GIHEVBULO 21
Mo tshumayedwa kharini mahungu nya yadi?
Nya mba hweya, Jehovha a na thumisa Mufumo waye gasi gu fuvisa satshavbo sigaradzo sathu. Ayoyo mahungu nya yadi aya vatshavbo va yedego gu mati. Jesu embede vapizane vaye khuye va di yede gu bhuleya mahungu yaya vathu vatshavbo! (Matewu 28:19, 20) Dzifakazi dza Jehovha dzo landrisa kharini gileletelo gegi gya Jesu?
1. Libhuku la Matewu 24:14 lo tadzisega kharini muhuno?
Jesu profetide khuye: “Mahungu yaya nya yadi nya Mufumo ma na tshumayedwa mafuni gwatshavbo.” (Matewu 24:14) Dzifakazi dza Jehovha dzi ngu tsaka khu gu patega omu nya thumo wowu nya lisima ngudzu. Ho tshumayela mahungu nya yadi mafuni gwatshavbo khu malimi nyo vbindre 1000! Thumo wowu khandri thumo nya guhagane — wo vbweta tepo, tshivba ni sasamedzo nya wadi. Kha si kodzegi gu gira thumo wowu nya mba na giphaso gya Jehovha.
2. Ginani hi girago gasi hi mana vathu nyo va tshumayele?
Ethu ho tshumayela ni hayini gu manegago vathu. Kha nga Makristo ya gale, ho tshumayela khu ndranga ni ndranga. (Mithumo 5:42) Matshumayelelo yaya ma ngu hi phasa gu mana dzimiliyoni nya vathu myaga yatshavbo. Kha nga olu si gu mba vbevbuga gu mana vathu dzindrangani tepo yatshavbo, hi ngu tshumayela gambe omu gu manegago ngudzu vathu. Tepo yatshavbo ho khala na hi dongide gu bhuleya vambe khu Jehovha ni makungo yaye.
3. Khu vamani va yedego gu tshumayela mahungu nya yadi?
Makristo yatshavbo nya lisine ma yede gu tshumayela mahungu nya yadi ga vathu vatshavbo. Kha hi wu woneyi vbavbatshi thumo wowu. Khu kharato, moyo ni moyo wathu o gira satshavbo a si kodzago thumoni wowu, kholu hi ngu dziti gu khethu wu na vbulugisa womi nya vathu. (Leri 1 Thimoti 4:16.) Kha hi hakhiswi gilo khu gu gira thumo wowu, kholu Bhibhiliya yari khiyo: “Mu ningidwe mahala, anenu ningeyani mahala.” (Matewu 10:7, 8) Khandri vathu vatshavbo va tsakeyago mahungu yathu. Ambari ulolo, kha hi digi gu tshumayela, kholu ho vbweta gu engisa Jehovha ni gu tsakisa monyo waye.
GIRA WUGEVISISI NYO ETE
Wona esi Dzifakazi dza Jehovha dzi girago gasi dzi kodza gu tshumayela mafuni gwatshavbo. Wona gambe edzi Jehovha a hi phasago khidzo.
Thumo nyo tshumayele mafuni gwatshavbo: (A) Costa Rica, (B) Estados Unidos, (C) Benin, (D) Tailândia, (E) Yap, (F) Suécia
4. Ho dzi garadzeya gu tshumayela vathu vatshavbo
Dzifakazi dza Jehovha dzi ngu dzi garadzeya gu tshumayela mahungu nya yadi ni hayini va gomogo vathu. Sistirini VHIDHYU, mu vbedza mu bhula khu giwudziso gegi.
-
Wo si wona kharini satshavbo esi Dzifakazi dza Jehovha dzi girago gasi gu tshumayela?
Lerini Matewu 22:39 ni Varoma 10:13-15, mu vbedza mu bhula khu siwudziso sesi:
-
Thumo wathu nyo tshumayele wo yeyedza kharini gu khuwo hi ngu haladza vathu vakhwathu?
-
Jehovha o va wona kharini ava va tshumayelago mahungu nya yadi? — Wona livhesi 15.
5. Hi sithumi sikwawe sa Nungungulu
Matshangu nya mangi mo yeyedza gu khayo Jehovha a ngu thangeya thumo wathu. Khu giyeyedzo, nga wona esi si nga dugeleya ndriyathu nyo khaguri nyo pwani khu Paul wa Nova Zelândia. Litshigu limwedo ni siyambo na gu tshumayela khu ndranga ni ndranga, a di mana nyamayi nyo khaguri, oyu ni dzimindru dzakona, a nga ba a gombede ga Nungungulu khu gu thumisa lina laye, Jehovha, a lomba gu khuye a endredwa khu muthu nyo khaguri gaya gwaye. Paul wari khuye: “Hwane nyo ba gu vbindride dziora dziraru, nyi di khokhotha lidimba laye.”
Lerini 1 Vakorinto 3:9, mu vbedza mu bhula khu giwudziso gegi:
-
Matshangu nya nga aya ya Nova Zelândia mo yeyedza kharini gu khayo Jehovha a ngu thangeya thumo nyo tshumayele?
Lerini Mithumo 1:8, mu vbedza mu bhula khu giwudziso gegi:
-
Khu ginani hi vbwetago giphaso gya Jehovha gasi gu gira thumo wathu nyo tshumayele?
U di gu dziti?
Omu nya mitshangano yathu ya vbakari nya semana, hi ngu hevbudzwa dzindziya nyo tshumayele khidzo. Abari gu u di nga tshuka u hongola ga moyo nya mitshangano yeyi, u dzi pwide kharini khedzi hi hevbudzwago khidzo?
6. Ho engisa gileletelo gya Nungungulu nyo tshumayele
Matshigoni ya vapostoli, vawugeyi va zamide gu digisa vapizane va Jesu gu tshumayela. Makristo yoyo nyo pheye ma di dwaneya fanelo yawe nyo tshumayele na va gu dzumeledwa khu nayo. (Vafilipi 1:7) Khiso dzi girago Dzifakazi dza Jehovha muhuno. a
Lerini Mithumo 5:27-42, mu vbedza mu bhula khu giwudziso gegi:
-
Khu ginani hi no ne diga gu tshumayela mahungu nya yadi? — Wona mavhesi 29, 38, ni 39.
VAMBE VA NGA WUDZISA KHAVO: “Khu ginani Dzifakazi dza Jehovha dzi tshumayelago khu ndranga ni ndranga?”
-
U di hadzi hlamula kharini?
REZUMO
Jesu rumide vapizane vaye khu tshumayela mahungu nya yadi mafuni gwatshavbo. Jehovha a ngu phasa vathu vaye gu gira thumo wowu.
Siwudziso nyo wusedze
-
Mahungu nya yadi mo tshumayedwa kharini mafuni gwatshavbo?
-
Thumo wathu nyo tshumayele wo yeyedza kharini gu khuwo hi ngu haladza vathu vakhwathu?
-
Wo si wona kharini, ina thumo nyo tshumayele wu ngu tsakisa? Khu ginani?
HEVBULA SIMBE
Wona edzi Dzifakazi dza Jehovha dzi tshumayelago khidzo vathu omu nya madhoropa nya makhongolo.
Thumo nyo tshumayele nya guhathege madhoropani nya makhongolo ya Paris (5:11)
Ginani dzi girago Dzifakazi dza Jehovha gasi gu phasa valuveli?
Engiseya wabune edzi a tsakago khidzo ndriyathu Margarita khu gu tshumayela mahungu nya yadi thumoni nya tepo yatshavbo.
Wona edzi hi vbulugidego khidzo ga milandru nyo khaguri omu nya dzitribhunali gasi gu andrisa thumo nyo tshumayele.
“Vatshumayeli nya Mufumo va yisa mahungu yawe tribhunali” (Mufumo wa Nungungulu wu ngu fuma!, gipimo 13, khu Giputukezi)
a Nungungulu khuye a hi rumidego gu tshumayela. Khu kharato, Dzifakazi dza Jehovha kha dzi vireyi gu dzumeledwa khu wufumu gu tshumayela mahungu nya yadi.
You May Also Like
SIWUDZISO VA TALAGO GU GIRA
Ginani gihevbulo nya Bhibhiliya?
Mana mihlamulo nya edzi hi girago khidzo gihevbulo nya Bhibhiliya.
