GIHEVBULO 16
I thumo muni wu giridwego khu Jesu mafuni?
Vathu nya vangi vo pimisa gu khavo Jesu gyanana nya gidugwana, muprofeti nya mba gengeya mwendro mwama a fudego. Ganiolu, ina hi nga phasega khu gu hevbula khesi a giridego ni gu ganeya tepo a nga ba ari mafuni? Omu nya gihevbulo gegi, hi na hevbula khu silo nyo khaguri nya lisima a giridego Jesu ni edzi si hi phasago khidzo.
1. Khu wevbini wu nga ba wuri thumo nya lisima ga Jesu?
Thumo nya lisima ga Jesu gu diri gu tivisa ‘mahungu nya yadi nya Mufumo wa Nungungulu.’ (Leri Luka 4:43.) Uye a di gu tshumayela mahungu nya yadi nya gu khayo Nungungulu a na resa Mufumo wu na lulamisago sigaradzo satshavbo nya vathu. a Khu myaga miraru ni metadu, Jesu a di gu thuma nya mba tshaya na gu bhuleya vathu mahungu nyo tshambe — Matewu 9:35.
2. Ma diri yavbi makungo nya silewugiso sa Jesu?
Bhibhiliya yi ngu ganeya khu “mithumo nya tshivba, ni siliwugiso, ni siwonegiso esi Nungungulu a giridego khu [gu thumisa Jesu].” (Mithumo 2:22) Khu gu thumisa tshivba ya Nungungulu, Jesu si kodzide gu emisa gingulu, gu hodzisa dzimiliyoni nya vathu, gu hawulugisa vadwali, gupata ni gu wusa ava va fudego. (Matewu 8:23-27; 14:15-21; Marko 6:56; Luka 7:11-17) Silewugiso si giridwego khu Jesu kha si hi tshiyeli gukanakana nyo khethu a di rumedwa khu Nungungulu. Iso gambe so yeyedza gu khiso Jehovha na ni tshivba nyo lulamise sigaradzo sathu satshavbo.
3. Ginani hi gi hevbulago ga womi wa Jesu?
Jesu a di gu engisa Jehovha tepo yatshavbo. (Leri Johane 8:29.) Uye giride isoso womini waye watshavbo, ambari olu vambe va nga ba va zama gu mu digisa. Uye yeyedzide gu khuye si ngu kodzega gu vathu va thumeya Nungungulu, ambari vo ba va tshangana ni sigaradzo. Khu ndziya yoyo, Jesu hi tshiyede “giwonelo [mwendro giyeyedzo] gasi hi landra ndzila yaye.” — 1 Pedro 2:21.
GIRA WUGEVISISI NYO ETE
Wona edzi Jesu a tshumayedego khidzo mahungu nya yadi ni gu gira silewugiso.
4. Jesu a di gu tshumayela mahungu nya yadi
Jesu gimbide mipfhuka ni mipfhuka ulolo khu mawundru na gu tshumayela mahungu nya yadi ga vathu nya vangi. Lerini Luka 8:1, mu vbedza mu bhula khu siwudziso sesi:
-
Ina Jesu a di gu hevbudza basi vathu va nga ba va mu hidzimeleya?
-
Ginani a nga ba a gira Jesu gasi a mana vathu?
Nungungulu profetide gu khuye Mesiya a di hadzi tshumayela mahungu nya yadi. Lerini Isaya 61:1, 2, mu vbedza mu bhula khu siwudziso sesi:
-
Jesu tadziside kharini giprofeto gegi?
-
Wo si wona kharini, ina si ngu yela gu vathu muhuno va engiseya mahungu yaya?
5. Jesu a di gu hevbudza sihevbudzo nya lisima
Vbavbandze nyo tshumayele basi mahungu nya yadi nya Mufumo wa Nungungulu, Jesu a di gu hevbudza sihevbudzo nya lisima. Wona sidugwana sakona omu nya Ganelo yaye yi tidwago ngudzu ya Gigomoni. Lerini Matewu 6:14, 34 ni 7:12, mu vbedza mu bhula khu siwudziso sesi:
-
Wusingalagadzi muni nya lisima owu Jesu a ningedego avba nya mavhesi yaya?
-
Wo si wona kharini, ina wusingaladzi wowu wu nga phasa vathu muhuno?
6. Jesu a giride silewugiso
Jehovha ningide tshivba Jesu nyo gire silewugiso. Gasi gu wona giyeyedzo nyo khaguri, lerini Marko 5:25-34 mwendro mu sistiri VHIDHYU. Khu hwane, mu bhula khu siwudiziso sesi.
-
Kha nga u si wonidego omu nya vhidhyu, ginani egi nyamayi wule a nga ba a gi khodwa?
-
Ginani gi gu tsakisidego avba nya gilewugiso gegi?
Lerini Johane 5:36, mu vbedza mu bhula khu siwudziso sesi:
-
Ginani egi silewugiso sa Jesu si ‘fakazidego’ mwendro si yeyedzidego khuye?
U di gu dziti?
Gutala nya silo hi si tigo khu Jesu so manega omu nya 4 mabhuku nya Bhibhiliya ma ranwago pwani Dziivhangeli, a gu Matewu, Marko, Luka ni Johane. Mulovi moyo ni moyo nya dziivhangeli dzedzi, lovide silo nya womi wa Jesu si nga mba lowa khava vambe valovi. Ganiolu, satshavbo va lovidego si ngu hi phasa gu muti gwadi Jesu.
-
MATEWU
Khuye nyo pheye gu lova Ivhangeli yaye. Yo ganeya ngudzu khu sihevbudzo sa Jesu, ngudzungudzu esi a si hevbudzidego khu Mufumo wa Nungungulu.
-
MARKO
Lovide Ivhangeli nyo role ngudzu. Yi ngu tsakisa nigu yi tade khu sigiro sa Jesu.
-
LUKA
O ganeya ngudzu khu nombelo ni lisima eli Jesu a nga ba a ninga vanyamayi.
-
JOHANE
O ganeya ngudzu khu makhalelo ya Jesu khu gu tshamuseya mabhulo nya mangi aya Jesu a manegidego nawo ni dzipari dzaye ni vambe vathu.
VAMBE VARI KHAVO: “Jesu khuye Nungungulu nya tshivba yatshavbo.”
-
Uwe ke, wo si wona kharini?
REZUMO
Jesu a di gu tshumayela khu Mufumo wa Nungungulu, a gira silewugiso, a bwe a engisa Jehovha tepo yatshavbo.
Siwudziso nyo wusedze
-
Khu wevbini thumo wu nga ba wuri wa lisima ga Jesu omu mafuni?
-
Silewugiso sa Jesu si yeyedzide ginani?
-
Sihevbudzo muni nya lisima a hevbudzidego Jesu?
HEVBULA SIMBE
Ginani egi Jesu a nga ba a gi gola gu ganeya ngudzu khigyo?
“Khu ginani Mufumo wa Nungungulu wu gu wa lisima ga Jesu?” (Mukhedziseyi nya 1 nya Outubro nya 2014, khu Giputukezi)
Wona sighelo si hi girago hi khodwa gu khethu silewugiso si giridwego khu Jesu si giregide kamo.
“Ginani u gi hevbulago avba nya silewugiso sa Jesu?” (Mukhedziseyi nya 15 nya Julho nya 2004, khu Giputukezi)
Wona edzi mwama nyo khaguri a vbindrugedzidego khidzo womi waye hwane nyo hevbule khedzi Jesu a nga ba phara khidzo vathu.
“Kha nya nga ba nyi khathala khu vambe” (Mukhedziseyi nya 1 nya Outubro nya 2014, khu Giputukezi)
Wona silo nya lisima a giridego Jesu khu gulandreyana ndrani nya thumo waye mafuni.
“Sigiro nya lisima si giridwego khu Jesu mafuni” (Wuvbindrugedzeyi nya mafu nya maphya, Apêndice A7, khu Giputukezi)
a Sihevbulo 31-33 si na ganeya khu Mufumo wa Nungungulu khu gidokho ni gidokho.
You May Also Like
SIWUDZISO VA TALAGO GU GIRA
Ginani gihevbulo nya Bhibhiliya?
Mana mihlamulo nya edzi hi girago khidzo gihevbulo nya Bhibhiliya.
