GIHEVBULO 15

Khu mani Jesu?

WOMBISA

Khu mani Jesu?

Jesu moyo nya vathu a tidwago ngudzu matimuni. Ganiolu, vathu nya vangi vo muti khu lina basi nigu vambe va na ni mawonelo nyo hambanehambane khu Jesu. Ahati Bhibhiliya ke, yari khiyo ginani khuye?

1. Khu mani Jesu?

Jesu givangwa nya liphuvbo gi vbanyago ndzadzini. Jehovha Nungungulu phede khu gu gira Jesu na si gu vangi esi simbe silo. Khu gighelo gyogyo, Jesu o ranwa pwani matewula nya sivangwa satshavbo. (Vakolosi 1:15) Bhibhiliya yo rana Jesu khiyo Gyanana gyaye gi velegidwego gyonga kholu khuye enga a vangidwego khu Jehovha khu gukongoma. (Johane 3:16) Jesu a thumide ni Papayi waye, Jehovha, a mu phasedzeya gu vanga satshavbo esi simbe silo. (Leri Mavingu 8:30.) Jesu a nga gu simama gu pwanana ni Jehovha. Uye a gu thuma khu gutumbega kha nga muganeyi wa Nungungulu, mwendro gu vbindriseya mahungu ni sileletelo saye. Khu kharato, Bhibhiliya yo mu rana khiyo khuye “Lito.” — Johane 1:14.

2. Khu ginani Jesu a ngata mafuni?

Tanga nya 2000 myaga hwane, Jehovha a di gira gilewugiso khu gu thumisa liphuvbo laye nya guage, a rurisa womi wa Jesu khu ndzadzini a wu theya ndrani ga nyamahegyane nyo khaguri nyo pwani khu Mariya. Khavbovbo, Jesu a velegwa kha nga muthu nya nyama. (Leri Luka 1:34, 35.) Jesu dzude mafuni gasi a ta khala Mesiya, mwendro Kristo, a bwe a vbanyisa vathu. a Satshavbo siprofeto nya Bhibhiliya si nga ba si ganeya khu Mesiya si tadzisegide avba gwaye. Khu kharato, isoso si phaside vathu guti gu khavo Jesu a diri uye “Kristo, Gyanana gya Nungungulu a vbanyago.” — Matewu 16:16.

3. Womo hayi Jesu olu?

Hwane nyo ba Jesu a fude, Nungungulu a di mu wusa nari ni givili nya liphuvbo a bweleya ndzadzini. Tepo a nga vboha ndzadzini, ‘Nungungulu a di khusedza Jesu.” (Vafilipi 2:9) Olu, Jesu na ni gikhalo nya wufumu nya gikhongolo ngudzu — a gu landreya Jehovha khu wufumu.

GIRA WUGEVISISI NYO ETE

Guti nya singi khu Jesu u bwe uti gu khuwe khu ginani a gu wa lisima ngudzu.

4. Jesu khandruye Nungungulu nya tshivba yatshavbo

Bhibhiliya yo hevbudza gu khiyo ambari olu Jesu a gu givangwa nya liphuvbo nya tshivba ndzadzini, uye a ngu engisa Nungungulu ni Papayi waye, Jehovha. Khu ginani hi ganeyago isoso? Sistirini VHIDHYU gasi mu wona edzi Bhibhiliya yi tshamuseyago khidzo guhambana gu gomogo ga Jesu ni Nungungulu nya tshivba.

VHIDHYU: Ina Jesu Kristo khu Nungungulu? (3:22)

Milowo yeyi vbavbatshi vbavba yi ngu hi phasa gu pwisisa guhambana gu gomogo vbakari ga Jehovha ni Jesu. Lerini lowo mowo khu mowo, mu vbedza mu bhula khu siwudziso sesi.

Lerini Luka 1:30-32.

Malito ya dzingilozi ma gomogo omu nya mavhesi yaya mo yeyedza kharini guhambana gu gomogo ga Jesu ni Jehovha, “a guromo vbatshani ngudzu”?

Lerini Matewu 3:16, 17.

Ginani gi nga ganedwa khu lito li nga pwala khu ndzadzini tepo Jesu a nga bhabhatiswa?
Ilo li diri lito la mani?

Lerini Johane 14:28.

Ga papayi ni gyanana, khu mani a gu khongolo nigu khu mani a gu na ni tshivba ngudzu?
Jesu a di rana Jehovha khuye Papayi. So hi hevbudza ginani isoso?

Lerini Johane 12:49.

Ina Jesu a ngu dzi wona na fana ni Papayi waye? Uwe ke, wo si wona kharini?

5. Silo si yeyedzago gu khiso Jesu a diri uye Mesiya

Bhibhiliya yi na ni siprofeto nya singi si nga hadzi phasa vathu guti Mesiya, a gu oyu Nungungulu a mu hathidego gasi gu vbanyisa vathu. Sistirini VHIDHYU gasi mu mananyana wuketiketi nya siprofeto nyo khaguri si tadzisegidego ga Jesu tepo a nga ba ari mafuni.

VHIDHYU: Jesu tadziside siprofeto (3:03)

Lerini siprofeto sesi nya Bhibhiliya, mu vbedza mu bhula khu siwudziso sesi:

Lerini Mikeya 5:2 gasi muti omu Mesiya a nga hadzi velegedwa umo. b

Ina giprofeto gegi gi tadzisegide tepo a nga velegwa Jesu? — Matewu 2:1.

Lerini Ndzimo 34:20 ni Zakariya 12:10 gasi mu wona esi si nga ba si profetidwe khu gufa ga Mesiya.

Ina siprofeto sesi si tadzisegide?— Johane 19:33-37.
Wo si wona kharini, ina Jesu a di dongiseya silo sesi na gu ngari ni tepo gasi si ta tadzisega avba gwaye?
So gu hevbudza ginani esi khu Jesu?

6. Hi ngu phasega khu gu hevbula khu Jesu

Bhibhiliya yari khiyo si na ni lisima ngudzu gu hevbula khu Jesu ni thumo a wu girago. Lerini Johane 14:6 ni 17:3, mu vbedza mu bhula khu giwudziso gegi:

Khu ginani si gu sa lisima gu hevbula khu Jesu?

Jesu a hi tulede ndziya nya gu hi khala dzipari dza Nungungulu. A hi hevbudzide lisine khu Jehovha, nigu khu kotani yaye hi na mana womi nya gupindruge

VAMBE VARI KHAVO: “Dzifakazi dza Jehovha kha dzi khodwi ga Jesu.”