dzitshetshe nya dzingi kha dzi hevbudzi vathu lina la Nungungulu. Ganiolu, Bhibhiliya yari khiyo vathu vatshavbo gu vbwetega va thumisa lina la Nungungulu. (Varoma 10:13, 14) Go tshuka gu dugeleya gilo nyo vivbe, vapaderi nyo khaguri vari khavo gugola ga Nungungulu. Ganiolu, vo lipha. Nungungulu kha tshuki a gira gilo nyo vivbe. (Leri Jakobe 1:13.) Egi gi si tsakisigo khu gu malipha yoyo ma hevbudzwago khu vapaderi ma ngu gira vathu nya vangi va si vbweti gupwa gilo khu Nungungulu.

2. Dzitshetshe nya malipha dzo nyenyezisa kharini lina la Nungungulu khu mithumo yadzo?

Dzitshetshe nya malipha kha dzi phari vathu kha nga edzi Jehovha a va pharago khidzo. Bhibhiliya yari khiyo “sighoho saye [dzitshetshe nya malipha] si wungedzelane kala si ya ghuma damboni.” (Gutuledwa 18:5) Gu ngu vbindra myaga nya yingi dzitshetshe nya malipha na dzi bede khu hungo omu nya politika, dzi seketeya dzinyimbi, dzi bwe dzi songisa vathu nya vangi ngudzu. Vambe vapaderi vo vbweta gu ghanya, khu kharato vomo kho va henguleya dzitsapawu basi ga vathu. Satshavbo sesi so yeyedza gu khiso kha va muti Nungungulu nigu ne kha va yedwi gu ranwa pwani sithumi sa Nungungulu.— Leri 1 Johane 4:8.

3. Nungungulu o dzi wona kharini dzitshetshe nya malipha?

Abari gu uwe khu tsaki khesi si giredzedwago khu dzitshetshe nya malipha, kha hi ngu ganeya khu Jehovha! Jehovha a ngu haladza vathu, ganiolu kha tsakiswi khu vapaderi va nyenyezisago lina laye va bwe va tshanisa vathu vawe. A ngu tumbisa gu fuvisa dzitshetshe nya malipha nigu “mwalo a na [dzi] wonago gambe.” (Gutuledwa 18:21) Nya mba hweya, Nungungulu a na fuvisa dzitshetshe dzatshavbo nya malipha.— Gutuledwa 18:8.

 GIRA WUGEVISISI NYO ETE

4. Nungungulu kha tsakiswi khu dzitshetshe dzatshavbo

Vathu nya vangi vo khodwa gu khavo dzitshetshe dzi di hambana sadzo, ganiolu dzatshavbo dzi ngu yisa ga Nungungulu. Ina lisine ilolo? Lerini Matewu 7:13, 14, mu vbedza mu bhula khu giwudziso gegi:

• Bhibhiliya yo yi tshamuseya kharini ndziya yi yisago womini?

Sistirini VHIDHYU, mu vbedza mu bhula khu giwudziso gegi.

• Ina Bhibhiliya yi ngu ganeya gu khiyo dzitshetshe dzatshavbo hi dzi wonago dzi ngu tsakisa Nungungulu?

 6. Nungungulu o vbweta gu phasa vathu gu duga khomu nya dzitshetshe nya malipha

Lerini Gutuledwa 18:4, a khavbovbo mu bhula khu giwudziso gegi:

• Wo dzipwa kharini khu gu gupwa gu khuwe Nungungulu dzi emisede gu phasa vathu va sengedzedwago khu dzitshetshe nya malipha?

7. U nga digi gu hevbula khu Nungungulu nya lisine

Ina u yede gu sola Nungungulu khu silo nyo vivbe si ganedwago ni gu girwa khu dzitshetshe nya malipha? Nga dundrugeya khu lidzaha li bombago gu engisa wusingalagadzi nya wadi li ningwago khu papayi walo. Khavbovbo, li hunga gu khuga khu ndrangani li ya dzi vbanyeya. Ulolo papayi wakona kha tsaki ne vbadugwana khu mavbanyelo yalo. Khu ginani hi gu mba yela sola papayi wa lidzaha leli khu kotani nya mavbanyelo yalo nyo vivbe?

• Ina si ngu dingana gu sola Jehovha hi bwe hi diga gu hevbula khuye khu kotani nya silo nyo vivbe si girwago khu dzitshetshe nya malipha?

 REZUMO

Dzitshetshe nya malipha dzo nyenyezisa lina la Nungungulu khu sihevbudzo ni sigiro sadzo nyo vivbe. Nungungulu a na fuvisa dzitshetshe nya malipha.

Siwudziso nyo wusedze

• Wo si wona kharini esi dzitshetshe nya malipha dzi hevbudzago ni gu gira?

• Jehovha ke, o si wona kharini?

• Ginani egi Nungungulu a na girago khu dzitshetshe nya malipha?